เมนู

7. สตฺตกนิทฺเทโส

[806] ตตฺถ กตมานิ สตฺตสตฺตติ ญาณวตฺถูนิ? ชาติปจฺจยา ชรามรณนฺติ ญาณํ, อสติ ชาติยา นตฺถิ ชรามรณนฺติ ญาณํ, อตีตมฺปิ อทฺธานํ ชาติปจฺจยา ชรามรณนฺติ ญาณํ, อสติ ชาติยา นตฺถิ ชรามรณนฺติ ญาณํ, อนาคตมฺปิ อทฺธานํ ชาติปจฺจยา ชรามรณนฺติ ญาณํ, อสติ ชาติยา นตฺถิ ชรามรณนฺติ ญาณํฯ ยมฺปิสฺส ตํ ธมฺมฏฺฐิติญาณํ ตมฺปิ ขยธมฺมํ วยธมฺมํ วิราคธมฺมํ นิโรธธมฺมนฺติ ญาณํ; ภวปจฺจยา ชาตีติ ญาณํ…เป.… อุปาทานปจฺจยา ภโวติ ญาณํ…เป.… ตณฺหาปจฺจยา อุปาทานนฺติ ญาณํ…เป.… เวทนาปจฺจยา ตณฺหาติ ญาณํ…เป.… ผสฺสปจฺจยา เวทนาติ ญาณํ…เป.… สฬายตนปจฺจยา ผสฺโสติ ญาณํ…เป.… นามรูปปจฺจยา สฬายตนนฺติ ญาณํ…เป.… วิญฺญาณปจฺจยา นามรูปนฺติ ญาณํ…เป.… สงฺขารปจฺจยา วิญฺญาณนฺติ ญาณํ…เป.… อวิชฺชาปจฺจยา สงฺขาราติ ญาณํ, อสติ อวิชฺชาย นตฺถิ สงฺขาราติ ญาณํ, อตีตมฺปิ อทฺธานํ อวิชฺชาปจฺจยา สงฺขาราติ ญาณํ, อสติ อวิชฺชาย นตฺถิ สงฺขาราติ ญาณํ, อนาคตมฺปิ อทฺธานํ อวิชฺชาปจฺจยา สงฺขาราติ ญาณํ, อสติ อวิชฺชาย นตฺถิ สงฺขาราติ ญาณํฯ ยมฺปิสฺส ตํ ธมฺมฏฺฐิติญาณํ ตมฺปิ ขยธมฺมํ วยธมฺมํ วิราคธมฺมํ นิโรธธมฺมนฺติ ญาณํฯ อิมานิ สตฺตสตฺตติ ญาณวตฺถูนิฯ เอวํ สตฺตวิเธน ญาณวตฺถุฯ

สตฺตกํฯ

8. อฏฺฐกนิทฺเทโส

[807] ตตฺถ กตมา จตูสุ มคฺเคสุ จตูสุ ผเลสุ ปญฺญา? โสตาปตฺติมคฺเค ปญฺญา, โสตาปตฺติผเล ปญฺญา , สกทาคามิมคฺเค ปญฺญา, สกทาคามิผเล ปญฺญา, อนาคามิมคฺเค ปญฺญา, อนาคามิผเล ปญฺญา, อรหตฺตมคฺเค ปญฺญา, อรหตฺตผเล ปญฺญา – อิมา จตูสุ มคฺเคสุ จตูสุ ผเลสุ ปญฺญาฯ เอวํ อฏฺฐวิเธน ญาณวตฺถุฯ

อฏฺฐกํฯ

9. นวกนิทฺเทโส

[808] ตตฺถ กตมา นวสุ อนุปุพฺพวิหารสมาปตฺตีสุ ปญฺญา? ปฐมชฺฌานสมาปตฺติยา ปญฺญา, ทุติยชฺฌานสมาปตฺติยา ปญฺญา, ตติยชฺฌานสมาปตฺติยา ปญฺญา, จตุตฺถชฺฌานสมาปตฺติยา ปญฺญา, อากาสานญฺจายตนสมาปตฺติยา ปญฺญา, วิญฺญาณญฺจายตนสมาปตฺติยา ปญฺญา, อากิญฺจญฺญายตนสมาปตฺติยา ปญฺญา, เนวสญฺญานาสญฺญายตนสมาปตฺติยา ปญฺญา, สญฺญาเวทยิตนิโรธสมาปตฺติยา วุฏฺฐิตสฺส ปจฺจเวกฺขณาญาณํ – อิมา นวสุ อนุปุพฺพวิหารสมาปตฺตีสุ ปญฺญาฯ เอวํ นววิเธน ญาณวตฺถุฯ

นวกํฯ