‘‘สนฺโต จ [สนฺโตว (สฺยา.)] อุทฺธํ คจฺฉนฺติ, สุจิณฺเณนิธ กมฺมุนา;
สุจิณฺณสฺส ผลํ ปสฺส, สอินฺทา [สหินฺทา (สี.)] เทวา สพฺรหฺมกาฯ
[134]
‘‘ตํ ตํ พฺรูมิ มหาราช, ธมฺมํ รฏฺฐปตี จร;
ตถา [ตถา ตถา (สี. สฺยา. ปี.)] ราช จราหิ ธมฺมํ, ยถา ตํ สุจิณฺณํ นานุตปฺเปยฺย ปจฺฉา’’ติฯ
สํกิจฺจชาตกํ ทุติยํฯ
สฏฺฐินิปาตํ นิฏฺฐิตํฯ
ตสฺสุทฺทานํ –
อถ สฏฺฐินิปาตมฺหิ, สุณาถ มม ภาสิตํ;
ชาตกสวฺหยโน ปวโร, โสณกอรินฺทมสวฺหยโน;
ตถา วุตฺตรเถสภกิจฺจวโรติฯ
20. สตฺตตินิปาโต
531. กุสชาตกํ (1)
[1]
‘‘อิทํ เต รฏฺฐํ สธนํ สโยคฺคํ, สกายุรํ สพฺพกามูปปนฺนํ;
อิทํ เต รชฺชํ [รฏฺฐํ (ก.)] อนุสาส อมฺม, คจฺฉามหํ ยตฺถ ปิยา ปภาวตี’’ฯ
[2]
‘‘อนุชฺชุภูเตน หรํ มหนฺตํ, ทิวา จ รตฺโต จ นิสีถกาเล [นิสีท กาเล (ก.)];
ปฏิคจฺฉ ตฺวํ ขิปฺปํ กุสาวติํ กุส [กุสาวติํ (สฺยา. ก.)], นิจฺฉามิ ทุพฺพณฺณมหํ วสนฺตํ’’ฯ
[3]
‘‘นาหํ คมิสฺสามิ อิโต กุสาวติํ, ปภาวตี วณฺณปโลภิโต ตว;
รมามิ มทฺทสฺส นิเกตรมฺเม, หิตฺวาน รฏฺฐํ ตว ทสฺสเน รโตฯ
[4]
‘‘ปภาวตี วณฺณปโลภิโต ตว, สมฺมูฬฺหรูโป วิจรามิ เมทินิํ [เมทนิํ (สฺยา. ก.)];
ทิสํ น ชานามิ กุโตมฺหิ อาคโต, ตยมฺหิ มตฺโต มิคมนฺทโลจเนฯ
[5]
‘‘สุวณฺณจีรวสเน, ชาตรูปสุเมขเล;
สุสฺโสณิ ตว กามา หิ [กาเมหิ (สี. สฺยา. ปี.)], นาหํ รชฺเชน มตฺถิโก’’ฯ
[6]
‘‘อพฺภูติ [อพฺภู หิ (สี.), อภูติ (สฺยา.), อพฺภุ หิ (ปี.)] ตสฺส โภ โหติ, โย อนิจฺฉนฺตมิจฺฉติ;
อกามํ ราช กาเมสิ [กาเมหิ (สี. ปี.)], อกนฺตํ กนฺตุ [อกนฺโต กนฺต (สี. สฺยา. ปี.)] มิจฺฉสิ’’ฯ
[7]
‘‘อกามํ วา สกามํ วา, โย นโร ลภเต ปิยํ;
ลาภเมตฺถ ปสํสาม, อลาโภ ตตฺถ ปาปโก’’ฯ
[8]
‘‘ปาสาณสารํ ขณสิ, กณิการสฺส ทารุนา;
วาตํ ชาเลน พาเธสิ, โย อนิจฺฉนฺตมิจฺฉสิ’’ฯ
[9]
‘‘ปาสาโณ นูน เต หทเย, โอหิโต มุทุลกฺขเณ;
โย เต สาตํ น วินฺทามิ, ติโรชนปทาคโตฯ
[10]
‘‘ยทา มํ ภกุฏิํ [ภูกุฏิํ (สี. ปี.)] กตฺวา, ราชปุตฺตี อุทิกฺขติ [ราชปุตฺติ อุทิกฺขสิ (สี. ปี.)];
อาฬาริโก ตทา โหมิ, รญฺโญ มทฺทสฺสนฺเตปุเร [มทฺทสฺส ถีปุเร (สี. ปี.) เอวมุปริปิ]ฯ
[11]
‘‘ยทา อุมฺหยมานา มํ, ราชปุตฺตี อุทิกฺขติ [ราชปุตฺติ อุทิกฺขสิ (สี. ปี.)];
นาฬาริโก ตทา โหมิ, ราชา โหมิ ตทา กุโส’’ฯ
[12]
‘‘สเจ หิ วจนํ สจฺจํ, เนมิตฺตานํ ภวิสฺสติ;
เนว เม ตฺวํ ปตี อสฺส, กามํ ฉินฺทนฺตุ สตฺตธา’’ฯ
[13]
‘‘สเจ หิ วจนํ สจฺจํ, อญฺเญสํ ยทิ วา มมํ;
เนว ตุยฺหํ ปตี อตฺถิ, อญฺโญ สีหสฺสรา กุสา’’ฯ
[14]
‘‘เนกฺขํ คีวํ เต กาเรสฺสํ, ปตฺวา ขุชฺเช กุสาวติํ;
สเจ มํ นาคนาสูรู, โอโลเกยฺย ปภาวตีฯ
[15]
‘‘เนกฺขํ คีวํ เต กาเรสฺสํ, ปตฺวา ขุชฺเช กุสาวติํ;
สเจ มํ นาคนาสูรู, อาลเปยฺย ปภาวตีฯ
[16]
‘‘เนกฺขํ คีวํ เต กาเรสฺสํ, ปตฺวา ขุชฺเช กุสาวติํ;
สเจ มํ นาคนาสูรู, อุมฺหาเยยฺย ปภาวตีฯ
[17]
‘‘เนกฺขํ คีวํ เต กาเรสฺสํ, ปตฺวา ขุชฺเช กุสาวติํ;
สเจ มํ นาคนาสูรู, ปมฺหาเยยฺย ปภาวตีฯ
[18]
‘‘เนกฺขํ คีวํ เต กาเรสฺสํ, ปตฺวา ขุชฺเช กุสาวติํ;
สเจ เม นาคนาสูรู, ปาณีหิ อุปสมฺผุเส’’ฯ
[19]
‘‘น หิ นูนายํ ราชปุตฺตี, กุเส สาตมฺปิ วินฺทติ;
อาฬาริเก ภเต โปเส, เวตเนน อนตฺถิเก’’ฯ
