น วตฺตพฺพํ – ‘‘คิหิสฺส อรหา’’ติ? อามนฺตาฯ นนุ ยโส กุลปุตฺโต, อุตฺติโย คหปติ, เสตุ มาณโว, คิหิพฺยญฺชเนน อรหตฺตํ ปตฺโตติ? อามนฺตาฯ หญฺจิ ยโส กุลปุตฺโต, อุตฺติโย คหปติ, เสตุ มาณโว, คิหิพฺยญฺชเนน อรหตฺตํ ปตฺโต, เตน วต เร วตฺตพฺเพ – ‘‘คิหิสฺส อรหา’’ติฯ

คิหิสฺส อรหาติกถา นิฏฺฐิตาฯ

4. จตุตฺถวคฺโค

(34) 2. อุปปตฺติกถา

[388] สห อุปปตฺติยา อรหาติ? อามนฺตาฯ สห อุปปตฺติยา โสตาปนฺโน โหตีติ? น เหวํ วตฺตพฺเพ…เป.…ฯ

สห อุปปตฺติยา อรหาติ? อามนฺตา ฯ สห อุปปตฺติยา สกทาคามี โหตีติ? น เหวํ วตฺตพฺเพ…เป.…ฯ

สห อุปปตฺติยา อรหาติ? อามนฺตาฯ สห อุปปตฺติยา อนาคามี โหตีติ? น เหวํ วตฺตพฺเพ…เป.…ฯ

สห อุปปตฺติยา โสตาปนฺโน น โหตีติ? อามนฺตาฯ หญฺจิ สห อุปปตฺติยา โสตาปนฺโน น โหติ, โน จ วต เร วตฺตพฺเพ – ‘‘สห อุปปตฺติยา อรหา’’ติฯ

สห อุปปตฺติยา สกทาคามี น โหตีติ? อามนฺตาฯ หญฺจิ สห อุปปตฺติยา สกทาคามี น โหติ, โน จ วต เร วตฺตพฺเพ – ‘‘สห อุปปตฺติยา อรหา’’ติฯ

สห อุปปตฺติยา อนาคามี น โหตีติ? อามนฺตาฯ หญฺจิ สห อุปปตฺติยา อนาคามี น โหติ, โน จ วต เร วตฺตพฺเพ – ‘‘สห อุปปตฺติยา อรหา’’ติฯ

[389] สห อุปปตฺติยา อรหาติ? อามนฺตาฯ สาริปุตฺโต เถโร สห อุปปตฺติยา อรหาติ? น เหวํ วตฺตพฺเพฯ