สนฺถติ ขลุ ปจฺฉาปิ, ปตฺตปิณฺฑิกเมว จ;

อุโปสถํ ปวารณํ, อาปตฺตานาปตฺติปิ จฯ

กณฺหสุกฺกปทา เอเต, ภิกฺขุนีนมฺปิ เต ตถา;

อปาสาทิกปาสาทิ, ตเถว อปเร ทุเวฯ

กุลูปเก อติเวลํ, พีชํ สมณกปฺปิ จ;

วิสุทฺธิ อปเร เจว, วินยาธมฺมิเกน จ;

ธมฺมิกา จ ตถา วุตฺตา, นิฏฺฐิตา สุทฺธิปญฺจกาติฯ

6. ฉกฺกวาโร

[326] [ที. นิ. 3.324] ฉ อคารวาฯ ฉ คารวาฯ ฉ วินีตวตฺถูนิฯ ฉ สามีจิโยฯ ฉ อาปตฺติสมุฏฺฐานาฯ ฉจฺเฉทนกา อาปตฺติโยฯ ฉหากาเรหิ อาปตฺติํ อาปชฺชติฯ ฉานิสํสา วินยธเรฯ ฉ ปรมานิฯ ฉารตฺตํ ติจีวเรน วิปฺปวสิตพฺพํฯ ฉ จีวรานิ ฯ ฉ รชนานิฯ ฉ อาปตฺติโย กายโต จ จิตฺตโต จ สมุฏฺฐนฺติ น วาจโตฯ ฉ อาปตฺติโย วาจโต จ จิตฺตโต จ สมุฏฺฐนฺติ น กายโตฯ ฉ อาปตฺติโย กายโต จ วาจโต จ จิตฺตโต จ สมุฏฺฐนฺติฯ ฉ กมฺมานิฯ ฉ วิวาทมูลานิฯ ฉ อนุวาทมูลานิฯ ฉ สารณียา ธมฺมา ทีฆโสฯ ฉ วิทตฺถิโย, สุคตวิทตฺถิยา, ติริยํ ฉ วิทตฺถิโยฯ ฉ นิสฺสยปฏิปฺปสฺสทฺธิโย อาจริยมฺหาฯ ฉ นหาเน อนุปญฺญตฺติโย – วิปฺปกตจีวรํ อาทาย ปกฺกมติ, วิปฺปกตจีวรํ สมาทาย ปกฺกมติฯ

[มหาว. 85 อาทโย] ฉหงฺเคหิ สมนฺนาคเตน ภิกฺขุนา อุปสมฺปาเทตพฺพํ นิสฺสโย ทาตพฺโพ สามเณโร อุปฏฺฐาเปตพฺโพ – อเสกฺเขน สีลกฺขนฺเธน สมนฺนาคโต โหติ, อเสกฺเขน สมาธิกฺขนฺเธน สมนฺนาคโต โหติ, อเสกฺเขน ปญฺญกฺขนฺเธน สมนฺนาคโต โหติ, อเสกฺเขน วิมุตฺติกฺขนฺเธน สมนฺนาคโต โหติ, อเสกฺเขน วิมุตฺติญาณทสฺสนกฺขนฺเธน สมนฺนาคโต โหติ, ทสวสฺโส วา โหติ อติเรกทสวสฺโส วาฯ

อปเรหิปิ ฉหงฺเคหิ สมนฺนาคเตน ภิกฺขุนา อุปสมฺปาเทตพฺพํ นิสฺสโย ทาตพฺโพ สามเณโร อุปฏฺฐาเปตพฺโพ – อตฺตนา อเสกฺเขน สีลกฺขนฺเธ สมนฺนาคโต โหติ, ปรํ อเสกฺเข สีลกฺขนฺเธ สมาทเปตา; อตฺตนา อเสกฺเขน สมาธิกฺขนฺเธน สมนฺนาคโต โหติ, ปรํ อเสกฺเข สมาธิกฺขนฺเธ สมาทเปตา; อตฺตนา อเสกฺเขน ปญฺญกฺขนฺเธน สมนฺนาคโต โหติ, ปรํ อเสกฺเข ปญฺญกฺขนฺเธ สมาทเปตา; อตฺตนา อเสกฺเขน วิมุตฺติกฺขนฺเธน สมนฺนาคโต โหติ, ปรํ อเสกฺเข วิมุตฺติกฺขนฺเธ สมาทเปตา; อตฺตนา อเสกฺเขน วิมุตฺติญาณทสฺสนกฺขนฺเธน สมนฺนาคโต โหติ, ปรํ อเสกฺเข วิมุตฺติญาณทสฺสนกฺขนฺเธ สมาทเปตา; ทสวสฺโส วา โหติ อติเรกทสวสฺโส วาฯ