[20]
‘‘น หิ นูนายํ สา [นูน อยํ (สี. สฺยา.)] ขุชฺชา, ลภติ ชิวฺหาย เฉทนํ;
สุนิสิเตน สตฺเถน, เอวํ ทุพฺภาสิตํ ภณํ’’ฯ
[21]
‘‘มา นํ รูเปน ปาเมสิ, อาโรเหน ปภาวติ;
มหายโสติ กตฺวาน, กรสฺสุ รุจิเร ปิยํฯ
[22]
‘‘มา นํ รูเปน ปาเมสิ, อาโรเหน ปภาวติ;
มหทฺธโนติ กตฺวาน, กรสฺสุ รุจิเร ปิยํฯ
[23]
‘‘มา นํ รูเปน ปาเมสิ, อาโรเหน ปภาวติ;
มหพฺพโลติ กตฺวาน, กรสฺสุ รุจิเร ปิยํฯ
[24]
‘‘มา นํ รูเปน ปาเมสิ, อาโรเหน ปภาวติ;
มหารฏฺโฐติ กตฺวาน, กรสฺสุ รุจิเร ปิยํฯ
[25]
‘‘มา นํ รูเปน ปาเมสิ, อาโรเหน ปภาวติ;
มหาราชาติ กตฺวาน, กรสฺสุ รุจิเร ปิยํฯ
[26]
‘‘มา นํ รูเปน ปาเมสิ, อาโรเหน ปภาวติ;
สีหสฺสโรติ กตฺวาน, กรสฺสุ รุจิเร ปิยํฯ
[27]
‘‘มา นํ รูเปน ปาเมสิ, อาโรเหน ปภาวติ;
วคฺคุสฺสโรติ กตฺวาน, กรสฺสุ รุจิเร ปิยํฯ
[28]
‘‘มา นํ รูเปน ปาเมสิ, อาโรเหน ปภาวติ;
พินฺทุสฺสโรติ กตฺวาน, กรสฺสุ รุจิเร ปิยํฯ
[29]
‘‘มา นํ รูเปน ปาเมสิ, อาโรเหน ปภาวติ;
มญฺชุสฺสโรติ กตฺวาน, กรสฺสุ รุจิเร ปิยํฯ
[30]
‘‘มา นํ รูเปน ปาเมสิ, อาโรเหน ปภาวติ;
มธุสฺสโรติ [มธุรสฺสโรติ (สี.)] กตฺวาน, กรสฺสุ รุจิเร ปิยํฯ
[31]
‘‘มา นํ รูเปน ปาเมสิ, อาโรเหน ปภาวติ;
สตสิปฺโปติ กตฺวาน, กรสฺสุ รุจิเร ปิยํฯ
[32]
‘‘มา นํ รูเปน ปาเมสิ, อาโรเหน ปภาวติ;
ขตฺติโยติปิ กตฺวาน [กริตฺวาน (สี.)], กรสฺสุ รุจิเร ปิยํฯ
[33]
‘‘มา นํ รูเปน ปาเมสิ, อาโรเหน ปภาวติ;
กุสราชาติ กตฺวาน, กรสฺสุ รุจิเร ปิยํ’’ฯ
[34]
‘‘เอเต นาคา อุปตฺถทฺธา, สพฺเพ ติฏฺฐนฺติ วมฺมิตา [วมฺมิกา (สฺยา.)];
ปุรา มทฺทนฺติ ปาการํ, อาเนนฺเตตํ ปภาวติํ’’ฯ
[35]
‘‘สตฺต พิเล [ขณฺเฑ (สี. ปี.)] กริตฺวาน, อหเมตํ ปภาวติํ;
ขตฺติยานํ ปทสฺสามิ, เย มํ หนฺตุํ อิธาคตา’’ฯ
[36]
‘‘อวุฏฺฐหิ ราชปุตฺตี, สามา โกเสยฺยวาสินี;
อสฺสุปุณฺเณหิ เนตฺเตหิ, ทาสีคณปุรกฺขตา’’ฯ
[37]
‘‘ตํ นูน กกฺกูปนิเสวิตํ มุขํ, อาทาสทนฺตาถรุปจฺจเวกฺขิตํ;
สุภํ สุเนตฺตํ วิรชํ อนงฺคณํ, ฉุทฺธํ วเน ฐสฺสติ ขตฺติเยหิฯ
[38]
‘‘เต นูน เม อสิเต เวลฺลิตคฺเค, เกเส มุทู จนฺทนสารลิตฺเต;
สมากุเล สีวถิกาย มชฺเฌ, ปาเทหิ คิชฺฌา ปริกฑฺฒิสฺสนฺติ [ปริกฑฺฒยนฺติ (สี. สฺยา. ปี.)]ฯ
[39]
‘‘ตา นูน เม ตมฺพนขา สุโลมา, พาหา มุทู จนฺทนสารลิตฺตา;
ฉินฺนา วเน อุชฺฌิตา ขตฺติเยหิ, คยฺห ธงฺโก [วโก (ปี.)] คจฺฉติ เยน กามํฯ
[40]
‘‘เต นูน ตาลูปนิเภ อลมฺเพ, นิเสวิเต กาสิกจนฺทเนน;
ถเนสุ เม ลมฺพิสฺสติ [ลมฺพหีติ (ปี.)] สิงฺคาโล [สิคาโล (สี. สฺยา. ปี.)], มาตูว ปุตฺโต ตรุโณ ตนูโชฯ
[41]
‘‘ตํ นูน โสณิํ ปุถุลํ สุโกฏฺฏิตํ, นิเสวิตํ กญฺจนเมขลาหิ;
ฉินฺนํ วเน ขตฺติเยหี อวตฺถํ, สิงฺคาลสงฺฆา ปริกฑฺฒิสฺสนฺติ [คยฺหา วโก คจฺฉติ เยนกามํ (ปี.)]ฯ
[42]
‘‘โสณา ธงฺกา [วกา (ปี.)] สิงฺคาลา จ, เย จญฺเญ สนฺติ ทาฐิโน;
อชรา นูน เหสฺสนฺติ, ภกฺขยิตฺวา ปภาวติํฯ
[43]
‘‘สเจ มํสานิ หริํสุ, ขตฺติยา ทูรคามิโน;
อฏฺฐีนิ อมฺม ยาจิตฺวา, อนุปเถ ทหาถ นํฯ
[44]
‘‘เขตฺตานิ อมฺม กาเรตฺวา, กณิกาเรตฺถ โรปย [โรปเย (ก.)];
ยทา เต ปุปฺผิตา อสฺสุ, เหมนฺตานํ หิมจฺจเย;
