6. เอฬกโลมสมุฏฺฐานํ
[263]
เอฬกโลมา ทฺเว เสยฺยา, อาหจฺจ ปิณฺฑโภชนํ;
คณวิกาลสนฺนิธิ, ทนฺตโปเนน เจลกาฯ
อุยฺยุตฺตํ เสนํ [อุยฺยุตฺตํ วเส (สฺยา.)] อุยฺโยธิ, สุรา โอเรน นฺหายนา;
ทุพฺพณฺเณ ทฺเว เทสนิกา, ลสุณุปติฏฺเฐ นจฺจนาฯ
นฺหานมตฺถรณํ เสยฺยา, อนฺโตรฏฺเฐ ตถา พหิ;
อนฺโตวสฺสํ จิตฺตาคารํ, อาสนฺทิ สุตฺตกนฺตนาฯ
เวยฺยาวจฺจํ สหตฺถา จ, อภิกฺขุกาวาเสน จ;
ฉตฺตํ ยานญฺจ สงฺฆาณิํ, อลงฺการํ คนฺธวาสิตํฯ
ภิกฺขุนี สิกฺขมานา จ, สามเณรี คิหินิยา;
อสํกจฺจิกา อาปตฺติ, จตฺตารีสา จตุตฺตริฯ
กาเยน น วาจาจิตฺเตน, กายจิตฺเตน น วาจโต;
ทฺวิสมุฏฺฐานิกา สพฺเพ, สมา เอฬกโลมิกาติฯ
เอฬกโลมสมุฏฺฐานํ นิฏฺฐิตํฯ
7. ปทโสธมฺมสมุฏฺฐานํ
[264]
ปทญฺญตฺร อสมฺมตา, ตถา อตฺถงฺคเตน จ;
ติรจฺฉานวิชฺชา ทฺเว วุตฺตา, อโนกาโส [อโนกาเส (สี. สฺยา.)] จ ปุจฺฉนาฯ
สตฺต สิกฺขาปทา เอเต, วาจา น กายจิตฺตโต [กายจิตฺตกา (ก.)];
วาจาจิตฺเตน ชายนฺติ, น ตุ กาเยน ชายเรฯ
ทฺวิสมุฏฺฐานิกา สพฺเพ, ปทโสธมฺมสทิสาฯ
ปทโสธมฺมสมุฏฺฐานํ นิฏฺฐิตํฯ
8. อทฺธานสมุฏฺฐานํ
[265]
อทฺธานนาวํ ปณีตํ, มาตุคาเมน สํหเร;
ธญฺญํ นิมนฺติตา เจว, อฏฺฐ จ ปาฏิเทสนีฯ
สิกฺขา ปนฺนรส เอเต, กายา น วาจา น มนา;
กายวาจาหิ ชายนฺติ, น เต จิตฺเตน ชายเรฯ
กายจิตฺเตน ชายนฺติ, น เต ชายนฺติ วาจโต;
กายวาจาหิ จิตฺเตน, สมุฏฺฐานา จตุพฺพิธาฯ
ปญฺญตฺตา พุทฺธญาเณน, อทฺธาเนน สหา สมา [สมานยา (สฺยา.)]ฯ
อทฺธานสมุฏฺฐานํ นิฏฺฐิตํฯ
9. เถยฺยสตฺถสมุฏฺฐานํ
[266]
เถยฺยสตฺถํ อุปสฺสุติ, สูปวิญฺญาปเนน จ;
รตฺติฉนฺนญฺจ โอกาสํ, เอเต พฺยูเหน สตฺตมาฯ
กายจิตฺเตน ชายนฺติ, น เต ชายนฺติ วาจโต;
ตีหิ ทฺวาเรหิ ชายนฺติ, ทฺวิสมุฏฺฐานิกา อิเมฯ
เถยฺยสตฺถสมุฏฺฐานา, เทสิตาทิจฺจพนฺธุนาฯ
เถยฺยสตฺถสมุฏฺฐานํ นิฏฺฐิตํฯ
10. ธมฺมเทสนาสมุฏฺฐานํ
[267]
ฉตฺตปาณิสฺส สทฺธมฺมํ, น เทเสนฺติ ตถาคตา;
เอวเมว [ตเถว (สี. สฺยา.)] ทณฺฑปาณิสฺส, สตฺถอาวุธปาณินํฯ
ปาทุกุปาหนา ยานํ, เสยฺยปลฺลตฺถิกาย จ;
เวฐิโตคุณฺฐิโต เจว, เอกาทสมนูนกาฯ
วาจาจิตฺเตน ชายนฺติ, น เต ชายนฺติ กายโต;
สพฺเพ เอกสมุฏฺฐานา, สมกา ธมฺมเทสเนฯ
ธมฺมเทสนาสมุฏฺฐานํ นิฏฺฐิตํฯ