อปเรหิปิ ฉหงฺเคหิ สมนฺนาคเตน ภิกฺขุนา อุปสมฺปาเทตพฺพํ นิสฺสโย ทาตพฺโพ สามเณโร อุปฏฺฐาเปตพฺโพ – สทฺโธ โหติ, หิริมา โหติ, โอตฺตปฺปี โหติ, อารทฺธวีริโย โหติ , อุปฏฺฐิตสฺสติ โหติ, ทสวสฺโส วา โหติ อติเรกทสวสฺโส วาฯ

อปเรหิปิ ฉหงฺเคหิ สมนฺนาคเตน ภิกฺขุนา อุปสมฺปาเทตพฺพํ นิสฺสโย ทาตพฺโพ สามเณโร อุปฏฺฐาเปตพฺโพ – น อธิสีเล สีลวิปนฺโน โหติ, น อชฺฌาจาเร อาจารวิปนฺโน โหติ, น อติทิฏฺฐิยา ทิฏฺฐิวิปนฺโน โหติ, พหุสฺสุโต โหติ, ปญฺญวา โหติ, ทสวสฺโส วา โหติ อติเรกทสวสฺโส วาฯ

อปเรหิปิ ฉหงฺเคหิ สมนฺนาคเตน ภิกฺขุนา อุปสมฺปาเทตพฺพํ นิสฺสโย ทาตพฺโพ สามเณโร อุปฏฺฐาเปตพฺโพ – ปฏิพโล โหติ อนฺเตวาสิํ วา สทฺธิวิหาริํ วา คิลานํ อุปฏฺฐาตุํ วา อุปฏฺฐาเปตุํ วา, อนภิรตํ วูปกาเสตุํ วา วูปกาสาเปตุํ วา [อนภิรติํ (ก.)], อุปฺปนฺนํ กุกฺกุจฺจํ ธมฺมโต วิโนเทตุํ [วิโนเทตุํ วา วิโนทาเปตุํ วา (สฺยา.) มหาว. 85], อาปตฺติํ ชานาติ, อาปตฺติวุฏฺฐานํ ชานาติ, ทสวสฺโส วา โหติ อติเรกทสวสฺโส วาฯ

อปเรหิปิ ฉหงฺเคหิ สมนฺนาคเตน ภิกฺขุนา อุปสมฺปาเทตพฺพํ นิสฺสโย ทาตพฺโพ สามเณโร อุปฏฺฐาเปตพฺโพ – ปฏิพโล โหติ อนฺเตวาสิํ วา สทฺธิวิหาริํ วา อาภิสมาจาริกาย สิกฺขาย สิกฺขาเปตุํ, อาทิพฺรหฺมจาริยกาย สิกฺขาย วิเนตุํ, อภิธมฺเม วิเนตุํ, อภิวินเย วิเนตุํ, อุปฺปนฺนํ ทิฏฺฐิคตํ ธมฺมโต วิเวเจตุํ, ทสวสฺโส วา โหติ อติเรกทสวสฺโส วาฯ

อปเรหิปิ ฉหงฺเคหิ สมนฺนาคเตน ภิกฺขุนา อุปสมฺปาเทตพฺพํ นิสฺสโย ทาตพฺโพ สามเณโร อุปฏฺฐาเปตพฺโพ – อาปตฺติํ ชานาติ, อนาปตฺติํ ชานาติ, ลหุกํ อาปตฺติํ ชานาติ, ครุกํ อาปตฺติํ ชานาติ, อุภยานิ โข ปนสฺส ปาติโมกฺขานิ วิตฺถาเรน สฺวาคตานิ โหนฺติ สุวิภตฺตานิ สุปฺปวตฺตีนิ สุวินิจฺฉิตานิ สุตฺตโส อนุพฺยญฺชนโส, ทสวสฺโส วา โหติ อติเรกทสวสฺโส วาฯ

ฉ อธมฺมิกานิ ปาติโมกฺขฏฺฐปนานิ, ฉ ธมฺมิกานิ ปาติโมกฺขฏฺฐปนานีติฯ

ฉกฺกํ นิฏฺฐิตํฯ

ตสฺสุทฺทานํ –

อคารวา คารวา จ, วินีตา สามีจิปิ จ;

สมุฏฺฐานา เฉทนา เจว, อาการานิสํเสน จฯ

ปรมานิ จ ฉารตฺตํ, จีวรํ รชนานิ จ;

กายโต จิตฺตโต จาปิ, วาจโต จิตฺตโตปิ จฯ

กายวาจาจิตฺตโต จ, กมฺมวิวาทเมว จ;

อนุวาทา ทีฆโส จ, ติริยํ นิสฺสเยน จฯ

อนุปญฺญตฺติ อาทาย, สมาทาย ตเถว จ;