สเรยฺยาถ มมํ [มม (ปี.)] อมฺม, เอวํวณฺณา ปภาวตี’’ฯ
[45]
‘‘ตสฺสา มาตา อุทฏฺฐาสิ, ขตฺติยา เทววณฺณินี;
ทิสฺวา อสิญฺจ สูนญฺจ, รญฺโญ มทฺทสฺสนฺเตปุเร’’ฯ
[46]
‘‘อิมินา นูน อสินา, สุสญฺญํ ตนุมชฺฌิมํ;
ธีตรํ มทฺท [มม (สี.), มทฺโท (ปี.)] หนฺตฺวาน, ขตฺติยานํ ปทสฺสสิ’’ [ปทสฺสติ (ปี. ก.)]ฯ
[47]
‘‘น เม อกาสิ วจนํ, อตฺถกามาย ปุตฺติเก;
สาชฺช โลหิตสญฺฉนฺนา, คจฺฉสิ [คญฺฉิสิ (สี. ปี.)] ยมสาธนํฯ
[48]
‘‘เอวมาปชฺชตี โปโส, ปาปิยญฺจ นิคจฺฉติ;
โย เว หิตานํ วจนํ, น กโรติ [น กรํ (สี.)] อตฺถทสฺสินํฯ
[49]
‘‘สเจ จ อชฺช [ตฺวํ อมฺม (สี.)] ธาเรสิ [วาเรสิ (ปี.)], กุมารํ จารุทสฺสนํ;
กุเสน ชาตํ ขตฺติยํ, สุวณฺณมณิเมขลํ;
ปูชิตํ [ปูชิตา (ปี.)] ญาติสงฺเฆหิ, น คจฺฉสิ [คญฺฉิสิ (สี. ปี.)] ยมกฺขยํฯ
[50]
‘‘ยตฺถสฺสุ เภรี นทติ, กุญฺชโร จ นิกูชติ [นิกุญฺชติ (ปี.)];
ขตฺติยานํ กุเล ภทฺเท, กิํ นุ สุขตรํ ตโตฯ
[51]
‘‘อสฺโส จ สิสติ [อสฺโส หสิสติ (สี.), อสฺโส หสิยติ (สฺยา.), อสฺโส จ สิํสติ (ปี.)] ทฺวาเร, กุมาโร อุปโรทติ;
ขตฺติยานํ กุเล ภทฺเท, กิํ นุ สุขตรํ ตโตฯ
[52]
‘‘มยูรโกญฺจาภิรุเท, โกกิลาภินิกูชิเต;
ขตฺติยานํ กุเล ภทฺเท, กิํ นุ สุขตรํ ตโต’’ฯ
[53]
‘‘กหํ นุ โส สตฺตุมทฺทโน, ปรรฏฺฐปฺปมทฺทโน;
กุโส โสฬารปญฺญาโณ, โย โน ทุกฺขา ปโมจเย’’ฯ
[54]
‘‘อิเธว โส สตฺตุมทฺทโน, ปรรฏฺฐปฺปมทฺทโน;
กุโส โสฬารปญฺญาโณ, โย เต สพฺเพ วธิสฺสติ’’ [โย โน ทุกฺขา ปโมจเย (สี.), โส โน สพฺเพ วธิสฺสติ (ปี.)]ฯ
[55]
‘‘อุมฺมตฺติกา นุ ภณสิ, อนฺธพาลา ปภาสสิ [อาทุ พาลาว ภาสสิ (สี. ปี.)];
กุโส เจ อาคโต อสฺส, กิํ น [กินฺนุ (สฺยา. ก.)] ชาเนมุ ตํ มยํ’’ฯ
[56]
‘‘เอโส อาฬาริโก โปโส, กุมารีปุรมนฺตเร;
ทฬฺหํ กตฺวาน สํเวลฺลิํ, กุมฺภิํ โธวติ โอณโต’’ฯ
[57]
‘‘เวณี ตฺวมสิ จณฺฑาลี, อทูสิ กุลคนฺธินี;
กถํ มทฺทกุเล ชาตา, ทาสํ กยิราสิ กามุกํ’’ฯ
[58]
‘‘นมฺหิ เวณี น จณฺฑาลี, น จมฺหิ กุลคนฺธินี;
โอกฺกากปุตฺโต ภทฺทนฺเต, ตฺวํ นุ ทาโสติ มญฺญสิ’’ฯ
[59]
‘‘โย พฺราหฺมณสหสฺสานิ, สทา โภเชติ วีสติํ;
โอกฺกากปุตฺโต ภทฺทนฺเต, ตฺวํ นุ ทาโสติ มญฺญสิ’’ฯ
[60]
‘‘ยสฺส นาคสหสฺสานิ, สทา โยเชนฺติ วีสติํ;
โอกฺกากปุตฺโต ภทฺทนฺเต, ตฺวํ นุ ทาโสติ มญฺญสิฯ
[61]
‘‘ยสฺส อสฺสสหสฺสานิ, สทา โยเชนฺติ วีสติํ;
โอกฺกากปุตฺโต ภทฺทนฺเต, ตฺวํ นุ ทาโสติ มญฺญสิฯ
[62]
‘‘ยสฺส รถสหสฺสานิ, สทา โยเชนฺติ วีสติํ;
โอกฺกากปุตฺโต ภทฺทนฺเต, ตฺวํ นุ ทาโสติ มญฺญสิฯ
[( ) อยํ คาถา สี. ปี. โปตฺถเกสุเยว ทิสฺสติ] (‘‘ยสฺส อุสภสหสฺสานิ, สทา โยเชนฺติ วีสติํ;
โอกฺกากปุตฺโต ภทฺทนฺเต, ตฺวํ นุ ทาโสติ มญฺญสิ) [( ) อยํ คาถา สี. ปี. โปตฺถเกสุเยว ทิสฺสติ]ฯ
[63]
‘‘ยสฺส เธนุสหสฺสานิ, สทา ทุหนฺติ วีสติํ [ทุยฺหนฺติ วีสติ (สี. ปี.)];
โอกฺกากปุตฺโต ภทฺทนฺเต, ตฺวํ นุ ทาโสติ มญฺญสิ’’ฯ
[64]
‘‘ตคฺฆ เต ทุกฺกฏํ พาเล, ยํ ขตฺติยํ มหพฺพลํ;
นาคํ มณฺฑูกวณฺเณน, น นํ [น ตํ (สี. ปี.)] อกฺขาสิธาคตํ’’ [อกฺขาสิ อาคตํ (สี.)]ฯ
[65]
‘‘อปราธํ มหาราช, ตฺวํ โน ขม รเถสภ;
ยํ ตํ อญฺญาตเวเสน, นาญฺญาสิมฺหา อิธาคตํ’’ฯ
[66]
‘‘มาทิสสฺส น ตํ ฉนฺนํ, โยหํ อาฬาริโก ภเว;
