อยํ อิสี อุปสมสํยเม รโต, ส ติฏฺฐติ [สนฺติฏฺฐติ (สี. ปี.)] สิสิรภเยน อฏฺฏิโต;
หนฺท อยํ ปวิสตุมํ อคารกํ, วิเนตุ สีตํ ทรถญฺจ เกวลํฯ
[201]
นายํ อิสี อุปสมสํยเม รโต, กปี อยํ ทุมวรสาขโคจโร;
โส ทูสโก โรสโก จาปิ ชมฺโม, สเจวเชมมฺปิ [สเจ อาวเช อิมมฺปิ] ทูเสยฺยคารนฺติ [ทูสเย ฆรนฺติ (สี. สฺยา. ปี.)]ฯ
กปิชาตกํ ทสมํฯ
สิงฺคาลวคฺโค ทสโมฯ
ตสฺสุทฺทานํ –
อถ ราชา สิงฺคาลวโร สุนโข, ตถา โกสิย อิจฺฉติ กาลฆโส;
อถ ทานวโรฏฺฐปิ สารถินา, ปุนมฺพวนญฺจ สิสิรกปิ ทสาติฯ
อถ วคฺคุทฺทานํ –
ทฬฺหญฺจ วคฺคํ อปเรน สนฺถวํ, กลฺยาณวคฺคาสทิโส จ รูหกํ;
นตํทฬฺห พีรณถมฺภกํ ปุน, กาสาวุปาหน สิงฺคาลเกน ทสาติฯ
ทุกนิปาตํ นิฏฺฐิตํฯ
3. ติกนิปาโต
1. สงฺกปฺปวคฺโค
251. สงฺกปฺปราคชาตกํ (3-1-1)
[1]
สงฺกปฺปราคโธเตน , วิตกฺกนิสิเตน จ;
นาลงฺกเตน ภทฺเรน [เนวาลงฺกตภทฺเรน (สฺยา.)], อุสุการากเตน จ [น อุสุการกเตน จ (สี. สฺยา. ปี.)]ฯ
[2]
น กณฺณายตมุตฺเตน, นาปิ โมรูปเสวินา;
เตนมฺหิ หทเย วิทฺโธ, สพฺพงฺคปริทาหินาฯ
[3]
อาเวธญฺจ น ปสฺสามิ, ยโต รุหิรมสฺสเว;
ยาว อโยนิโส จิตฺตํ, สยํ เม ทุกฺขมาภตนฺติฯ
สงฺกปฺปราคชาตกํ ปฐมํฯ
252. ติลมุฏฺฐิชาตกํ (3-1-2)
[4]
อชฺชาปิ เม ตํ มนสิ [สรสิ (ก.)], ยํ มํ ตฺวํ ติลมุฏฺฐิยา;
พาหาย มํ คเหตฺวาน, ลฏฺฐิยา อนุตาฬยิฯ
[5]
นนุ ชีวิเต น รมสิ, เยนาสิ พฺราหฺมณาคโต;
ยํ มํ พาหา คเหตฺวาน, ติกฺขตฺตุํ อนุตาฬยิฯ
[6]
อริโย อนริยํ กุพฺพนฺตํ [กุพฺพานํ (สี. ปี.), กุพฺพํ (สฺยา.)], โย ทณฺเฑน นิเสธติ;
สาสนํ ตํ น ตํ เวรํ, อิติ นํ ปณฺฑิตา วิทูติฯ
ติลมุฏฺฐิชาตกํ ทุติยํฯ
253. มณิกณฺฐชาตกํ (3-1-3)
[7]
มมนฺนปานํ วิปุลํ อุฬารํ, อุปฺปชฺชตีมสฺส มณิสฺส เหตุ;
ตํ เต น ทสฺสํ อติยาจโกสิ, น จาปิ เต อสฺสมมาคมิสฺสํฯ
[8]
สุสู ยถา สกฺขรโธตปาณี, ตาเสสิ มํ เสลํ ยาจมาโน;
ตํ เต น ทสฺสํ อติยาจโกสิ, น จาปิ เต อสฺสมมาคมิสฺสํฯ
[9]
น ตํ ยาเจ ยสฺส ปิยํ ชิคีเส [ชิคิํเส (สี. สฺยา. ปี.)], เทสฺโส โหติ อติยาจนาย;
นาโค มณิํ ยาจิโต พฺราหฺมเณน, อทสฺสนํเยว ตทชฺฌคมาติฯ
