9. โตเทยฺยมาณวปุจฺฉา

[113]

‘‘ยสฺมิํ กามา น วสนฺติ, [อิจฺจายสฺมา โตเทยฺโย]

ตณฺหา ยสฺส น วิชฺชติ;

กถํกถา จ โย ติณฺโณ, วิโมกฺโข ตสฺส กีทิโส’’ฯ

[114]

‘‘ยสฺมิํ กามา น วสนฺติ, [โตเทยฺยาติ ภควา]

ตณฺหา ยสฺส น วิชฺชติ;

กถํกถา จ โย ติณฺโณ, วิโมกฺโข ตสฺส นาปโร’’ฯ

[115]

‘‘นิราสโส โส อุท อาสสาโน [อาสยาโน (ก.)], ปญฺญาณวา โส อุท ปญฺญกปฺปี;

มุนิํ อหํ สกฺก ยถา วิชญฺญํ, ตํ เม วิยาจิกฺข สมนฺตจกฺขุ’’ฯ

[116]

‘‘นิราสโส โส น จ อาสสาโน, ปญฺญาณวา โส น จ ปญฺญกปฺปี;

เอวมฺปิ โตเทยฺย มุนิํ วิชาน, อกิญฺจนํ กามภเว อสตฺต’’นฺติฯ

โตเทยฺยมาณวปุจฺฉา นวมาฯ

10. กปฺปมาณวปุจฺฉา

[117]

‘‘มชฺเฌ สรสฺมิํ ติฏฺฐตํ, [อิจฺจายสฺมา กปฺโป]

โอเฆ ชาเต มหพฺภเย;

ชรามจฺจุปเรตานํ, ทีปํ ปพฺรูหิ มาริส;

ตฺวญฺจ เม ทีปมกฺขาหิ, ยถายิทํ นาปรํ สิยา’’ฯ

[118]

‘‘มชฺเฌ สรสฺมิํ ติฏฺฐตํ, [กปฺปาติ ภควา]

โอเฆ ชาเต มหพฺภเย;

ชรามจฺจุปเรตานํ, ทีปํ ปพฺรูมิ กปฺป เตฯ

[119]

‘‘อกิญฺจนํ อนาทานํ, เอตํ ทีปํ อนาปรํ;

นิพฺพานํ อิติ นํ พฺรูมิ, ชรามจฺจุปริกฺขยํฯ

[120]

‘‘เอตทญฺญาย เย สตา, ทิฏฺฐธมฺมาภินิพฺพุตา;

น เต มารวสานุคา, น เต มารสฺส ปฏฺฐคู’’ติ [ปทฺธคู (สี.)]ฯ

กปฺปมาณวปุจฺฉา ทสมาฯ

11. ชตุกณฺณิมาณวปุจฺฉา

[121]

‘‘สุตฺวานหํ วีรมกามกามิํ, [อิจฺจายสฺมา ชตุกณฺณิ]

โอฆาติคํ ปุฏฺฐุมกามมาคมํ;

สนฺติปทํ พฺรูหิ สหชเนตฺต, ยถาตจฺฉํ ภควา พฺรูหิ เมตํฯ

[122]

‘‘ภควา หิ กาเม อภิภุยฺย อิริยติ, อาทิจฺโจว ปถวิํ เตชี เตชสา;

ปริตฺตปญฺญสฺส เม ภูริปญฺญ, อาจิกฺข ธมฺมํ ยมหํ วิชญฺญํ;

ชาติชราย อิธ วิปฺปหานํ’’ฯ

[123]

‘‘กาเมสุ วินย เคธํ, [ชตุกณฺณีติ ภควา]

เนกฺขมฺมํ ทฏฺฐุ เขมโต;

อุคฺคหิตํ นิรตฺตํ วา, มา เต วิชฺชิตฺถ กิญฺจนํฯ

[124]

‘‘ยํ ปุพฺเพ ตํ วิโสเสหิ, ปจฺฉา เต มาหุ กิญฺจนํ;

มชฺเฌ เจ โน คเหสฺสสิ, อุปสนฺโต จริสฺสสิฯ

[125]

‘‘สพฺพโส นามรูปสฺมิํ, วีตเคธสฺส พฺราหฺมณ;

อาสวาสฺส น วิชฺชนฺติ, เยหิ มจฺจุวสํ วเช’’ติฯ

ชตุกณฺณิมาณวปุจฺฉา เอกาทสมาฯ