ตฺวญฺเญว เม ปสีทสฺสุ, นตฺถิ เต เทว ทุกฺกฏํ’’ฯ
[67]
‘‘คจฺฉ พาเล ขมาเปหิ, กุสราชํ มหพฺพลํ;
ขมาปิโต กุโส ราชา [กุสราชา (สพฺพตฺถ)], โส เต ทสฺสติ ชีวิตํ’’ฯ
[68]
‘‘ปิตุสฺส วจนํ สุตฺวา, เทววณฺณี ปภาวตี;
สิรสา อคฺคหี ปาเท, กุสราชํ มหพฺพลํ’’ฯ
[69]
‘‘ยามา รตฺโย อติกฺกนฺตา, ตามา เทว ตยา วินา;
วนฺเท เต สิรสา ปาเท, มา เม กุชฺฌํ รเถสภฯ
[70]
‘‘สพฺพํ [สจฺจํ (สี. สฺยา. ปี.)] เต ปฏิชานามิ, มหาราช สุโณหิ เม;
น จาปิ อปฺปิยํ ตุยฺหํ, กเรยฺยามิ อหํ ปุนฯ
[71]
‘‘เอวํ เจ ยาจมานาย, วจนํ เม น กาหสิ;
อิทานิ มํ ตาโต หนฺตฺวา, ขตฺติยานํ ปทสฺสติ’’ฯ
[72]
‘‘เอวํ เต ยาจมานาย, กิํ น กาหามิ เต วโจ;
วิกุทฺโธ ตฺยสฺมิ กลฺยาณิ, มา ตฺวํ ภายิ ปภาวติฯ
[73]
‘‘สพฺพํ เต ปฏิชานามิ, ราชปุตฺติ สุโณหิ เม;
น จาปิ อปฺปิยํ ตุยฺหํ, กเรยฺยามิ อหํ ปุนฯ
[74]
‘‘ตว กามา หิ สุสฺโสณิ, ปหุ [พหุ (สฺยา.), พหู (ปี.), พหุํ (ก.)] ทุกฺขํ ติติกฺขิสํ [ติติกฺขิสฺสํ (สี. ปี.)];
พหุํ มทฺทกุลํ หนฺตฺวา, นยิตุํ ตํ ปภาวติ’’ฯ
[75]
‘‘โยชยนฺตุ รเถ อสฺเส, นานาจิตฺเต สมาหิเต;
อถ ทกฺขถ เม เวคํ, วิธมนฺตสฺส [วิธเมนฺตสฺส (สพฺพตฺถ)] สตฺตโว’’ฯ
[76]
‘‘ตญฺจ ตตฺถ อุทิกฺขิํสุ, รญฺโญ มทฺทสฺสนฺเตปุเร;
วิชมฺภมานํ สีหํว, โผเฏนฺตํ ทิคุณํ ภุชํฯ
[77]
‘‘หตฺถิกฺขนฺธญฺจ อารุยฺห, อาโรเปตฺวา ปภาวติํ;
สงฺคามํ โอตริตฺวาน, สีหนาทํ นที กุโสฯ
[78]
‘‘ตสฺส ตํ นทโต สุตฺวา, สีหสฺเสวิตเร มิคา;
ขตฺติยา วิปลายิํสุ, กุสสทฺทภยฏฺฏิตา [กุสสทฺทภยฏฺฐิตา (ปี.)]ฯ
[79]
‘‘หตฺถาโรหา อนีกฏฺฐา, รถิกา ปตฺติการกา;
อญฺญมญฺญสฺส ฉินฺทนฺติ, กุสสทฺทภยฏฺฏิตาฯ
[80]
‘‘ตสฺมิํ สงฺคามสีสสฺมิํ, ปสฺสิตฺวา หฏฺฐ [ตุฏฺฐ (สี.)] มานโส;
กุสสฺส รญฺโญ เทวินฺโท, อทา เวโรจนํ มณิํฯ
[81]
‘‘โส ตํ วิชิตฺวา สงฺคามํ, ลทฺธา เวโรจนํ มณิํ;
หตฺถิกฺขนฺธคโต ราชา, ปาเวกฺขิ นครํ ปุรํฯ
[82]
‘‘ชีวคฺคาหํ [ชีวคาหํ (สี. ปี.)] คเหตฺวาน, พนฺธิตฺวา สตฺต ขตฺติเย;
สสุรสฺสุปนาเมสิ, อิเม เต เทว สตฺตโวฯ
[83]
‘‘สพฺเพว เต วสํ คตา, อมิตฺตา วิหตา ตว;
กามํ กโรหิ เต ตยา, มุญฺจ วา เต หนสฺสุ วา’’ฯ
[84]
‘‘ตุยฺเหว สตฺตโว เอเต, น หิ เต มยฺห สตฺตโว;
ตฺวญฺเญว โน มหาราช, มุญฺจ วา เต หนสฺสุ วา’’ฯ
[85]
‘‘อิมา เต ธีตโร สตฺต, เทวกญฺญูปมา สุภา;
ททาหิ เนสํ เอเกกํ, โหนฺตุ ชามาตโร ตว’’ฯ
[86]
‘‘อมฺหากญฺเจว ตาสญฺจ, ตฺวํ โน สพฺเพสมิสฺสโร;
ตฺวญฺเญว โน มหาราช, เทหิ เนสํ ยทิจฺฉสิ’’ฯ
[87]
‘‘เอกเมกสฺส เอเกกํ, อทา สีหสฺสโร กุโส;
ขตฺติยานํ ตทา เตสํ, รญฺโญ มทฺทสฺส ธีตโรฯ
[88]
‘‘ปีณิตา เตน ลาเภน, ตุฏฺฐา สีหสฺสเร กุเส;
สกรฏฺฐานิ ปายิํสุ, ขตฺติยา สตฺต ตาวเทฯ
[89]
‘‘ปภาวติญฺจ อาทาย, มณิํ เวโรจนํ สุภํ [ตทา (ปี.)];
กุสาวติํ กุโส ราชา, อคมาสิ มหพฺพโลฯ
[90]
‘‘ตฺยสฺสุ เอกรเถ ยนฺตา, ปวิสนฺตา กุสาวติํ;
สมานา วณฺณรูเปน, นาญฺญมญฺญาติโรจิสุํ [นาญฺญมญฺญมติโรจยุํ (สี.)]ฯ
[91]
‘‘มาตา ปุตฺเตน สงฺคจฺฉิ [สงฺคญฺฉิ (สี. สฺยา. ปี.)], อุภโย จ ชยมฺปตี;
สมคฺคา เต ตทา อาสุํ, ผีตํ ธรณิมาวสุ’’นฺติฯ
กุสชาตกํ ปฐมํฯ
532. โสณนนฺทชาตกํ (2)
[92]