มณิกณฺฐชาตกํ ตติยํฯ
254. กุณฺฑกกุจฺฉิสินฺธวชาตกํ (3-1-4)
[10]
ภุตฺวา ติณปริฆาสํ, ภุตฺวา อาจามกุณฺฑกํ;
เอตํ เต โภชนํ อาสิ, กสฺมา ทานิ น ภุญฺชสิฯ
[11]
ยตฺถ โปสํ น ชานนฺติ, ชาติยา วินเยน วา;
พหุํ [ปหู (สี. ปี.), ปหุํ (สฺยา. ก.)] ตตฺถ มหาพฺรมฺเห, อปิ อาจามกุณฺฑกํฯ
[12]
ตฺวญฺจ โข มํ ปชานาสิ, ยาทิสายํ หยุตฺตโม;
ชานนฺโต ชานมาคมฺม, น เต ภกฺขามิ กุณฺฑกนฺติฯ
กุณฺฑกกุจฺฉิสินฺธวชาตกํ จตุตฺถํฯ
255. สุกชาตกํ (3-1-5)
[13]
ยาว โส มตฺตมญฺญาสิ, โภชนสฺมิํ วิหงฺคโม;
ตาว อทฺธานมาปาทิ, มาตรญฺจ อโปสยิฯ
[14]
ยโต จ โข พหุตรํ, โภชนํ อชฺฌวาหริ [อชฺฌุปาหริ (สี. ปี.)];
ตโต ตตฺเถว สํสีทิ, อมตฺตญฺญู หิ โส อหุฯ
[15]
ตสฺมา มตฺตญฺญุตา สาธุ, โภชนสฺมิํ อคิทฺธตา [อคิทฺธิตา (สฺยา. ก.)];
อมตฺตญฺญู หิ สีทนฺติ, มตฺตญฺญู จ น สีทเรติฯ
สุกชาตกํ ปญฺจมํฯ
256. ชรูทปานชาตกํ (3-1-6)
[16]
ชรูทปานํ ขณมานา, วาณิชา อุทกตฺถิกา;
อชฺฌคมุํ อยสํ โลหํ [อชฺฌคํสุ อโยโลหํ (สี. สฺยา. ปี.)], ติปุสีสญฺจ วาณิชา;
รชตํ ชาตรูปญฺจ, มุตฺตา เวฬูริยา พหูฯ
[17]
เต จ เตน อสนฺตุฏฺฐา, ภิยฺโย ภิยฺโย อขาณิสุํ;
เต ตตฺถาสีวิโส [ตตฺถ อาสีวิโส (ก.), ตตฺถปาสีวิโส (สฺยา.)] โฆโร, เตชสฺสี เตชสา หนิฯ
[18]
ตสฺมา ขเณ นาติขเณ, อติขาตํ [อติขณํ (ก.)] หิ ปาปกํ;
ขาเตน จ [ขเณน จ (ก.), ขณเนน (สฺยา.)] ธนํ ลทฺธํ, อติขาเตน [อติขเณน (ก.)] นาสิตนฺติฯ
ชรูทปานชาตกํ ฉฏฺฐํฯ
257. คามณิจนฺทชาตกํ (3-1-7)
[19]
นายํ ฆรานํ กุสโล, โลโล อยํ วลีมุโข;
กตํ กตํ โข ทูเสยฺย, เอวํธมฺมมิทํ กุลํฯ
[20]
นยิทํ จิตฺตวโต โลมํ, นายํ อสฺสาสิโก มิโค;
สิฏฺฐํ [สตฺถํ (สี. สฺยา. ปี.)] เม ชนสนฺเธน, นายํ กิญฺจิ วิชานติฯ
[21]
น มาตรํ ปิตรํ วา, ภาตรํ ภคินิํ สกํ;
ภเรยฺย ตาทิโส โปโส, สิฏฺฐํ ทสรเถน เมติฯ
คามณิจนฺท [คามณิจณฺฑ (สี. ปี.)] ชาตกํ สตฺตมํฯ
258. มนฺธาตุชาตกํ (3-1-8)
[22]
ยาวตา จนฺทิมสูริยา, ปริหรนฺติ ทิสา ภนฺติ วิโรจนา [วิโรจมานา (ก.)];
