น เม ปิโย อาสิ อกณฺหเนตฺโต, ภายามิ ปจฺจาคมนาย ตสฺส;

อิโต คโต หิํเสยฺย มจฺจุราชํ, โส หิํสิโต อาเนยฺย ปุน อิธฯ

[181]

ทฑฺโฒ วาหสหสฺเสหิ, สิตฺโต ฆฏสเตหิ โส;

ปริกฺขตา จ สา ภูมิ, มา ภายิ นาคมิสฺสตีติฯ

มหาปิงฺคลชาตกํ ทสมํฯ

อุปาหนวคฺโค นวโมฯ

ตสฺสุทฺทานํ –

วรุปาหน ขุชฺช วิกณฺณกโก, อสิตาภุย ปญฺจมวจฺฉนโข;

ทิช เปมวรุตฺตมเอกปทํ, กุมินามุข ปิงฺคลเกน ทสาติฯ

10. สิงฺคาลวคฺโค

241. สพฺพทาฐิชาตกํ (2-10-1)

[182]

สิงฺคาโล มานถทฺโธ จ, ปริวาเรน อตฺถิโก;

ปาปุณิ มหติํ ภูมิํ, ราชาสิ สพฺพทาฐินํฯ

[183]

เอวเมว มนุสฺเสสุ, โย โหติ ปริวารวา;

โส หิ ตตฺถ มหา โหติ, สิงฺคาโล วิย ทาฐินนฺติฯ

สพฺพทาฐิชาตกํ ปฐมํฯ

242. สุนขชาตกํ (2-10-2)

[184]

พาโล วตายํ สุนโข, โย วรตฺตํ [โย จ โยตฺตํ (ก.)] น ขาทติ;

พนฺธนา จ ปมุญฺเจยฺย, อสิโต จ ฆรํ วเชฯ

[185]

อฏฺฐิตํ เม มนสฺมิํ เม, อโถ เม หทเย กตํ;

กาลญฺจ ปฏิกงฺขามิ, ยาว ปสฺสุปตู ชโน [ปสุปตุชฺชโน (สฺยา. ก.)]ฯ

สุนขชาตกํ ทุติยํฯ

243. คุตฺติลชาตกํ (2-10-3)

[186]

สตฺตตนฺติํ สุมธุรํ, รามเณยฺยํ อวาจยิํ;

โส มํ รงฺคมฺหิ อวฺเหติ, สรณํ เม โหหิ โกสิยฯ

[187]

อหํ ตํ สรณํ สมฺม [อหํ เต สรณํ โหมิ (วิ. ว. 328)], อหมาจริยปูชโก;

น ตํ ชยิสฺสติ สิสฺโส, สิสฺสมาจริย เชสฺสสีติฯ

คุตฺติลชาตกํ ตติยํฯ

244. วิคติจฺฉชาตกํ (2-10-4)

[188]

ยํ ปสฺสติ น ตํ อิจฺฉติ, ยญฺจ น ปสฺสติ ตํ กิริจฺฉติ;

มญฺญามิ จิรํ จริสฺสติ, น หิ ตํ ลจฺฉติ ยํ ส อิจฺฉติฯ

[189]

ยํ ลภติ น เตน ตุสฺสติ, ยญฺจ ปตฺเถติ ลทฺธํ หีเฬติ;

อิจฺฉา หิ อนนฺตโคจรา, วิคติจฺฉาน [วีติจฺฉานํ (สี. ปี.)] นโม กโรมเสติฯ

วิคติจฺฉ [วีติจฺฉ (สี. ปี.)] ชาตกํ จตุตฺถํฯ

245. มูลปริยายชาตกํ (2-10-5)

[190]

กาโล ฆสติ ภูตานิ, สพฺพาเนว สหตฺตนา;

โย จ กาลฆโส ภูโต, ส ภูตปจนิํ ปจิฯ

[191]

พหูนิ นรสีสานิ, โลมสานิ พฺรหานิ จ;

คีวาสุ ปฏิมุกฺกานิ, โกจิเทเวตฺถ กณฺณวาติฯ

มูลปริยายชาตกํ ปญฺจมํฯ

246. พาโลวาทชาตกํ (2-10-6)

[192]

หนฺตฺวา เฉตฺวา [ฌตฺวา (สี. ปี.), ฆตฺวา (สฺยา.)] วธิตฺวา จ, เทติ ทานํ อสญฺญโต;