‘‘เทวตา นุสิ คนฺธพฺโพ, อทุ [อาทุ (สี. สฺยา.)] สกฺโก ปุรินฺทโท;
มนุสฺสภูโต อิทฺธิมา, กถํ ชาเนมุ ตํ มยํ’’ฯ
[93]
‘‘นาปิ เทโว น คนฺธพฺโพ, นาปิ สกฺโก ปุรินฺทโท;
มนุสฺสภูโต อิทฺธิมา, เอวํ ชานาหิ ภารธ’’ [ภารภ (ก.)]ฯ
[94]
‘‘กตรูปมิทํ โภโต [โภโต (สี. ปี.)], เวยฺยาวจฺจํ อนปฺปกํ;
เทวมฺหิ วสฺสมานมฺหิ, อโนวสฺสํ ภวํ อกาฯ
[95]
‘‘ตโต วาตาตเป โฆเร, สีตจฺฉายํ ภวํ อกา;
ตโต อมิตฺตมชฺเฌสุ [อมิตฺตมชฺเฌ จ (สี.)], สรตาณํ ภวํ อกาฯ
[96]
‘‘ตโต ผีตานิ รฏฺฐานิ, วสิโน เต ภวํ อกา;
ตโต เอกสตํ ขตฺเย, อนุยนฺเต [อนุยุตฺเต (ปี.)] ภวํ อกาฯ
[97]
‘‘ปตีตาสฺสุ มยํ โภโต, วท ตํ [วร ตํ (สี. สฺยา. ปี.)] ภญฺช [ภญฺญ (สี. ปี.), ภุญฺช (สฺยา. ก.)] มิจฺฉสิ;
หตฺถิยานํ อสฺสรถํ, นาริโย จ อลงฺกตา;
นิเวสนานิ รมฺมานิ, มยํ โภโต ททามเสฯ
[98]
‘‘อถ วงฺเค [อถ วา สงฺเค (สี. ปี.)] วา มคเธ, มยํ โภโต ททามเส;
อถ วา อสฺสกาวนฺตี [อสฺสกาวนฺติํ (สี. สฺยา. ปี.)], สุมนา ทมฺม เต มยํฯ
[99]
‘‘อุปฑฺฒํ วาปิ รชฺชสฺส, มยํ โภโต ททามเส;
สเจ เต อตฺโถ รชฺเชน, อนุสาส ยทิจฺฉสิ’’ฯ
[100]
‘‘น เม อตฺโถปิ รชฺเชน, นคเรน ธเนน วา;
อโถปิ ชนปเทน, อตฺโถ มยฺหํ น วิชฺชติฯ
[101]
‘‘โภโตว รฏฺเฐ วิชิเต, อรญฺเญ อตฺถิ อสฺสโม;
ปิตา มยฺหํ ชเนตฺตี จ, อุโภ สมฺมนฺติ อสฺสเมฯ
[102]
‘‘เตสาหํ [เตสฺวหํ (ก.)] ปุพฺพาจริเยสุ, ปุญฺญํ น ลภามิ กาตเว;
ภวนฺตํ อชฺฌาวรํ กตฺวา, โสณํ [โสนํ (ปี.)] ยาเจมุ สํวรํ’’ฯ
[103]
‘‘กโรมิ เต ตํ วจนํ, ยํ มํ ภณสิ พฺราหฺมณ;
เอตญฺจ โข โน อกฺขาหิ, กีวนฺโต โหนฺตุ ยาจกา’’ฯ
[104]
‘‘ปโรสตํ ชานปทา, มหาสาลา จ พฺราหฺมณา;
อิเม จ ขตฺติยา สพฺเพ, อภิชาตา ยสสฺสิโน;
ภวญฺจ ราชา มโนโช, อลํ เหสฺสนฺติ ยาจกา’’ฯ
[105]
‘‘หตฺถี อสฺเส จ โยเชนฺตุ, รถํ สนฺนยฺห สารถิ [นํ รถิ (ปี.)];
อาพนฺธนานิ คณฺหาถ, ปาทาสุสฺสารยทฺธเช [ปาเทสุสฺสารยํ ธเช (สี.), ปาทาสุสฺสารยํ ธเช (ปี.)];
อสฺสมํ ตํ คมิสฺสามิ, ยตฺถ สมฺมติ โกสิโย’’ฯ
[106]
‘‘ตโต จ ราชา ปายาสิ, เสนาย จตุรงฺคินี;
อคมา อสฺสมํ รมฺมํ, ยตฺถ สมฺมติ โกสิโย’’ฯ
[107]
‘‘กสฺส กาทมฺพโย [กสฺส กาทมฺพมโย (ก.)] กาโช, เวหาสํ จตุรงฺคุลํ;
อํสํ อสมฺผุสํ เอติ, อุทหาราย [อุทหารสฺส (สี. สฺยา. ปี.)] คจฺฉโต’’ฯ
[108]
‘‘อหํ โสโณ มหาราช, ตาปโส สหิตพฺพโต [สหิตํ วโต (ปี.)];
ภรามิ มาตาปิตโร, รตฺตินฺทิวมตนฺทิโตฯ
[109]
‘‘วเน ผลญฺจ มูลญฺจ, อาหริตฺวา ทิสมฺปติ;
โปเสมิ มาตาปิตโร, ปุพฺเพ กตมนุสฺสรํ’’ฯ
[110]
‘‘อิจฺฉาม อสฺสมํ คนฺตุํ, ยตฺถ สมฺมติ โกสิโย;
มคฺคํ โน โสณ อกฺขาหิ, เยน คจฺเฉมุ [คจฺฉาม (สี.)] อสฺสมํ’’ฯ
[111]
‘‘อยํ เอกปที ราช, เยเนตํ [เยน ตํ (ก.)] เมฆสนฺนิภํ;
โกวิฬาเรหิ สญฺฉนฺนํ, เอตฺถ สมฺมติ โกสิโย’’ฯ
[112]
‘‘อิทํ วตฺวาน ปกฺกามิ, ตรมาโน มหาอิสิ;
เวหาเส อนฺตลิกฺขสฺมิํ, อนุสาสิตฺวาน ขตฺติเยฯ
[113]
‘‘อสฺสมํ ปริมชฺชิตฺวา, ปญฺญเปตฺวาน [ปญฺญเปตฺวาน (สี. สฺยา.)] อาสนํ;
ปณฺณสาลํ ปวิสิตฺวา, ปิตรํ ปฏิโพธยิฯ
[114]
‘‘อิเม อายนฺติ ราชาโน, อภิชาตา ยสสฺสิโน;
อสฺสมา นิกฺขมิตฺวาน, นิสีท ตฺวํ [นิสีทาหิ (สี.)] มหาอิเสฯ
[115]
