กุลทูสกสฺส ภิกฺขุโน ยาวตติยํ สมนุภาสนาย น ปฏินิสฺสชฺชนฺตสฺส สงฺฆาทิเสโส กติหิ สมุฏฺฐาเนหิ สมุฏฺฐาติ? กุลทูสกสฺส ภิกฺขุโน ยาวตติยํ สมนุภาสนาย น ปฏินิสฺสชฺชนฺตสฺส สงฺฆาทิเสโส เอเกน สมุฏฺฐาเนน สมุฏฺฐาติ – กายโต จ วาจโต จ จิตฺตโต จ สมุฏฺฐาติฯ

เตรส สงฺฆาทิเสสา นิฏฺฐิตาฯ

[472] …เป.… อนาทริยํ ปฏิจฺจ อุทเก อุจฺจารํ วา ปสฺสาวํ วา เขฬํ วา กโรนฺตสฺส ทุกฺกฏํ กติหิ สมุฏฺฐาเนหิ สมุฏฺฐาติ? อนาทริยํ ปฏิจฺจ อุทเก อุจฺจารํ วา ปสฺสาวํ วา เขฬํ วา กโรนฺตสฺส ทุกฺกฏํ เอเกน สมุฏฺฐาเนน สมุฏฺฐาติ – กายโต จ จิตฺตโต จ สมุฏฺฐาติ, น วาจโตฯ

เสขิยา นิฏฺฐิตาฯ

3. ปาราชิกาทิ

[473] จตฺตาโร ปาราชิกา กติหิ สมุฏฺฐาเนหิ สมุฏฺฐนฺติ? จตฺตาโร ปาราชิกา ตีหิ สมุฏฺฐาเนหิ สมุฏฺฐนฺติ – สิยา กายโต จ จิตฺตโต จ สมุฏฺฐนฺติ, น วาจโต; สิยา วาจโต จ จิตฺตโต จ สมุฏฺฐนฺติ, น กายโต; สิยา กายโต จ วาจโต จ จิตฺตโต จ สมุฏฺฐนฺติฯ

เตรส สงฺฆาทิเสสา กติหิ สมุฏฺฐาเนหิ สมุฏฺฐนฺติ? เตรส สงฺฆาทิเสสา ฉหิ สมุฏฺฐาเนหิ สมุฏฺฐนฺติ – สิยา กายโต สมุฏฺฐนฺติ, น วาจโต น จิตฺตโต; สิยา วาจโต สมุฏฺฐนฺติ, น กายโต น จิตฺตโต; สิยา กายโต จ วาจโต น สมุฏฺฐนฺติ, น จิตฺตโต; สิยา กายโต จ จิตฺตโต จ สมุฏฺฐนฺติ, น วาจโต; สิยา วาจโต จ จิตฺตโต จ สมุฏฺฐนฺติ, น กายโต; สิยา กายโต จ วาจโต จ จิตฺตโต จ สมุฏฺฐนฺติฯ

ทฺเว อนิยตา กติหิ สมุฏฺฐาเนหิ สมุฏฺฐนฺติ? ทฺเว อนิยตา ตีหิ สมุฏฺฐาเนหิ สมุฏฺฐนฺติ – สิยา กายโต จ จิตฺตโต จ สมุฏฺฐนฺติ, น วาจโต; สิยา วาจโต จ จิตฺตโต จ สมุฏฺฐนฺติ, น กายโต; สิยา กายโต จ วาจโต จ จิตฺตโต จ สมุฏฺฐนฺติฯ

ติํส นิสฺสคฺคิยา ปาจิตฺติยา กติหิ สมุฏฺฐาเนหิ สมุฏฺฐนฺติ? ติํส นิสฺสคฺคิยา ปาจิตฺติยา ฉหิ สมุฏฺฐาเนหิ สมุฏฺฐนฺติ – สิยา กายโต สมุฏฺฐนฺติ, น วาจโต น จิตฺตโต; สิยา วาจโต สมุฏฺฐนฺติ, น กายโต น จิตฺตโต; สิยา กายโต จ วาจโต จ สมุฏฺฐนฺติ, น จิตฺตโต; สิยา กายโต จ จิตฺตโต จ สมุฏฺฐนฺติ, น วาจโต; สิยา วาจโต จ จิตฺตโต จ สมุฏฺฐนฺติ, น กายโต; สิยา กายโต จ วาจโต จ จิตฺตโต จ สมุฏฺฐนฺติฯ

