เมนู

11. ภูตาโรจนสมุฏฺฐานํ

[268]

ภูตํ กาเยน ชายติ, น วาจา น จ จิตฺตโต;

วาจโต จ สมุฏฺฐาติ, น กายา น จ จิตฺตโตฯ

กายวาจาย ชายติ, น ตุ ชายติ จิตฺตโต;

ภูตาโรจนกา นาม, ตีหิ ฐาเนหิ ชายติฯ

ภูตาโรจนสมุฏฺฐานํ นิฏฺฐิตํฯ

12. โจริวุฏฺฐาปนสมุฏฺฐานํ

[269]

โจรี วาจาย จิตฺเตน, น ตํ ชายติ กายโต;

ชายติ ตีหิ ทฺวาเรหิ, โจริวุฏฺฐาปนํ อิทํ;

อกตํ ทฺวิสมุฏฺฐานํ, ธมฺมราเชน ภาสิตํ [ฐปิตํ (สฺยา.)]

โจริวุฏฺฐาปนสมุฏฺฐานํ นิฏฺฐิตํฯ

13. อนนุญฺญาตสมุฏฺฐานํ

[270]

อนนุญฺญาตํ วาจาย, น กายา น จ จิตฺตโต;

ชายติ กายวาจาย, น ตํ ชายติ จิตฺตโตฯ

ชายติ วาจาจิตฺเตน, น ตํ ชายติ กายโต;

ชายติ ตีหิ ทฺวาเรหิ, อกตํ จตุฐานิกํฯ

อนนุญฺญาตสมุฏฺฐานํ นิฏฺฐิตํฯ

สมุฏฺฐานญฺหิ สงฺเขปํ, ทส ตีณิ สุเทสิตํ;

อสมฺโมหกรํ ฐานํ, เนตฺติธมฺมานุโลมิกํ;

ธารยนฺโต อิมํ วิญฺญู, สมุฏฺฐาเน น มุยฺหตีติฯ

สมุฏฺฐานสีสสงฺเขโป นิฏฺฐิโตฯ

อนฺตรเปยฺยาลํ

กติปุจฺฉาวาโร

[271] กติ อาปตฺติโย? กติ อาปตฺติกฺขนฺธา? กติ วินีตวตฺถูนิ? กติ อคารวา? กติ คารวา? กติ วินีตวตฺถูนิ? กติ วิปตฺติโย? กติ อาปตฺติสมุฏฺฐานา? กติ วิวาทมูลานิ? กติ อนุวาทมูลานิ? กติ สารณียา ธมฺมา? กติ เภทกรวตฺถูนิ? กติ อธิกรณานิ? กติ สมถา?

ปญฺจ อาปตฺติโยฯ ปญฺจ อาปตฺติกฺขนฺธาฯ ปญฺจ วินีตวตฺถูนิฯ สตฺต อาปตฺติโยฯ สตฺต อาปตฺติกฺขนฺธาฯ สตฺต วินีตวตฺถูนิฯ ฉ อคารวาฯ ฉ คารวาฯ ฉ วินีตวตฺถูนิฯ จตสฺโส วิปตฺติโยฯ ฉ อาปตฺติสมุฏฺฐานาฯ ฉ วิวาทมูลานิฯ ฉ อนุวาทมูลานิฯ ฉ สารณียา ธมฺมาฯ อฏฺฐารส เภทกรวตฺถูนิฯ จตฺตาริ อธิกรณานิฯ สตฺต สมถาฯ

ตตฺถ กตมา ปญฺจ อาปตฺติโย? ปาราชิกาปตฺติ, สงฺฆาทิเสสาปตฺติ, ปาจิตฺติยาปตฺติ, ปาฏิเทสนียาปตฺติ, ทุกฺกฏาปตฺติ – อิมา ปญฺจ อาปตฺติโยฯ

ตตฺถ กตเม ปญฺจ อาปตฺติกฺขนฺธา? ปาราชิกาปตฺติกฺขนฺโธ, สงฺฆาทิเสสาปตฺติกฺขนฺโธ, ปาจิตฺติยาปตฺติกฺขนฺโธ, ปาฏิเทสนียาปตฺติกฺขนฺโธ, ทุกฺกฏาปตฺติกฺขนฺโธ – อิเม ปญฺจ อาปตฺติกฺขนฺธาฯ

ตตฺถ กตมานิ ปญฺจ วินีตวตฺถูนิ? ปญฺจหิ อาปตฺติกฺขนฺเธหิ อารติ วิรติ ปฏิวิรติ เวรมณี อกิริยา อกรณํ อนชฺฌาปตฺติ เวลาอนติกฺกโม เสตุฆาโต – อิมานิ ปญฺจ วินีตวตฺถูนิฯ

ตตฺถ กตมา สตฺต อาปตฺติโย? ปาราชิกาปตฺติ, สงฺฆาทิเสสาปตฺติ, ถุลฺลจฺจยาปตฺติ, ปาจิตฺติยาปตฺติ, ปาฏิเทสนียาปตฺติ, ทุกฺกฏาปตฺติ, ทุพฺภาสิตาปตฺติ – อิมา สตฺต อาปตฺติโยฯ

ตตฺถ กตเม สตฺต อาปตฺติกฺขนฺธา? ปาราชิกาปตฺติกฺขนฺโธ, สงฺฆาทิเสสาปตฺติกฺขนฺโธ, ถุลฺลจฺจยาปตฺติกฺขนฺโธ, ปาจิตฺติยาปตฺติกฺขนฺโธ, ปาฏิเทสนียาปตฺติกฺขนฺโธ, ทุกฺกฏาปตฺติกฺขนฺโธ, ทุพฺภาสิตาปตฺติกฺขนฺโธ – อิเม สตฺต อาปตฺติกฺขนฺธาฯ