‘‘ตสฺส ตํ วจนํ สุตฺวา, ตรมาโน มหาอิสิ;
อสฺสมา นิกฺขมิตฺวาน, สทฺวารมฺหิ อุปาวิสิ’’ฯ
[116]
‘‘ตญฺจ ทิสฺวาน อายนฺตํ, ชลนฺตํริว เตชสา;
ขตฺยสงฺฆปริพฺยูฬฺหํ, โกสิโย เอตทพฺรวิฯ
[117]
‘‘กสฺส เภรี มุทิงฺคา จ [มุติงฺคา จ (ปี.)], สงฺขา ปณวทินฺทิมา [เทณฺฑิมา (สี. ปี.)];
ปุรโต ปฏิปนฺนานิ, หาสยนฺตา รเถสภํฯ
[118]
‘‘กสฺส กญฺจนปฏฺเฏน, ปุถุนา วิชฺชุวณฺณินา;
ยุวา กลาปสนฺนทฺโธ, โก เอติ สิริยา ชลํฯ
[119]
‘‘อุกฺกามุขปหฏฺฐํว, ขทิรงฺคารสนฺนิภํ;
มุขญฺจ รุจิรา ภาติ, โก เอติ สิริยา ชลํฯ
[120]
‘‘กสฺส ปคฺคหิตํ ฉตฺตํ, สสลากํ มโนรมํ;
อาทิจฺจรํสาวรณํ, โก เอติ สิริยา ชลํฯ
[121]
‘‘กสฺส องฺคํ ปริคฺคยฺห, วาฬพีชนิมุตฺตมํ;
จรนฺติ วรปุญฺญสฺส [วรปญฺญสฺส (สี. ปี.)], หตฺถิกฺขนฺเธน อายโตฯ
[122]
‘‘กสฺส เสตานิ ฉตฺตานิ, อาชานียา จ วมฺมิตา;
สมนฺตา ปริกิเรนฺติ [ปริกิรนฺติ (สี. สฺยา. ปี.)], โก เอติ สิริยา ชลํฯ
[123]
‘‘กสฺส เอกสตํ ขตฺยา, อนุยนฺตา [อนุยุตฺตา (ปี.)] ยสสฺสิโน;
สมนฺตานุปริยนฺติ, โก เอติ สิริยา ชลํฯ
[124]
‘‘หตฺถิ อสฺสรถ ปตฺติ [หตฺถี อสฺสา รถา ปตฺตี (สี.)], เสนา จ จตุรงฺคินี;
สมนฺตานุปริยนฺติ [สมนฺตา อนุปริยาติ (ปี.)], โก เอติ สิริยา ชลํฯ
[125]
‘‘กสฺเสสา มหตี เสนา, ปิฏฺฐิโต อนุวตฺตติ;
อกฺโขภณี [อกฺขาภนี (สี.), อกฺโขภินี (สฺยา.)] อปริยนฺตา, สาครสฺเสว อูมิโย’’ฯ
[126]
‘‘ราชาภิราชา [ราชาธิราชา (ก.)] มโนโช, อินฺโทว ชยตํ ปติ;
นนฺทสฺสชฺฌาวรํ เอติ, อสฺสมํ พฺรหฺมจารินํฯ
[127]
‘‘ตสฺเสสา มหตี เสนา, ปิฏฺฐิโต อนุวตฺตติ;
อกฺโขภณี อปริยนฺตา, สาครสฺเสว อูมิโย’’ฯ
[128]
‘‘อนุลิตฺตา จนฺทเนน, กาสิกุตฺตมธาริโน [กาสิกวตฺถธาริโน (ปี.)];
สพฺเพ ปญฺชลิกา หุตฺวา, อิสีนํ อชฺฌุปาคมุํ’’ฯ
[129]
‘‘กจฺจิ นุ โภโต กุสลํ, กจฺจิ โภโต อนามยํ;
กจฺจิ อุญฺเฉน ยาเปถ, กจฺจิ มูลผลา พหูฯ
[130]
‘‘กจฺจิ ฑํสา มกสา จ, อปฺปเมว สรีสปา [สิริํสปา (สี. สฺยา. ปี.)];
วเน วาฬมิคากิณฺเณ, กจฺจิ หิํสา น วิชฺชติ’’ฯ
[131]
‘‘กุสลญฺเจว โน ราช, อโถ ราช อนามยํ;
อโถ อุญฺเฉน ยาเปม, อโถ มูลผลา พหูฯ
[132]
‘‘อโถ ฑํสา มกสา จ [ฑํสา จ มกสา (สี.), ฑํสา จ มกสา จ (ปี.)], อปฺปเมว สรีสปา [สิริํสปา (สี. สฺยา. ปี.)];
วเน วาฬมิคากิณฺเณ, หิํสา มยฺหํ [อ มฺหํ (สี. ปี.)] น วิชฺชติฯ
[133]
‘‘พหูนิ วสฺสปูคานิ, อสฺสเม สมฺมตํ [วสโต (สี.)] อิธ;
นาภิชานามิ อุปฺปนฺนํ, อาพาธํ อมโนรมํฯ
[134]
‘‘สฺวาคตํ เต มหาราช, อโถ เต อทุราคตํ;
อิสฺสโรสิ อนุปฺปตฺโต, ยํ อิธตฺถิ ปเวทยฯ
[135]
‘‘ตินฺทุกานิ ปิยาลานิ, มธุเก กาสุมาริโย [กาสมาริโย (สี. สฺยา.)];
ผลานิ ขุทฺทกปฺปานิ, ภุญฺช ราช วรํ วรํฯ
[136]
‘‘อิทมฺปิ ปานียํ สีตํ, อาภตํ คิริคพฺภรา;
ตโต ปิว มหาราช, สเจ ตฺวํ อภิกงฺขสิ’’ฯ
[137]
‘‘ปฏิคฺคหิตํ ยํ ทินฺนํ, สพฺพสฺส อคฺฆิยํ กตํ;
นนฺทสฺสาปิ นิสาเมถ, วจนํ โส [ยํ (สี.), ยํ โส (ปี.)] ปวกฺขติฯ
[138]
‘‘อชฺฌาวรมฺหา นนฺทสฺส, โภโต สนฺติกมาคตา;
สุณาตุ [สุณาตุ เม (สี. สฺยา.)] ภวํ วจนํ, นนฺทสฺส ปริสาย จ’’ฯ
[139]
‘‘ปโรสตํ ชานปทา [ชนปทา (ปี.)], มหาสาลา จ พฺราหฺมณา;
