ททามิ เต พฺราหฺมณ โรหิณีนํ, ควํ สหสฺสํ สห ปุงฺคเวน;
ทูโต หิ ทูตสฺส กถํ น ทชฺชํ, มยมฺปิ ตสฺเสว ภวาม ทูตาติฯ
ทูตชาตกํ ทสมํฯ
สงฺกปฺปวคฺโค ปฐโมฯ
ตสฺสุทฺทานํ –
อุสุการวโร ติลมุฏฺฐิ มณิ, หยราช วิหงฺคม อาสิวิโส;
ชนสนฺธ กหาปณวสฺส ปุน, ติริฏํ ปุน ทูตวเรน ทสาติฯ
2. ปทุมวคฺโค
261. ปทุมชาตกํ (3-2-1)
[31]
ยถา เกสา จ มสฺสู จ, ฉินฺนํ ฉินฺนํ วิรูหติ;
เอวํ รูหตุ เต นาสา, ปทุมํ เทหิ ยาจิโตฯ
[32]
ยถา สารทิกํ พีชํ, เขตฺเต วุตฺตํ วิรูหติ;
เอวํ รูหตุ เต นาสา, ปทุมํ เทหิ ยาจิโตฯ
[33]
อุโภปิ ปลปนฺเตเต [วิลปนฺเตเต (สฺยา. ก.)], อปิ ปทฺมานิ ทสฺสติ;
วชฺชุํ วา เต น วา วชฺชุํ, นตฺถิ นาสาย รูหนา;
เทหิ สมฺม ปทุมานิ, อหํ ยาจามิ ยาจิโตติฯ
ปทุมชาตกํ ปฐมํฯ
262. มุทุปาณิชาตกํ (3-2-2)
[34]
ปาณิ เจ มุทุโก จสฺส, นาโค จสฺส สุการิโต;
อนฺธกาโร จ วสฺเสยฺย, อถ นูน ตทา สิยาฯ
[35]
อนลา มุทุสมฺภาสา, ทุปฺปูรา ตา [ทุปฺปูรตฺตา (ก.)] นทีสมา;
สีทนฺติ นํ วิทิตฺวาน, อารกา ปริวชฺชเยฯ
[36]
ยํ เอตา อุปเสวนฺติ, ฉนฺทสา วา ธเนน วา;
ชาตเวโทว สํ ฐานํ, ขิปฺปํ อนุทหนฺติ นนฺติฯ
มุทุปาณิชาตกํ ทุติยํฯ
263. จูฬปโลภนชาตกํ (3-2-3)
[37]
อภิชฺชมาเน วาริสฺมิํ, สยํ [อยํ (ก.)] อาคมฺม อิทฺธิยา;
มิสฺสีภาวิตฺถิยา คนฺตฺวา, สํสีทสิ [สํสีทติ (ก.)] มหณฺณเวฯ
[38]
อาวฏฺฏนี มหามายา, พฺรหฺมจริยวิโกปนา;
สีทนฺติ นํ วิทิตฺวาน, อารกา ปริวชฺชเยฯ
[39]
ยํ เอตา อุปเสวนฺติ, ฉนฺทสา วา ธเนน วา;
ชาตเวโทว สํ ฐานํ, ขิปฺปํ อนุทหนฺติ นนฺติฯ
จูฬปโลภน [จุลฺลปโลภน (สี. สฺยา. ปี.)] ชาตกํ ตติยํฯ
264. มหาปนาทชาตกํ (3-2-4)
[40]
ปนาโท นาม โส ราชา, ยสฺส ยูโป สุวณฺณโย;
ติริยํ โสฬสุพฺเพโธ [โสฬสปพฺเพโธ (สี. ปี.)], อุทฺธมาหุ [อุจฺจมาหุ (สี. สฺยา. ปี.)] สหสฺสธาฯ
[41]
สหสฺสกณฺโฑ สตเคณฺฑุ [สตเภโท (สี. ปี.), สตเภณฺฑุ (สี. นิสฺสย)], ธชาสุ หริตามโย;
อนจฺจุํ ตตฺถ คนฺธพฺพา, ฉ สหสฺสานิ สตฺตธาฯ
[42]
เอวเมตํ [เอวเมว (ก.)] ตทา อาสิ, ยถา ภาสสิ ภทฺทชิ;
สกฺโก อหํ ตทา อาสิํ, เวยฺยาวจฺจกโร ตวาติฯ
มหาปนาทชาตกํ จตุตฺถํฯ
265. ขุรปฺปชาตกํ (3-2-5)
[43]
ทิสฺวา ขุรปฺเป ธนุเวคนุนฺเน, ขคฺเค คหีเต ติขิเณ เตลโธเต;
ตสฺมิํ ภยสฺมิํ มรเณ วิยูฬฺเห, กสฺมา นุ เต นาหุ ฉมฺภิตตฺตํฯ
[44]
ทิสฺวา ขุรปฺเป ธนุเวคนุนฺเน, ขคฺเค คหีเต ติขิเณ เตลโธเต;
ตสฺมิํ ภยสฺมิํ มรเณ วิยูฬฺเห, เวทํ อลตฺถํ วิปุลํ อุฬารํฯ
[45]
โส เวทชาโต อชฺฌภวิํ อมิตฺเต, ปุพฺเพว เม ชีวิตมาสิ จตฺตํ;
น หิ ชีวิเต อาลยํ กุพฺพมาโน, สูโร กยิรา สูรกิจฺจํ กทาจีติฯ
ขุรปฺปชาตกํ ปญฺจมํฯ
266. วาตคฺคสินฺธวชาตกํ (3-2-6)
[46]