สพฺเพว ทาสา มนฺธาตุ, เย ปาณา ปถวิสฺสิตา [ปฐวินิสฺสิตา (สี. ปี.), ปฐวิสฺสิตา (สฺยา.)]ฯ
[23]
น กหาปณวสฺเสน, ติตฺติ กาเมสุ วิชฺชติ;
อปฺปสฺสาทา ทุขา กามา, อิติ วิญฺญาย ปณฺฑิโตฯ
[24]
อปิ ทิพฺเพสุ กาเมสุ, รติํ โส นาธิคจฺฉติ;
ตณฺหกฺขยรโต โหติ, สมฺมาสมฺพุทฺธสาวโกติฯ
มนฺธาตุชาตกํ อฏฺฐมํฯ
259. ติรีฏวจฺฉชาตกํ (3-1-9)
[25]
นยิมสฺส วิชฺชามยมตฺถิ กิญฺจิ, น พนฺธโว โน ปน เต สหาโย;
อถ เกน วณฺเณน ติรีฏวจฺโฉ [ติรีฏิวจฺโฉ (สฺยา. ก.)], เตทณฺฑิโก ภุญฺชติ อคฺคปิณฺฑํฯ
[26]
อาปาสุ [อาวาสุ (ก.)] เม ยุทฺธปราชิตสฺส, เอกสฺส กตฺวา วิวนสฺมิ โฆเร;
ปสารยี กิจฺฉคตสฺส ปาณิํ, เตนูทตาริํ ทุขสํปเรโตฯ
[27]
เอตสฺส กิจฺเจน อิธานุปตฺโต, เวสายิโน วิสยา ชีวโลเก;
ลาภารโห ตาต ติรีฏวจฺโฉ, เทถสฺส โภคํ ยชถญฺจ [ยชตญฺจ (สี. ปี.), ยชิตญฺจ (สฺยา.)] ยญฺญนฺติฯ
ติรีฏวจฺฉชาตกํ นวมํฯ
260. ทูตชาตกํ (3-1-10)
[28]
ยสฺสตฺถา ทูรมายนฺติ, อมิตฺตมปิ ยาจิตุํ;
ตสฺสูทรสฺสหํ ทูโต, มา เม กุชฺฌ [กุชฺฌิ (สี. ปี.)] รเถสภฯ
[29]
ยสฺส ทิวา จ รตฺโต จ, วสมายนฺติ มาณวา;
ตสฺสูทรสฺสหํ ทูโต, มา เม กุชฺฌ [กุชฺฌิ (สี. ปี.)] รเถสภฯ
[30]
ททามิ เต พฺราหฺมณ โรหิณีนํ, ควํ สหสฺสํ สห ปุงฺคเวน;
ทูโต หิ ทูตสฺส กถํ น ทชฺชํ, มยมฺปิ ตสฺเสว ภวาม ทูตาติฯ
ทูตชาตกํ ทสมํฯ
สงฺกปฺปวคฺโค ปฐโมฯ
ตสฺสุทฺทานํ –
อุสุการวโร ติลมุฏฺฐิ มณิ, หยราช วิหงฺคม อาสิวิโส;
ชนสนฺธ กหาปณวสฺส ปุน, ติริฏํ ปุน ทูตวเรน ทสาติฯ
2. ปทุมวคฺโค
261. ปทุมชาตกํ (3-2-1)
[31]
ยถา เกสา จ มสฺสู จ, ฉินฺนํ ฉินฺนํ วิรูหติ;
เอวํ รูหตุ เต นาสา, ปทุมํ เทหิ ยาจิโตฯ
[32]
ยถา สารทิกํ พีชํ, เขตฺเต วุตฺตํ วิรูหติ;
เอวํ รูหตุ เต นาสา, ปทุมํ เทหิ ยาจิโตฯ
[33]
อุโภปิ ปลปนฺเตเต [วิลปนฺเตเต (สฺยา. ก.)], อปิ ปทฺมานิ ทสฺสติ;
วชฺชุํ วา เต น วา วชฺชุํ, นตฺถิ นาสาย รูหนา;
เทหิ สมฺม ปทุมานิ, อหํ ยาจามิ ยาจิโตติฯ
ปทุมชาตกํ ปฐมํฯ
262. มุทุปาณิชาตกํ (3-2-2)
[34]
ปาณิ เจ มุทุโก จสฺส, นาโค จสฺส สุการิโต;
อนฺธกาโร จ วสฺเสยฺย, อถ นูน ตทา สิยาฯ
[35]