30. มุนิกชาตกํ

[30]

มา มุนิกสฺส ปิหยิ, อาตุรนฺนานิ ภุญฺชติ;

อปฺโปสฺสุกฺโก ภุสํ ขาท, เอตํ ทีฆายุลกฺขณนฺติฯ

มุนิกชาตกํ ทสมํฯ

กุรุงฺควคฺโค ตติโยฯ

ตสฺสุทฺทานํ –

กุรุงฺคสฺส กุกฺกุรโคชวโร, ปุน วาฬวสฺสสิริวฺหยโน [สิริวยโน (สพฺพตฺถ)];

มหิฬามุขนามนุญฺญวโร, วหเต ธุร มุนิเกน ทสาติฯ

4. กุลาวกวคฺโค

31. กุลาวกชาตกํ

[31]

กุลาวกา มาตลิ สิมฺพลิสฺมิํ, อีสามุเขน ปริวชฺชยสฺสุ;

กามํ จชาม อสุเรสุ ปาณํ, มา เม ทิชา วิกฺกุลวา [มายิเม ทิชา วิกุลาวา (สี. สฺยา. ปี.)] อเหสุนฺติฯ

กุลาวกชาตกํ ปฐมํฯ

32. นจฺจชาตกํ

[32]

รุทํ มนุญฺญํ รุจิรา จ ปิฏฺฐิ, เวฬุริยวณฺณูปนิภา [วณฺณูปฏิภา (สฺยา.), วณฺณสนฺนิภา (ก.)] จ คีวา;

พฺยามมตฺตานิ จ เปขุณานิ, นจฺเจน เต ธีตรํ โน ททามีติฯ

นจฺจชาตกํ ทุติยํฯ

33. สมฺโมทมานชาตกํ

[33]

สมฺโมทมานา คจฺฉนฺติ, ชาลมาทาย ปกฺขิโน;

ยทา เต วิวทิสฺสนฺติ, ตทา เอหินฺติ เม วสนฺติฯ

สมฺโมทมานชาตกํ ตติยํฯ

34. มจฺฉชาตกํ

[34]

น มํ สีตํ น มํ อุณฺหํ, น มํ ชาลสฺมิ พาธนํ;

ยญฺจ มํ มญฺญเต มจฺฉี, อญฺญํ โส รติยา คโตติฯ

มจฺฉชาตกํ จตุตฺถํฯ

35. วฏฺฏกชาตกํ

[35]

สนฺติ ปกฺขา อปตนา, สนฺติ ปาทา อวญฺจนา;

มาตาปิตา จ นิกฺขนฺตา, ชาตเวท ปฏิกฺกมาติฯ

วฏฺฏกชาตกํ ปญฺจมํฯ

36. สกุณชาตกํ

[36]

ยํ นิสฺสิตา ชคติรุหํ วิหงฺคมา, สฺวายํ อคฺคิํ ปมุญฺจติ;

ทิสา ภชถ วกฺกงฺคา [วงฺกงฺคา (สฺยา.)], ชาตํ สรณโต ภยนฺติฯ

สกุณชาตกํ ฉฏฺฐํฯ

37. ติตฺติรชาตกํ

[37]

เย วุฑฺฒ [วทฺธ (สี. ปี.)] มปจายนฺติ, นรา ธมฺมสฺส โกวิทา;

ทิฏฺเฐว ธมฺเม ปาสํสา, สมฺปราเย จ สุคฺคตีติฯ

ติตฺติรชาตกํ สตฺตมํฯ

38. พกชาตกํ

[38]

นาจฺจนฺตํ นิกติปฺปญฺโญ, นิกตฺยา สุขเมธติ;

อาราเธติ นิกติปฺปญฺโญ [อาราเธ นิกติปฺปญฺโญ (ปี.)], พโก กกฺกฏกามิวาติฯ

พกชาตกํ อฏฺฐมํฯ