เอทิสํ ภตฺตํ ภุญฺชมาโน, ส ปาปมุปลิมฺปติ [ส ปาเปน อุปลิปฺปติ (สี. ปี.)]ฯ

[193]

ปุตฺตทารมฺปิ เจ หนฺตฺวา, เทติ ทานํ อสญฺญโต;

ภุญฺชมาโนปิ สปฺปญฺโญ, น ปาปมุปลิมฺปตีติฯ

พาโลวาทชาตกํ ฉฏฺฐํฯ

247. ปาทญฺชลีชาตกํ (2-10-7)

[194]

อทฺธา ปาทญฺชลี สพฺเพ, ปญฺญาย อติโรจติ;

ตถา หิ โอฏฺฐํ ภญฺชติ, อุตฺตริํ นูน ปสฺสติฯ

[195]

นายํ ธมฺมํ อธมฺมํ วา, อตฺถานตฺถญฺจ พุชฺฌติ;

อญฺญตฺร โอฏฺฐนิพฺโภคา, นายํ ชานาติ กิญฺจนนฺติฯ

ปาทญฺชลีชาตกํ สตฺตมํฯ

248. กิํสุโกปมชาตกํ (2-10-8)

[196]

สพฺเพหิ กิํสุโก ทิฏฺโฐ, กิํนฺเวตฺถ วิจิกิจฺฉถ;

น หิ สพฺเพสุ ฐาเนสุ, สารถี ปริปุจฺฉิโตฯ

[197]

เอวํ สพฺเพหิ ญาเณหิ, เยสํ ธมฺมา อชานิตา;

เต เว ธมฺเมสุ กงฺขนฺติ, กิํสุกสฺมิํว ภาตโรติฯ

กิํสุโกปมชาตกํ อฏฺฐมํฯ

249. สาลกชาตกํ (2-10-9)

[198]

เอกปุตฺตโก ภวิสฺสสิ, ตฺวญฺจ โน เหสฺสสิ อิสฺสโร กุเล;

โอโรห ทุมสฺมา สาลก, เอหิ ทานิ ฆรกํ วเชมเสฯ

[199]

นนุ มํ สุหทโยติ [นนุ มํ หทเยติ (สี. ปี.)] มญฺญสิ, ยญฺจ มํ หนสิ เวฬุยฏฺฐิยา;

ปกฺกมฺพวเน รมามเส, คจฺฉ ตฺวํ ฆรกํ ยถาสุขนฺติฯ

สาลกชาตกํ นวมํฯ

250. กปิชาตกํ (2-10-10)

[200]

อยํ อิสี อุปสมสํยเม รโต, ส ติฏฺฐติ [สนฺติฏฺฐติ (สี. ปี.)] สิสิรภเยน อฏฺฏิโต;

หนฺท อยํ ปวิสตุมํ อคารกํ, วิเนตุ สีตํ ทรถญฺจ เกวลํฯ

[201]

นายํ อิสี อุปสมสํยเม รโต, กปี อยํ ทุมวรสาขโคจโร;

โส ทูสโก โรสโก จาปิ ชมฺโม, สเจวเชมมฺปิ [สเจ อาวเช อิมมฺปิ] ทูเสยฺยคารนฺติ [ทูสเย ฆรนฺติ (สี. สฺยา. ปี.)]ฯ

กปิชาตกํ ทสมํฯ

สิงฺคาลวคฺโค ทสโมฯ

ตสฺสุทฺทานํ –

อถ ราชา สิงฺคาลวโร สุนโข, ตถา โกสิย อิจฺฉติ กาลฆโส;

อถ ทานวโรฏฺฐปิ สารถินา, ปุนมฺพวนญฺจ สิสิรกปิ ทสาติฯ

อถ วคฺคุทฺทานํ –

ทฬฺหญฺจ วคฺคํ อปเรน สนฺถวํ, กลฺยาณวคฺคาสทิโส จ รูหกํ;

นตํทฬฺห พีรณถมฺภกํ ปุน, กาสาวุปาหน สิงฺคาลเกน ทสาติฯ

ทุกนิปาตํ นิฏฺฐิตํฯ

3. ติกนิปาโต

1. สงฺกปฺปวคฺโค

251. สงฺกปฺปราคชาตกํ (3-1-1)

[1]