เมนู

ตโย สมถา อาปตฺตาธิกรณสฺส สาธารณา – สมฺมุขาวินโย, ปฏิญฺญาตกรณํ, ติณวตฺถารโกฯ จตฺตาโร สมถา อาปตฺตาธิกรณสฺส อสาธารณา – เยภุยฺยสิกา, สติวินโย, อมูฬฺหวินโย, ตสฺสปาปิยสิกา

เอโก สมโถ กิจฺจาธิกรณสฺส สาธารโณ – สมฺมุขาวินโยฯ ฉ สมถา กิจฺจาธิกรณสฺส อสาธารณา – เยภุยฺยสิกา, สติวินโย, อมูฬฺหวินโย, ปฏิญฺญาตกรณํ, ตสฺสปาปิยสิกา, ติณวตฺถารโกฯ

สาธารณวาโร นิฏฺฐิโต สตฺตโมฯ

8. ตพฺภาคิยวาโร

[298] กติ สมถา วิวาทาธิกรณสฺส ตพฺภาคิยา? กติ สมถา วิวาทาธิกรณสฺส อญฺญภาคิยา? กติ สมถา อนุวาทาธิกรณสฺส ตพฺภาคิยา? กติ สมถา อนุวาทาธิกรณสฺส อญฺญภาคิยา? กติ สมถา อาปตฺตาธิกรณสฺส ตพฺภาคิยา? กติ สมถา อาปตฺตาธิกรณสฺส อญฺญภาคิยา? กติ สมถา กิจฺจาธิกรณสฺส ตพฺภาคิยา? กติ สมถา กิจฺจาธิกรณสฺส อญฺญภาคิยา?

ทฺเว สมถา วิวาทาธิกรณสฺส ตพฺภาคิยา – สมฺมุขาวินโย, เยภุยฺยสิกาฯ ปญฺจ สมถา วิวาทาธิกรณสฺส อญฺญภาคิยา – สติวินโย, อมูฬฺหวินโย, ปฏิญฺญาตกรณํ, ตสฺสปาปิยสิกา, ติณวตฺถารโกฯ

จตฺตาโร สมถา อนุวาทาธิกรณสฺส ตพฺภาคิยา – สมฺมุขาวินโย, สติวินโย, อมูฬฺหวินโย, ตสฺสปาปิยสิกาฯ ตโย สมถา อนุวาทาธิกรณสฺส อญฺญภาคิยา – เยภุยฺยสิกา, ปฏิญฺญาตกรณํ, ติณวตฺถารโกฯ

ตโย สมถา อาปตฺตาธิกรณสฺส ตพฺภาคิยา – สมฺมุขาวินโย, ปฏิญฺญาตกรณํ, ติณวตฺถารโกฯ จตฺตาโร สมถา อาปตฺตาธิกรณสฺส อญฺญภาคิยา – เยภุยฺยสิกา, สติวินโย, อมูฬฺหวินโย, ตสฺสปาปิยสิกาฯ

เอโก สมโถ กิจฺจาธิกรณสฺส ตพฺภาคิโย – สมฺมุขาวินโยฯ ฉ สมถา กิจฺจาธิกรณสฺส อญฺญภาคิยา – เยภุยฺยสิกา, สติวินโย, อมูฬฺหวินโย, ปฏิญฺญาตกรณํ, ตสฺสปาปิยสิกา, ติณวตฺถารโกฯ

ตพฺภาคิยวาโร นิฏฺฐิโต อฏฺฐโมฯ

9. สมถา สมถสฺส สาธารณวาโร

[299] สมถา สมถสฺส สาธารณา, สมถา สมถสฺส อสาธารณาฯ สิยา สมถา สมถสฺส สาธารณา, สิยา สมถา สมถสฺส อสาธารณาฯ

กถํ สิยา สมถา สมถสฺส สาธารณา? กถํ สิยา สมถา สมถสฺส อสาธารณา? เยภุยฺยสิกา สมฺมุขาวินยสฺส สาธารณา, สติวินยสฺส อมูฬฺหวินยสฺส ปฏิญฺญาตกรณสฺส ตสฺสปาปิยสิกาย ติณวตฺถารกสฺส อสาธารณาฯ

สติวินโย สมฺมุขาวินยสฺส สาธารโณ, อมูฬฺหวินยสฺส ปฏิญฺญาตกรณสฺส ตสฺสปาปิยสิกาย ติณวตฺถารกสฺส เยภุยฺยสิกาย อสาธารโณฯ

อมูฬฺหวินโย สมฺมุขาวินยสฺส สาธารโณ, ปฏิญฺญาตกรณสฺส ตสฺสปาปิยสิกาย ติณวตฺถารกสฺส เยภุยฺยสิกาย สติวินยสฺส อสาธารโณฯ

ปฏิญฺญาตกรณํ สมฺมุขาวินยสฺส สาธารณํ, ตสฺสปาปิยสิกาย ติณวตฺถารกสฺส เยภุยฺยสิกาย สติวินยสฺส อมูฬฺหวินยสฺส อสาธารณํฯ

ตสฺสปาปิยสิกา สมฺมุขาวินยสฺส สาธารณา, ติณวตฺถารกสฺส เยภุยฺยสิกาย สติวินยสฺส อมูฬฺหวินยสฺส ปฏิญฺญาตกรณสฺส อสาธารณาฯ