อิเม จ ขตฺติยา สพฺเพ, อภิชาตา ยสสฺสิโน;
ภวญฺจ ราชา มโนโช, อนุมญฺญนฺตุ เม วโจฯ
[140]
‘‘เย จ สนฺติ [เย วสนฺติ (สี.), เย หิ สนฺติ (ปี.)] สมีตาโร, ยกฺขานิ อิธ มสฺสเม;
อรญฺเญ ภูตภพฺยานิ, สุณนฺตุ วจนํ มมฯ
[141]
‘‘นโม กตฺวาน ภูตานํ, อิสิํ วกฺขามิ สุพฺพตํ;
โส ตฺยาหํ ทกฺขิณา พาหุ, ตว โกสิย สมฺมโตฯ
[142]
‘‘ปิตรํ เม ชเนตฺติญฺจ, ภตฺตุกามสฺส เม สโต;
วีร ปุญฺญมิทํ ฐานํ, มา มํ โกสิย วารยฯ
[143]
‘‘สพฺภิ เหตํ อุปญฺญาตํ, มเมตํ อุปนิสฺสช;
อุฏฺฐานปาริจริยาย, ทีฆรตฺตํ ตยา กตํ;
มาตาปิตูสุ ปุญฺญานิ, มม โลกทโท ภวฯ
[144]
‘‘ตเถว สนฺติ มนุชา, ธมฺเม ธมฺมปทํ วิทู;
มคฺโค สคฺคสฺส โลกสฺส, ยถา ชานาสิ ตฺวํ อิเสฯ
[145]
‘‘อุฏฺฐานปาริจริยาย, มาตาปิตุสุขาวหํ;
ตํ มํ ปุญฺญา นิวาเรติ, อริยมคฺคาวโร นโร’’ฯ
[146]
‘‘สุณนฺตุ โภนฺโต วจนํ, ภาตุรชฺฌาวรา มม;
กุลวํสํ มหาราช, โปราณํ ปริหาปยํ;
อธมฺมจารี เชฏฺเฐสุ [โย เชฏฺโฐ (สี.)], นิรยํ โสปปชฺชติ [โส อุปปชฺชติ (สี. สฺยา. ปี.)]ฯ
[147]
‘‘เย จ ธมฺมสฺส กุสลา, โปราณสฺส ทิสมฺปติ;
จาริตฺเตน จ สมฺปนฺนา, น เต คจฺฉนฺติ ทุคฺคติํฯ
[148]
‘‘มาตาปิตา จ ภาตา จ, ภคินี ญาติพนฺธวา;
สพฺเพ เชฏฺฐสฺส เต ภารา, เอวํ ชานาหิ ภารธ [ภารถ (สฺยา.)]ฯ
[149]
‘‘อาทิยิตฺวา ครุํ ภารํ, นาวิโก วิย อุสฺสเห;
ธมฺมญฺจ นปฺปมชฺชามิ, เชฏฺโฐ จสฺมิ รเถสภ’’ฯ
[150]
‘‘อธิคมา [อธิคตมฺหา (สี.), อธิคมฺหา (สฺยา.), อธิคตมฺห (ปี.)] ตเม ญาณํ, ชาลํว ชาตเวทโต;
เอวเมว โน ภวํ ธมฺมํ, โกสิโย ปวิทํสยิฯ
[151]
‘‘ยถา อุทยมาทิจฺโจ, วาสุเทโว ปภงฺกโร;
ปาณีนํ ปวิทํเสติ, รูปํ กลฺยาณปาปกํ;
เอวเมว โน ภวํ ธมฺมํ, โกสิโย ปวิทํสยิ’’ฯ
[152]
‘‘เอวํ เม ยาจมานสฺส, อญฺชลิํ นาวพุชฺฌถ;
ตว ปทฺธจโร [ตว ปฏฺฐจโร (สฺยา.), ตว พทฺธญฺจโร (ปี.), ตวุปฏฺฐจโร (ก.)] เหสฺสํ, วุฏฺฐิโต ปริจารโก’’ฯ
[153]
‘‘อทฺธา นนฺท วิชานาสิ [ปชานาสิ (สี.)], สทฺธมฺมํ สพฺภิ เทสิตํ;
อริโย อริยสมาจาโร, พาฬฺหํ ตฺวํ มม รุจฺจสิฯ
[154]
‘‘ภวนฺตํ วทามิ โภติญฺจ, สุณาถ วจนํ มม;
นายํ ภาโร ภารมโต [ภารมตฺโต (สี. สฺยา.)], อหุ มยฺหํ กุทาจนํฯ
[155]
‘‘ตํ มํ อุปฏฺฐิตํ สนฺตํ, มาตาปิตุสุขาวหํ;
นนฺโท อชฺฌาวรํ กตฺวา, อุปฏฺฐานาย ยาจติฯ
[156]
‘‘โย เว อิจฺฉติ กาเมน, สนฺตานํ พฺรหฺมจารินํ;
นนฺทํ โว วรถ เอโก [นนฺทํ วทถ เอเก (ปี.)], กํ นนฺโท อุปติฏฺฐตุ’’ฯ
[157]
‘‘ตยา ตาต อนุญฺญาตา, โสณ ตํ นิสฺสิตา มยํ;
อุปฆาตุํ [อุปฆายิตุํ (สี.)] ลเภ นนฺทํ, มุทฺธนิ พฺรหฺมจารินํ’’ฯ
[158]
‘‘อสฺสตฺถสฺเสว ตรุณํ, ปวาฬํ มาลุเตริตํ;
จิรสฺสํ นนฺทํ ทิสฺวาน, หทยํ เม ปเวธติฯ
[159]
‘‘ยทา สุตฺตาปิ สุปิเน [สุปฺปนฺเต (สฺยา. ปี.)], นนฺทํ ปสฺสามิ อาคตํ;
อุทคฺคา สุมนา โหมิ, นนฺโท โน อาคโต อยํฯ
[160]
‘‘ยทา จ ปฏิพุชฺฌิตฺวา, นนฺทํ ปสฺสามิ นาคตํ;
ภิยฺโย อาวิสตี โสโก, โทมนสฺสญฺจนปฺปกํฯ
[161]
‘‘สาหํ อชฺช จิรสฺสมฺปิ, นนฺทํ ปสฺสามิ อาคตํ;
ภตฺตุจฺจ [ภตฺตุญฺจ (ก.)] มยฺหญฺจ ปิโย, นนฺโท โน ปาวิสี ฆรํฯ
[162]
‘‘ปิตุปิ นนฺโท สุปฺปิโย, ยํ นนฺโท นปฺปวเส [ปาวิสี (ปี.)] ฆรา [ฆรํ (สฺยา. ปี. ก.)];
ลภตู ตาต นนฺโท ตํ, มํ นนฺโท อุปติฏฺฐตุ’’ฯ
