เมนู

เย สกฺเกสุ ปญฺญตฺตา, เต สุโณหิ ยถาตถํ;

เอฬกโลมานิ ปตฺโต จ, โอวาโท เจว เภสชฺชํฯ

สูจิ อารญฺญิโก เจว, อฏฺเฐเต [ฉ เอเต (สพฺพตฺถ)] กาปิลวตฺถเว;

อุทกสุทฺธิยา โอวาโท, ภิกฺขุนีสุ ปวุจฺจนฺติฯ

เย ภคฺเคสุ ปญฺญตฺตา, เต สุโณหิ ยถาตถํ;

สมาทหิตฺวา วิสิพฺเพนฺติ, สามิเสน สสิตฺถกํฯ

ปาราชิกานิ จตฺตาริ, สงฺฆาทิเสสานิ ภวนฺติ;

สตฺต จ นิสฺสคฺคิยานิ, อฏฺฐ ทฺวตฺติํส ขุทฺทกาฯ

ทฺเว คารยฺหา ตโย เสกฺขา, ฉปฺปญฺญาส สิกฺขาปทา;

ฉสุ นคเรสุ ปญฺญตฺตา, พุทฺเธนาทิจฺจพนฺธุนาฯ

ฉอูน ตีณิสตานิ, สพฺเพ สาวตฺถิยํ กตา;

การุณิเกน พุทฺเธน, โคตเมน ยสสฺสินาฯ

2. จตุวิปตฺติํ

[336]

ยํ ตํ [ยํ ยํ (ก.)] ปุจฺฉิมฺห อกิตฺตยิ โน;

ตํ ตํ พฺยากตํ อนญฺญถา;

อญฺญํ ตํ ปุจฺฉามิ ตทิงฺฆ พฺรูหิ;

ครุก ลหุกญฺจาปิ สาวเสสํ;

อนวเสสํ ทุฏฺฐุลฺลญฺจ อทุฏฺฐุลฺลํ;

เย จ ยาวตติยกาฯ

สาธารณํ อสาธารณํ;

วิภตฺติโย จ [วิปตฺติโย จ (สี. สฺยา.)] เยหิ สมเถหิ สมฺมนฺติ;

สพฺพานิเปตานิ วิยากโรหิ;

หนฺท วากฺยํ สุโณม เตฯ

เอกติํสา เย ครุกา, อฏฺเฐตฺถ อนวเสสา;

เย ครุกา เต ทุฏฺฐุลฺลา, เย ทุฏฺฐุลฺลา สา สีลวิปตฺติ;

ปาราชิกํ สงฺฆาทิเสโส, ‘‘สีลวิปตฺตี’’ติ วุจฺจติฯ

ถุลฺลจฺจยํ ปาจิตฺติยา, ปาฏิเทสนียํ ทุกฺกฏํ;

ทุพฺภาสิตํ โย จายํ, อกฺโกสติ หสาธิปฺปาโย;

อยํ สา อาจารวิปตฺติสมฺมตาฯ

วิปรีตทิฏฺฐิํ คณฺหนฺติ, อสทฺธมฺเมหิ ปุรกฺขตา;

อพฺภาจิกฺขนฺติ สมฺพุทฺธํ, ทุปฺปญฺญา โมหปารุตา;

อยํ สา ทิฏฺฐิวิปตฺติสมฺมตาฯ

อาชีวเหตุ อาชีวการณา ปาปิจฺโฉ อิจฺฉาปกโต อสนฺตํ อภูตํ อุตฺตริมนุสฺสธมฺมํ อุลฺลปติ, อาชีวเหตุ อาชีวการณา สญฺจริตฺตํ สมาปชฺชติ, อาชีวเหตุ อาชีวการณา – ‘‘โย เต วิหาเร วสติ, โส ภิกฺขุ อรหา’’ติ ภณติ, อาชีวเหตุ อาชีวการณา ภิกฺขุ ปณีตโภชนานิ อตฺตโน อตฺถาย วิญฺญาเปตฺวา ภุญฺชติ, อาชีวเหตุ อาชีวการณา ภิกฺขุนี ปณีตโภชนานิ อตฺตโน อตฺถาย วิญฺญาเปตฺวา ภุญฺชติ, อาชีวเหตุ อาชีวการณา สูปํ วา โอทนํ วา อคิลาโน อตฺตโน อตฺถาย วิญฺญาเปตฺวา ภุญฺชติฯ อยํ สา อาชีววิปตฺติ สมฺมตาฯ

เอกาทส ยาวตติยกา, เต สุโณหิ ยถาตถํ;

อุกฺขิตฺตานุวตฺติกา, อฏฺฐ ยาวตติยกา;

อริฏฺโฐ จณฺฑกาฬี จ, อิเม เต ยาวตติยกาฯ

3. เฉทนกาทิ

[337] กติ เฉทนกานิ? กติ เภทนกานิ? กติ อุทฺทาลนกานิ? กติ อนญฺญปาจิตฺติยานิ? กติ ภิกฺขุสมฺมุติโย? กติ สามีจิโย? กติ ปรมานิ?

กติ ชานนฺติ ปญฺญตฺตา, พุทฺเธนาทิจฺจพนฺธุนาฯ

ฉ เฉทนกานิฯ เอกํ เภทนกํฯ เอกํ อุทฺทาลนกํฯ จตฺตาริ อนญฺญปาจิตฺติยานิฯ จตสฺโส ภิกฺขุสมฺมุติโยฯ สตฺต สามีจิโยฯ จุทฺทส ปรมานิฯ

โสทส [โสฬส (สี. สฺยา.) อฏฺฐกถา โอโลเกตพฺพา] ชานนฺติ ปญฺญตฺตา, พุทฺเธนาทิจฺจพนฺธุนาฯ