กตานิสํเส สมฺปสฺสํ, ปเรสํ สทฺธาย เทสเย;
อุกฺขิตฺตกา กติ วุตฺตา, กติ สมฺมาวตฺตนาฯ
อฏฺฐานิสํเส สมฺปสฺสํ, ปเรสํ สทฺธาย เทสเย;
อุกฺขิตฺตกา ตโย วุตฺตา, เตจตฺตาลีส สมฺมาวตฺตนาฯ
กติ ฐาเน มุสาวาโท, กติ ปรมนฺติ วุจฺจติ;
กติ ปาฏิเทสนียา, กตินํ เทสนาย จฯ
ปญฺจ ฐาเน มุสาวาโท, จุทฺทส ปรมนฺติ วุจฺจติ;
ทฺวาทส ปาฏิเทสนียา, จตุนฺนํ เทสนาย จฯ
กตงฺคิโก มุสาวาโท, กติ อุโปสถงฺคานิ;
กติ ทูเตยฺยงฺคานิ, กติ ติตฺถิยวตฺตนาฯ
อฏฺฐงฺคิโก มุสาวาโท, อฏฺฐ อุโปสถงฺคานิ;
อฏฺฐ ทูเตยฺยงฺคานิ, อฏฺฐ ติตฺถิยวตฺตนาฯ
กติวาจิกา อุปสมฺปทา, กตินํ ปจฺจุฏฺฐาตพฺพํ;
กตินํ อาสนํ ทาตพฺพํ, ภิกฺขุโนวาทโก กติหิฯ
อฏฺฐวาจิกา อุปสมฺปทา, อฏฺฐนฺนํ ปจฺจุฏฺฐาตพฺพํ;
อฏฺฐนฺนํ อาสนํ ทาตพฺพํ, ภิกฺขุโนวาทโก อฏฺฐหิฯ
กตินํ เฉชฺชํ โหติ, กตินํ ถุลฺลจฺจยํ;
กตินญฺเจว อนาปตฺติ, สพฺเพสํ เอกวตฺถุกาฯ
เอกสฺส เฉชฺชํ โหติ, จตุนฺนํ ถุลฺลจฺจยํ;
จตุนฺนญฺเจว อนาปตฺติ, สพฺเพสํ เอกวตฺถุกาฯ
กติ อาฆาตวตฺถูนิ, กติหิ สงฺโฆ ภิชฺชติ;
กเตตฺถ ปฐมาปตฺติกา, ญตฺติยา กรณา กติฯ
นว อาฆาตวตฺถูนิ, นวหิ สงฺโฆ ภิชฺชติ;
นเวตฺถ ปฐมาปตฺติกา, ญตฺติยา กรณา นวฯ
4. อวนฺทนียปุคฺคลาทิ
[477]
กติ ปุคฺคลา นาภิวาเทตพฺพา, อญฺชลิสามิเจน จ;
กตินํ ทุกฺกฏํ โหติ, กติ จีวรธารณาฯ
ทส ปุคฺคลา นาภิวาเทตพฺพา, อญฺชลิสามิเจน จ;
ทสนฺนํ ทุกฺกฏํ โหติ, ทส จีวรธารณาฯ
กตินํ วสฺสํวุฏฺฐานํ, ทาตพฺพํ อิธ จีวรํ;
กตินํ ภนฺเต ทาตพฺพํ, กตินญฺเจว น ทาตพฺพํฯ
ปญฺจนฺนํ วสฺสํวุฏฺฐานํ, ทาตพฺพํ อิธ จีวรํ;
สตฺตนฺนํ สนฺเต ทาตพฺพํ, โสฬสนฺนํ น ทาตพฺพํฯ
กติสตํ รตฺติสตํ, อาปตฺติโย ฉาทยิตฺวาน;
กติ รตฺติโย วสิตฺวาน, มุจฺเจยฺย ปาริวาสิโกฯ
ทสสตํ รตฺติสตํ, อาปตฺติโย ฉาทยิตฺวาน;
ทส รตฺติโย วสิตฺวาน, มุจฺเจยฺย ปาริวาสิโกฯ
กติ กมฺมโทสา วุตฺตา, พุทฺเธนาทิจฺจพนฺธุนา;
จมฺปายํ วินยวตฺถุสฺมิํ, สพฺเพว อธมฺมิกา [สพฺเพ อธมฺมิกา (สี. สฺยา.)] กติฯ
ทฺวาทส กมฺมโทสา วุตฺตา, พุทฺเธนาทิจฺจพนฺธุนา;