เยนาสิ กิสิยา ปณฺฑุ, เยน ภตฺตํ น รุจฺจติ;
อยํ โส อาคโต ภตฺตา [ตาโต (สี. สฺยา. ปี.)], กสฺมา ทานิ ปลายสิฯ
[47]
สเจ [น โข (สฺยา. ก.)] ปนาทิเกเนว, สนฺถโว นาม ชายติ;
ยโส หายติ อิตฺถีนํ, ตสฺมา ตาต ปลายหํ [ปลายิหํ (สฺยา.), ปลายิตํ (ก.)]ฯ
[48]
ยสฺสสฺสินํ กุเล ชาตํ, อาคตํ ยา น อิจฺฉติ;
โสจติ จิรรตฺตาย, วาตคฺคมิว ภทฺทลีติ [กุนฺทลีติ (สี. ปี.), คทฺรภีติ (สฺยา.)]ฯ
วาตคฺคสินฺธวชาตกํ ฉฏฺฐํฯ
267. กกฺกฏกชาตกํ (3-2-7)
[49]
สิงฺคีมิโค อายตจกฺขุเนตฺโต, อฏฺฐิตฺตโจ วาริสโย อโลโม;
เตนาภิภูโต กปณํ รุทามิ, มา เหว มํ ปาณสมํ ชเหยฺย [ชเหยฺยา (ปี.) ชหา’ยฺเย (?)]ฯ
[50]
อยฺย น ตํ ชหิสฺสามิ, กุญฺชรํ สฏฺฐิหายนํ [กุญฺชร สฏฺฐิหายน (สี. ปี.)];
ปถพฺยา จาตุรนฺตาย, สุปฺปิโย โหสิ เม ตุวํฯ
[51]
เย กุฬีรา สมุทฺทสฺมิํ, คงฺคาย ยมุนาย [นมฺมทาย (สี. ปี.)] จ;
เตสํ ตฺวํ วาริโช เสฏฺโฐ, มุญฺจ โรทนฺติยา ปตินฺติฯ
กกฺกฏก [กุฬีร (ก.)] ชาตกํ สตฺตมํฯ
268. อารามทูสกชาตกํ (3-2-8)
[52]
โย เว สพฺพสเมตานํ, อหุวา เสฏฺฐสมฺมโต;
ตสฺสายํ เอทิสี ปญฺญา, กิเมว อิตรา ปชาฯ
[53]
เอวเมว ตุวํ พฺรหฺเม, อนญฺญาย วินินฺทสิ;
กถํ มูลํ อทิสฺวาน [กถํหิ มูลํ อทิตฺวา (สฺยา. ปี.)], รุกฺขํ ชญฺญา ปติฏฺฐิตํฯ
[54]
นาหํ ตุมฺเห วินินฺทามิ, เย จญฺเญ วานรา วเน;
วิสฺสเสโนว คารยฺโห, ยสฺสตฺถา รุกฺขโรปกาติฯ
อารามทูสกชาตกํ อฏฺฐมํฯ
269. สุชาตชาตกํ (3-2-9)
[55]
น หิ วณฺเณน สมฺปนฺนา, มญฺชุกา ปิยทสฺสนา;
ขรวาจา ปิยา โหติ, อสฺมิํ โลเก ปรมฺหิ จฯ
[56]
นนุ ปสฺสสิมํ กาฬิํ, ทุพฺพณฺณํ ติลกาหตํ;
โกกิลํ สณฺหวาเจน, พหูนํ ปาณินํ ปิยํฯ
[57]
ตสฺมา สขิลวาจสฺส, มนฺตภาณี อนุทฺธโต;
อตฺถํ ธมฺมญฺจ ทีเปติ, มธุรํ ตสฺส ภาสิตนฺติฯ
สุชาตชาตกํ นวมํฯ
270. อุลูกชาตกํ (3-2-10)
[58]
สพฺเพหิ กิร ญาตีหิ, โกสิโย อิสฺสโร กโต;
สเจ ญาตีหิ อนุญฺญาโต [ญาตีหนุญฺญาโต (สี. ปี.)], ภเณยฺยาหํ เอกวาจิกํฯ
[59]
ภณ สมฺม อนุญฺญาโต, อตฺถํ ธมฺมญฺจ เกวลํ;
สนฺติ หิ ทหรา ปกฺขี, ปญฺญวนฺโต ชุตินฺธราฯ
[60]
น เม รุจฺจติ ภทฺทํ โว [ภทนฺเต (ก.)], อุลูกสฺสาภิเสจนํ;
อกฺกุทฺธสฺส มุขํ ปสฺส, กถํ กุทฺโธ กริสฺสตีติฯ
อุลูกชาตกํ ทสมํฯ
ปทุมวคฺโค ทุติโยฯ
ตสฺสุทฺทานํ –
ปทุมุตฺตม นาคสิริวฺหยโน, ส-มหณฺณว ยูป ขุรปฺปวโร;
อถ ภทฺทลี กุญฺชร รุกฺข ปุน, ขรวาจ อุลูกวเรน ทสาติฯ
3. อุทปานวคฺโค
271. อุทปานทูสกชาตกํ (3-3-1)
[61]
อารญฺญิกสฺส อิสิโน, จิรรตฺตํ ตปสฺสิโน;
กิจฺฉากตํ อุทปานํ, กถํ สมฺม อวาหสิ [อวาหยิ (สี. ปี.), อปาหสิ (สฺยา.)]ฯ
[62]
เอส ธมฺโม สิงฺคาลานํ, ยํ ปิตฺวา โอหทามเส;
ปิตุปิตามหํ ธมฺโม, น ตํ [น นํ (สี. ปี.)] อุชฺฌาตุมรหสิฯ
[63]