เมนู

12. วินยวาโร

[302] วินโย สมฺมุขาวินโย, สมฺมุขาวินโย วินโย? วินโย เยภุยฺยสิกา, เยภุยฺยสิกา วินโย? วินโย สติวินโย, สติวินโย วินโย? วินโย อมูฬฺหวินโย, อมูฬฺหวินโย วินโย? วินโย ปฏิญฺญาตกรณํ, ปฏิญฺญาตกรณํ วินโย? วินโย ตสฺสปาปิยสิกา, ตสฺสปาปิยสิกา วินโย? วินโย ติณวตฺถารโก, ติณวตฺถารโก วินโย?

วินโย สิยา สมฺมุขาวินโย สิยา น สมฺมุขาวินโยฯ สมฺมุขาวินโย วินโย เจว สมฺมุขาวินโย จฯ

วินโย สิยา เยภุยฺยสิกา, สิยา น เยภุยฺยสิกาฯ เยภุยฺยสิกา วินโย เจว เยภุยฺยสิกา จฯ

วินโย สิยา สติวินโย, สิยา น สติวินโยฯ สติวินโย วินโย เจว สติวินโย จฯ

วินโย สิยา อมูฬฺหวินโย, สิยา น อมูฬฺหวินโยฯ อมูฬฺหวินโย วินโย เจว อมูฬฺหวินโย จ

วินโย สิยา ปฏิญฺญาตกรณํ, สิยา น ปฏิญฺญาตกรณํฯ ปฏิญฺญาตกรณํ วินโย เจว ปฏิญฺญาตกรณญฺจฯ

วินโย สิยา ตสฺสปาปิยสิกา, สิยา น ตสฺสปาปิยสิกาฯ ตสฺสปาปิยสิกา วินโย เจว ตสฺสปาปิยสิกา จฯ

วินโย สิยา ติณวตฺถารโก, สิยา น ติณวตฺถารโกฯ ติณวตฺถารโก วินโย เจว ติณวตฺถารโก จฯ

วินยวาโร นิฏฺฐิโต ทฺวาทสโมฯ

13. กุสลวาโร

[303] สมฺมุขาวินโย กุสโล อกุสโล อพฺยากโต? เยภุยฺยสิกา กุสลา อกุสลา อพฺยากตา? สติวินโย กุสโล อกุสโล อพฺยากโต? อมูฬฺหวินโย กุสโล อกุสโล อพฺยากโต? ปฏิญฺญาตกรณํ กุสลํ อกุสลํ อพฺยากตํ? ตสฺสปาปิยสิกา กุสลา อกุสลา อพฺยากตา? ติณวตฺถารโก กุสโล อกุสโล อพฺยากโต?

สมฺมุขาวินโย สิยา กุสโล, สิยา อพฺยากโตฯ นตฺถิ สมฺมุขาวินโย อกุสโลฯ

เยภุยฺยสิกา สิยา กุสลา, สิยา อกุสลา, สิยา อพฺยากตาฯ

สติวินโย สิยา กุสโล, สิยา อกุสโล, สิยา อพฺยากโตฯ

อมูฬฺหวินโย สิยา กุสโล, สิยา อกุสโล, สิยา อพฺยากโตฯ

ปฏิญฺญาตกรณํ สิยา กุสลํ, สิยา อกุสลํ, สิยา อพฺยากตํฯ

ตสฺสปาปิยสิกา สิยา กุสลา, สิยา อกุสลา สิยา อพฺยากตาฯ

ติณวตฺถารโก สิยา กุสโล, สิยา อกุสโล, สิยา อพฺยากโตฯ

วิวาทาธิกรณํ กุสลํ อกุสลํ อพฺยากตํฯ อนุวาทาธิกรณํ กุสลํ อกุสลํ อพฺยากตํฯ อาปตฺตาธิกรณํ กุสลํ อกุสลํ อพฺยากตํฯ กิจฺจาธิกรณํ กุสลํ อกุสลํ อพฺยากตํฯ

วิวาทาธิกรณํ สิยา กุสลํ, สิยา อกุสลํ, สิยา อพฺยากตํฯ

อนุวาทาธิกรณํ สิยา กุสลํ, สิยา อกุสลํ, สิยา อพฺยากตํฯ

อาปตฺตาธิกรณํ สิยา อกุสลํ, สิยา อพฺยากตํฯ นตฺถิ อาปตฺตาธิกรณํ กุสลํฯ

กิจฺจาธิกรณํ สิยา กุสลํ, สิยา อกุสลํ, สิยา อพฺยากตํฯ

กุสลวาโร นิฏฺฐิโต เตรสโมฯ