จมฺปายํ วินยวตฺถุสฺมิํ, สพฺเพว อธมฺมิกา [สพฺเพวาธมฺมิกา (สี.), สพฺเพ อธมฺมิกา (สฺยา.)] กตาฯ
กติ กมฺมสมฺปตฺติโย วุตฺตา, พุทฺเธนาทิจฺจพนฺธุนา;
จมฺปายํ วินยวตฺถุสฺมิํ, สพฺเพว ธมฺมิกา กติฯ
จตสฺโส กมฺมสมฺปตฺติโย วุตฺตา, พุทฺเธนาทิจฺจพนฺธุนา;
จมฺปายํ วินยวตฺถุสฺมิํ, สพฺเพว ธมฺมิกา กตาฯ
กติ กมฺมานิ วุตฺตานิ, พุทฺเธนาทิจฺจพนฺธุนา;
จมฺปายํ วินยวตฺถุสฺมิํ, ธมฺมิกา อธมฺมิกา กติฯ
ฉ กมฺมานิ วุตฺตานิ, พุทฺเธนาทิจฺจพนฺธุนา;
จมฺปายํ วินยวตฺถุสฺมิํ, เอเกตฺถ ธมฺมิกา กตา;
ปญฺจ อธมฺมิกา วุตฺตา, พุทฺเธนาทิจฺจพนฺธุนาฯ
กติ กมฺมานิ วุตฺตานิ, พุทฺเธนาทิจฺจพนฺธุนา;
จมฺปายํ วินยวตฺถุสฺมิํ, ธมฺมิกา อธมฺมิกา กติฯ
จตฺตาริ กมฺมานิ วุตฺตานิ, พุทฺเธนาทิจฺจพนฺธุนา;
จมฺปายํ วินยวตฺถุสฺมิํ, เอเกตฺถ ธมฺมิกา กตา;
ตโย อธมฺมิกา วุตฺตา, พุทฺเธนาทิจฺจพนฺธุนาฯ
ยํ เทสิตํนนฺตชิเนน ตาทินา;
อาปตฺติกฺขนฺธานิ วิเวกทสฺสินา;
กเตตฺถ สมฺมนฺติ วินา สมเถหิ;
ปุจฺฉามิ ตํ พฺรูหิ วิภงฺคโกวิทฯ
ยํ เทสิตํนนฺตชิเนน ตาทินา;
อาปตฺติกฺขนฺธานิ วิเวกทสฺสินา;
เอเกตฺถ สมฺมติ วินา สมเถหิ;
เอตํ เต อกฺขามิ วิภงฺคโกวิทฯ
กติ อาปายิกา วุตฺตา, พุทฺเธนาทิจฺจพนฺธุนา;
วินยํ ปฏิชานนฺตสฺส, วินยานิ [วิสยานิ (สี. สฺยา. เอวมุปริปิ)] สุโณม เตฯ
ฉอูนทิยฑฺฒสตา วุตฺตา, พุทฺเธนาทิจฺจพนฺธุนา;
อาปายิกา เนรยิกา, กปฺปฏฺฐา สงฺฆเภทกา;
วินยํ ปฏิชานนฺตสฺส, วินยานิ สุโณหิ เมฯ
กติ นาปายิกา วุตฺตา, พุทฺเธนาทิจฺจพนฺธุนา;
วินยํ ปฏิชานนฺตสฺส, วินยานิ สุโณม เตฯ
อฏฺฐารส นาปายิกา วุตฺตา, พุทฺเธนาทิจฺจพนฺธุนา;
วินยํ ปฏิชานนฺตสฺส, วินยานิ สุโณหิ เมฯ
กติ อฏฺฐกา วุตฺตา, พุทฺเธนาทิจฺจพนฺธุนา;
วินยํ ปฏิชานนฺตสฺส, วินยานิ สุโณม เตฯ
อฏฺฐารส อฏฺฐกา วุตฺตา, พุทฺเธนาทิจฺจพนฺธุนา;
วินยํ ปฏิชานนฺตสฺส, วินยานิ สุโณหิ เมฯ
5. โสฬสกมฺมาทิ
[478]
กติ กมฺมานิ วุตฺตานิ, พุทฺเธนาทิจฺจพนฺธุนา;
วินยํ ปฏิชานนฺตสฺส, วินยานิ สุโณม เตฯ