ทฺเวนวุติ ปาจิตฺติยา กติหิ สมุฏฺฐาเนหิ สมุฏฺฐนฺติ? ทฺเวนวุติ ปาจิตฺติยา ฉหิ สมุฏฺฐาเนหิ สมุฏฺฐนฺติ – สิยา กายโต สมุฏฺฐนฺติ, น วาจโต น จิตฺตโต; สิยา วาจโต สมุฏฺฐนฺติ, น กายโต น จิตฺตโต; สิยา กายโต จ วาจโต จ สมุฏฺฐนฺติ, น จิตฺตโต; สิยา กายโต จ จิตฺตโต จ สมุฏฺฐนฺติ น วาจโต; สิยา วาจโต จ จิตฺตโต จ สมุฏฺฐนฺติ, น กายโต; สิยา กายโต จ วาจโต จ จิตฺตโต จ สมุฏฺฐนฺติฯ

จตฺตาโร ปาฏิเทสนียา กติหิ สมุฏฺฐาเนหิ สมุฏฺฐนฺติ? จตฺตาโร ปาฏิเทสนียา จตูหิ สมุฏฺฐาเนหิ สมุฏฺฐนฺติ – สิยา กายโต สมุฏฺฐนฺติ, น วาจโต น จิตฺตโต; สิยา กายโต จ วาจโต จ สมุฏฺฐนฺติ, น จิตฺตโต; สิยา กายโต จ จิตฺตโต จ สมุฏฺฐนฺติ, น วาจโต; สิยา กายโต จ วาจโต จ จิตฺตโต จ สมุฏฺฐนฺติฯ

ปญฺจสตฺตติ เสขิยา กติหิ สมุฏฺฐาเนหิ สมุฏฺฐนฺติ? ปญฺจสตฺตติ เสขิยา ตีหิ สมุฏฺฐาเนหิ สมุฏฺฐนฺติ – สิยา กายโต จ จิตฺตโต จ สมุฏฺฐนฺติ, น วาจโต; สิยา วาจโต จ จิตฺตโต จ สมุฏฺฐนฺติ, น กายโต; สิยา กายโต จ วาจโต จ จิตฺตโต จ สมุฏฺฐนฺติฯ

สมุฏฺฐานํ นิฏฺฐิตํฯ

ตสฺสุทฺทานํ –

อจิตฺตกุสลา เจว, สมุฏฺฐานญฺจ สพฺพถา;

ยถาธมฺเมน ญาเยน, สมุฏฺฐานํ วิชานถาติฯ

ทุติยคาถาสงฺคณิกํ

1. กายิกาทิอาปตฺติ

[474] กติ อาปตฺติโย กายิกา, กติ วาจสิกา กตาฯ

ฉาเทนฺตสฺส กติ อาปตฺติโย, กติ สํสคฺคปจฺจยาฯ

ฉาปตฺติโย กายิกา, ฉ วาจสิกา กตา;

ฉาเทนฺตสฺส ติสฺโส อาปตฺติโย, ปญฺจ สํสคฺคปจฺจยาฯ

อรุณุคฺเค กติ อาปตฺติโย, กติ ยาวตติยกา;

กเตตฺถ อฏฺฐ วตฺถุกา, กติหิ สพฺพสงฺคโหฯ

อรุณุคฺเค ติสฺโส อาปตฺติโย, ทฺเว ยาวตติยกา;

เอเกตฺถ อฏฺฐ วตฺถุกา, เอเกน สพฺพสงฺคโหฯ

วินยสฺส กติ มูลานิ, ยานิ พุทฺเธน ปญฺญตฺตา;

วินยครุกา กติ วุตฺตา, ทุฏฺฐุลฺลจฺฉาทนา กติฯ

วินยสฺส ทฺเว มูลานิ, ยานิ พุทฺเธน ปญฺญตฺตา;

วินยครุกา ทฺเว วุตฺตา, ทฺเว ทุฏฺฐุลฺลจฺฉาทนาฯ

คามนฺตเร กติ อาปตฺติโย, กติ นทิปารปจฺจยา;

กติมํเสสุ ถุลฺลจฺจยํ, กติมํเสสุ ทุกฺกฏํฯ

คามนฺตเร จตสฺโส อาปตฺติโย, จตสฺโส นทิปารปจฺจยา;

เอกมํเส ถุลฺลจฺจยํ, นวมํเสสุ ทุกฺกฏํฯ

กติ วาจสิกา รตฺติํ, กติ วาจสิกา ทิวา;

ททมานสฺส กติ อาปตฺติโย, ปฏิคฺคณฺหนฺตสฺส กิตฺตกาฯ

ทฺเว วาจสิกา รตฺติํ, ทฺเว วาจสิกา ทิวา;

ททมานสฺส ติสฺโส อาปตฺติโย, จตฺตาโร จ ปฏิคฺคเหฯ

2. เทสนาคามินิยาทิอาปตฺติ

[475]

กติ เทสนาคามินิโย, กติ สปฺปฏิกมฺมา กตา;

กเตตฺถ อปฺปฏิกมฺมา วุตฺตา, พุทฺเธนาทิจฺจพนฺธุนาฯ