อเสกฺเข สมาทเปตา, สทฺโธ อธิสีเลน จ;

คิลานาภิสมาจารี, อาปตฺตาธมฺมธมฺมิกาติฯ

7. สตฺตกวาโร

[327] สตฺตาปตฺติโย ฯ สตฺตาปตฺติกฺขนฺธาฯ สตฺต วินีตวตฺถูนิฯ สตฺต สามีจิโยฯ สตฺต อธมฺมิกา ปฏิญฺญาตกรณาฯ สตฺต ธมฺมิกา ปฏิญฺญาตกรณาฯ สตฺตนฺนํ อนาปตฺติ สตฺตาหกรณีเยน คนฺตุํฯ สตฺตานิสํสา วินยธเรฯ สตฺต ปรมานิ ฯ สตฺตเม อรุณุคฺคมเน นิสฺสคฺคิยํ โหติฯ สตฺต สมถาฯ สตฺต กมฺมานิฯ สตฺต อามกธญฺญานิฯ ติริยํ สตฺตนฺตราฯ คณโภชเน สตฺต อนุปญฺญตฺติโยฯ เภสชฺชานิ ปฏิคฺคเหตฺวา สตฺตาหปรมํ สนฺนิธิการกํ ปริภุญฺชิตพฺพานิฯ กตจีวรํ อาทาย ปกฺกมติฯ กตจีวรํ สมาทาย ปกฺกมติฯ ภิกฺขุสฺส น โหติ อาปตฺติ ทฏฺฐพฺพาฯ ภิกฺขุสฺส โหติ อาปตฺติ ทฏฺฐพฺพาฯ ภิกฺขุสฺส โหติ อาปตฺติ ทฏฺฐพฺพา [ปฏิกาตพฺพา (สพฺพตฺถ) อฏฺฐกถา จ จมฺเปยฺยกฺขนฺธเก อธมฺมกมฺมาทิกถา จ โอโลเกตพฺพา]ฯ สตฺต อธมฺมิกานิ ปาติโมกฺขฏฺฐปนานิฯ สตฺต ธมฺมิกานิ ปาติโมกฺขฏฺฐปนานิฯ

[อ. นิ. 7.75] สตฺตหงฺเคหิ สมนฺนาคโต ภิกฺขุ วินยธโร โหติ – อาปตฺติํ ชานาติ, อนาปตฺติํ ชานาติ, ลหุกํ อาปตฺติํ ชานาติ, ครุกํ อาปตฺติํ ชานาติ, สีลวา โหติ, ปาติโมกฺขสํวรสํวุโต วิหรติ อาจารโคจรสมฺปนฺโน อณุมตฺเตสุ วชฺเชสุ ภยทสฺสาวี สมาทาย สิกฺขติ สิกฺขาปเทสุ, จตุนฺนํ ฌานานํ อาภิเจตสิกานํ ทิฏฺฐธมฺมสุขวิหารานํ นิกามลาภี โหติ อกิจฺฉลาภี อกสิรลาภี, อาสวานญฺจ ขยา อนาสวํ เจโตวิมุตฺติํ ปญฺญาวิมุตฺติํ ทิฏฺเฐว ธมฺเม สยํ อภิญฺญา สจฺฉิกตฺวา อุปสมฺปชฺช วิหรติฯ

อปเรหิปิ สตฺตหงฺเคหิ สมนฺนาคโต ภิกฺขุ วินยธโร โหติ – อาปตฺติํ ชานาติ, อนาปตฺติํ ชานาติ, ลหุกํ อาปตฺติํ ชานาติ, ครุกํ อาปตฺติํ ชานาติ, พหุสฺสุโต โหติ สุตธโร สุตสนฺนิจโย เย เต ธมฺมา อาทิกลฺยาณา มชฺเฌกลฺยาณา ปริโยสานกลฺยาณา สาตฺถํ สพฺยญฺชนํ เกวลปริปุณฺณํ ปริสุทฺธํ พฺรหฺมจริยํ อภิวทนฺติ ตถารูปสฺส ธมฺมา พหุสฺสุตา โหนฺติ ธาตา [ธตา (สี. สฺยา.)] วจสา ปริจิตา มนสานุเปกฺขิตา ทิฏฺฐิยา สุปฺปฏิวิทฺธา, จตุนฺนํ ฌานานํ อาภิเจตสิกานํ ทิฏฺฐธมฺมสุขวิหารานํ นิกามลาภี โหติ อกิจฺฉลาภี อกสิรลาภี, อาสวานญฺจ ขยา อนาสวํ เจโตวิมุตฺติํ ปญฺญาวิมุตฺติํ ทิฏฺเฐว ธมฺเม สยํ อภิญฺญา สจฺฉิกตฺวา อุปสมฺปชฺช วิหรติฯ