[134] (ก) ปคฺคาโห จฯ

(ข) อวิกฺเขโป จฯ

[135] (ก) สีลวิปตฺติ จฯ

(ข) ทิฏฺฐิวิปตฺติ จฯ

[136] (ก) สีลสมฺปทา จฯ

(ข) ทิฏฺฐิสมฺปทา จฯ

[137] (ก) สีลวิสุทฺธิ จฯ

(ข) ทิฏฺฐิวิสุทฺธิ จฯ

[138] (ก) ทิฏฺฐิวิสุทฺธิ โข ปนฯ

(ข) ยถาทิฏฺฐิสฺส จ ปธานํฯ

[139] (ก) สํเวโค จ สํเวชนิเยสุ ฐาเนสุฯ

(ข) สํวิคฺคสฺส จ โยนิโส ปธานํฯ

[140] (ก) อสนฺตุฏฺฐิตา จ กุสเลสุ ธมฺเมสุฯ

(ข) อปฺปฏิวานิตา จ ปธานสฺมิํฯ

[141] (ก) วิชฺชา จฯ

(ข) วิมุตฺติ จฯ

[142] (ก) ขเย ญาณํฯ

(ข) อนุปฺปาเท ญาณนฺติฯ

สุตฺตนฺติกทุกมาติกา [สุตฺตนฺตมาติกา (สฺยา.)]ฯ

มาติกา นิฏฺฐิตาฯ

1. จิตฺตุปฺปาทกณฺฑํ

กามาวจรกุสลํ

ปทภาชนี

[1] กตเม ธมฺมา กุสลา? ยสฺมิํ สมเย กามาวจรํ กุสลํ จิตฺตํ อุปฺปนฺนํ โหติ โสมนสฺสสหคตํ ญาณสมฺปยุตฺตํ รูปารมฺมณํ วา สทฺทารมฺมณํ วา คนฺธารมฺมณํ วา รสารมฺมณํ วา โผฏฺฐพฺพารมฺมณํ วา ธมฺมารมฺมณํ วา ยํ ยํ วา ปนารพฺภ, ตสฺมิํ สมเย ผสฺโส โหติ, เวทนา โหติ, สญฺญา โหติ, เจตนา โหติ, จิตฺตํ โหติ, วิตกฺโก โหติ, วิจาโร โหติ, ปีติ โหติ, สุขํ โหติ, จิตฺตสฺเสกคฺคตา โหติ, สทฺธินฺทฺริยํ โหติ, วีริยินฺทฺริยํ [วิริยินฺทฺริยํ (สี. สฺยา.)] โหติ, สตินฺทฺริยํ โหติ, สมาธินฺทฺริยํ โหติ, ปญฺญินฺทฺริยํ โหติ, มนินฺทฺริยํ โหติ, โสมนสฺสินฺทฺริยํ โหติ, ชีวิตินฺทฺริยํ โหติ, สมฺมาทิฏฺฐิ โหติ, สมฺมาสงฺกปฺโป โหติ, สมฺมาวายาโม โหติ, สมฺมาสติ โหติ, สมฺมาสมาธิ โหติ, สทฺธาพลํ โหติ, วีริยพลํ [วิริยพลํ (สี. สฺยา.)] โหติ, สติพลํ โหติ, สมาธิพลํ โหติ, ปญฺญาพลํ โหติ, หิริพลํ โหติ, โอตฺตปฺปพลํ โหติ, อโลโภ โหติ, อโทโส โหติ, อโมโห โหติ, อนภิชฺฌา โหติ, อพฺยาปาโท โหติ, สมฺมาทิฏฺฐิ โหติ, หิรี โหติ, โอตฺตปฺปํ โหติ, กายปสฺสทฺธิ [กายปฺปสฺสทฺธิ (สฺยา.)] โหติ, จิตฺตปสฺสทฺธิ [จิตฺตปฺปสฺสทฺธิ (สฺยา.)] โหติ, กายลหุตา โหติ, จิตฺตลหุตา โหติ, กายมุทุตา โหติ, จิตฺตมุทุตา โหติ, กายกมฺมญฺญตา โหติ, จิตฺตกมฺมญฺญตา โหติ, กายปาคุญฺญตา โหติ, จิตฺตปาคุญฺญตา โหติ, กายุชุกตา [กายุชฺชุกตา (สี. ก.)] โหติ, จิตฺตุชุกตา [จิตฺตุชฺชุกตา (สี. ก.)] โหติ, สติ โหติ, สมฺปชญฺญํ โหติ, สมโถ โหติ, วิปสฺสนา โหติ, ปคฺคาโห โหติ, อวิกฺเขโป โหติ; เย วา ปน ตสฺมิํ สมเย อญฺเญปิ อตฺถิ ปฏิจฺจสมุปฺปนฺนา อรูปิโน ธมฺมา – อิเม ธมฺมา กุสลาฯ