[163]
‘‘อนุกมฺปิกา ปติฏฺฐา จ, ปุพฺเพ รสทที จ โน;
มคฺโค สคฺคสฺส โลกสฺส, มาตา ตํ วรเต อิเสฯ
[164]
‘‘ปุพฺเพ รสทที โคตฺตี, มาตา ปุญฺญูปสํหิตา;
มคฺโค สคฺคสฺส โลกสฺส, มาตา ตํ วรเต อิเส’’ฯ
[165]
‘‘อากงฺขมานา ปุตฺตผลํ, เทวตาย นมสฺสติ;
นกฺขตฺตานิ จ ปุจฺฉติ, อุตุสํวจฺฉรานิ จฯ
[166]
‘‘ตสฺสา อุตุมฺหิ นฺหาตาย [อุตุสินาตาย (ปี.)], โหติ คพฺภสฺส โวกฺกโม [คพฺภสฺส’วกฺกโม (สี. สฺยา. ปี.)];
เตน โทหฬินี โหติ, สุหทา เตน วุจฺจติฯ
[167]
‘‘สํวจฺฉรํ วา อูนํ วา, ปริหริตฺวา วิชายติ;
เตน สา ชนยนฺตีติ, ชเนตฺติ [ชเนตฺตี (สี. สฺยา. ปี.)] เตน วุจฺจติฯ
[168]
‘‘ถนขีเรน [ถนกฺขีเรน (สี.)] คีเตน, องฺคปาวุรเณน [องฺคปาปุรเณน (ปี.)] จ;
โรทนฺตํ ปุตฺตํ [เอว (ปี.)] โตเสติ, โตเสนฺตี เตน วุจฺจติฯ
[169]
‘‘ตโต วาตาตเป โฆเร, มมํ กตฺวา อุทิกฺขติ;
ทารกํ อปฺปชานนฺตํ, โปเสนฺตี เตน วุจฺจติฯ
[170]
‘‘ยญฺจ มาตุธนํ โหติ, ยญฺจ โหติ ปิตุทฺธนํ;
อุภยมฺเปตสฺส โคเปติ, อปิ ปุตฺตสฺส โน สิยาฯ
[171]
‘‘เอวํ ปุตฺต อทุํ ปุตฺต, อิติ มาตา วิหญฺญติ;
ปมตฺตํ ปรทาเรสุ, นิสีเถ ปตฺตโยพฺพเน;
สายํ ปุตฺตํ อนายนฺตํ, อิติ มาตา วิหญฺญติฯ
[172]
‘‘เอวํ กิจฺฉา ภโต โปโส, มาตุ อปริจารโก;
มาตริ มิจฺฉา จริตฺวาน, นิรยํ โสปปชฺชติฯ
[173]
‘‘เอวํ กิจฺฉา ภโต โปโส, ปิตุ อปริจารโก;
ปิตริ มิจฺฉา จริตฺวาน, นิรยํ โสปปชฺชติฯ
[174]
‘‘ธนาปิ ธนกามานํ, นสฺสติ อิติ เม สุตํ;
มาตรํ อปริจริตฺวาน, กิจฺฉํ วา โส นิคจฺฉติฯ
[175]
‘‘ธนาปิ ธนกามานํ, นสฺสติ อิติ เม สุตํ;
ปิตรํ อปริจริตฺวาน, กิจฺฉํ วา โส นิคจฺฉติฯ
[176]
‘‘อานนฺโท จ ปโมโท จ, สทา หสิตกีฬิตํ;
มาตรํ ปริจริตฺวาน, ลพฺภเมตํ วิชานโตฯ
[177]
‘‘อานนฺโท จ ปโมโท จ, สทา หสิตกีฬิตํ;
ปิตรํ ปริจริตฺวาน, ลพฺภเมตํ วิชานโตฯ
[178]
‘‘ทานญฺจ เปยฺยวชฺชญฺจ [ปิยวาจา จ (สี. สฺยา. ก.)], อตฺถจริยา จ ยา อิธ;
สมานตฺตตา [สมานตฺตา (ปี.)] จ ธมฺเมสุ, ตตฺถ ตตฺถ ยถารหํ;
เอเต โข สงฺคหา โลเก, รถสฺสาณีว ยายโตฯ
[179]
เอเต จ สงฺคหา นาสฺสุ, น มาตา ปุตฺตการณา;
ลเภถ มานํ ปูชํ วา [ปูชญฺจ (ปี.)], ปิตา วา ปุตฺตการณาฯ
[180]
‘‘ยสฺมา จ สงฺคหา [สงฺคเห (ที. นิ. 3.273; อ. นิ. 4.32) ตทฏฺฐกถาโย โอโลเกตพฺพา] เอเต, สมฺมเปกฺขนฺติ [สมเวกฺขนฺติ (สี. สฺยา. ปี.) อ. นิ. 4.32] ปณฺฑิตา;
ตสฺมา มหตฺตํ ปปฺโปนฺติ, ปาสํสา จ ภวนฺติ เตฯ
[181]
‘‘พฺรหฺมาติ [พฺรหฺมา หิ (ปี.)] มาตาปิตโร, ปุพฺพาจริยาติ วุจฺจเร;
อาหุเนยฺยา จ ปุตฺตานํ, ปชาย อนุกมฺปกาฯ
[182]
‘‘ตสฺมา หิ เน นมสฺเสยฺย, สกฺกเรยฺย จ ปณฺฑิโต;
อนฺเนน อโถ [มโถ (ปี.), อถ (อ. นิ. 4.63; อิติวุ. 106)] ปาเนน, วตฺเถน สยเนน จ;
อุจฺฉาทเนน นฺหาปเนน [นหาปเนน (สี. ปี.)], ปาทานํ โธวเนน จฯ
[183]
‘‘ตาย นํ ปาริจริยาย [ปริจริยาย (ปี.)], มาตาปิตูสุ ปณฺฑิตา;
อิเธว นํ ปสํสนฺติ, เปจฺจ สคฺเค ปโมทตี’’ติฯ
โสณนนฺทชาตกํ ทุติยํฯ
สตฺตตินิปาตํ นิฏฺฐิตํฯ
ตสฺสุทฺทานํ –
อถ สตฺตติมมฺหิ นิปาตวเร, สภาวนฺตุ กุสาวติราชวโร;
อถ โสณสุนนฺทวโร จ ปุน, อภิวาสิตสตฺตติมมฺหิ สุเตติฯ
21. อสีตินิปาโต
533. จูฬหํสชาตกํ (1)
[1]