[อภิธาวถา จ ปตถา จ, วิวิธวินทิตา จ ทนฺติภิ; วตฺตตชฺช ตุมุโล โฆโส, ยถา วิชฺชุตา ชลธรสฺส คชฺชโตติ; (สี. ปี. ก.)] อภิธาวถ จูปธาวถ จ [อภิธาวถา จุปฺปตถา จ (สฺยา.)], วิวิธา วินาทิตา [วินาทิตตฺถ (ก.)] วทนฺติภิ;
วตฺตตชฺช ตุมุโล โฆโส ยถา, วิชฺชุลตา ชลธรสฺส คชฺชโตติ [อภิธาวถา จ ปตถา จ, วิวิธวินทิตา จ ทนฺติภิ; วตฺตตชฺช ตุมุโล โฆโส, ยถา วิชฺชุตา ชลธรสฺส คชฺชโตติ; (สี. ปี. ก.)]ฯ
ปลายิตชาตกํ นวมํฯ
230. ทุติยปลายิตชาตกํ (2-8-10)
[159]
ธชมปริมิตํ อนนฺตปารํ, ทุปฺปสหํธงฺเกหิ สาครํว [สาครมิว (สี. สฺยา. ปี.)];
คิริมิวอนิเลน ทุปฺปสยฺโห [ทุปฺปสโห (สี. ปี. ก.)], ทุปฺปสโห อหมชฺชตาทิเสนฯ
[160]
มา พาลิยํ วิลปิ [วิปฺปลปิ (พหูสุ)] น หิสฺส ตาทิสํ, วิฑยฺหเส [วิฬยฺหเส (สี. ปี.)] น หิ ลภเส นิเสธกํ;
อาสชฺชสิ คชมิว เอกจารินํ, โย ตํ ปทา นฬมิว โปถยิสฺสตีติฯ
ทุติยปลายิตชาตกํ ทสมํฯ
กาสาววคฺโค อฏฺฐโมฯ
ตสฺสุทฺทานํ –
วรวตฺถวโจ ทุมขีณผลํ, จตุโรธมฺมวรํ ปุริสุตฺตม;
ธงฺกมคธา จ ตโยคิรินาม, คชคฺควโร ธชวเรน ทสาติฯ
9. อุปาหนวคฺโค
231. อุปาหนชาตกํ (2-9-1)
[161]
ยถาปิ กีตา ปุริสสฺสุปาหนา, สุขสฺส อตฺถาย ทุขํ อุทพฺพเห;
ฆมฺมาภิตตฺตา ถลสา ปปีฬิตา, ตสฺเสว ปาเท ปุริสสฺส ขาทเรฯ
[162]
เอวเมว โย ทุกฺกุลีโน อนริโย, ตมฺมาก [ตมฺหาก (สี.), ตุมฺหาก (สฺยา. ปี.)] วิชฺชญฺจ สุตญฺจ อาทิย;
ตเมว โส ตตฺถ สุเตน ขาทติ, อนริโย วุจฺจติ ทุปาหนูปโมติ [ปานทูปโมติ (สี. ปี.)]ฯ
อุปาหนชาตกํ ปฐมํฯ
232. วีณาคุณชาตกํ (2-9-2)
[163]
เอกจินฺติโต ยมตฺโถ, พาโล อปริณายโก;
น หิ ขุชฺเชน วาเมน, โภติ สงฺคนฺตุมรหสิฯ
[164]
ปุริสูสภํ มญฺญมานา, อหํ ขุชฺชมกามยิํ;
โสยํ สํกุฏิโต เสติ, ฉินฺนตนฺติ ยถา วิณาติ [ถุณาติ (สี.)]ฯ
วีณาคุณชาตกํ ทุติยํฯ
233. วิกณฺณชาตกํ (2-9-3)
[165]
กามํ ยหิํ อิจฺฉสิ เตน คจฺฉ, วิทฺโธสิ มมฺมมฺหิ [มมสฺมิ (ก.)] วิกณฺณเกน;
หโตสิ ภตฺเตน สุวาทิเตน [สวาทิเตน (สี. สฺยา. ปี.)], โลโล จ มจฺเฉ อนุพนฺธมาโนฯ
[166]
เอวมฺปิ โลกามิสํ โอปตนฺโต, วิหญฺญตี จิตฺตวสานุวตฺตี;
โส หญฺญติ ญาติสขาน มชฺเฌ, มจฺฉานุโค โสริว สุํสุมาโรติ [สุสุมาโร (ก.)]ฯ
วิกณฺณชาตกํ ตติยํฯ
234. อสิตาภูชาตกํ (2-9-4)
[167]
ตฺวเมว ทานิมกร [มกริ (สฺยา.), มกรา (ก. สี.)], ยํ กาโม พฺยคมา ตยิ;
โสยํ อปฺปฏิสนฺธิโก, ขรฉินฺนํว เรนุกํ [เรรุกํ (สี. ปี.)]ฯ
[168]
อตฺริจฺฉํ [อตฺริจฺฉา (สี. สฺยา. ปี.)] อติโลเภน, อติโลภมเทน จ;
เอวํ หายติ อตฺถมฺหา, อหํว อสิตาภุยาติฯ
อสิตาภูชาตกํ จตุตฺถํฯ
235. วจฺฉนขชาตกํ (2-9-5)
[169]
สุขา ฆรา วจฺฉนข, สหิรญฺญา สโภชนา;
ยตฺถ ภุตฺวา ปิวิตฺวา จ, สเยยฺยาถ อนุสฺสุโกฯ
[170]
ฆรา นานีหมานสฺส, ฆรา นาภณโต มุสา;
ฆรา นาทินฺนทณฺฑสฺส, ปเรสํ อนิกุพฺพโต [อนิกฺรุพฺพโต (ก.)];
เอวํ ฉิทฺทํ ทุรภิสมฺภวํ [ทุรภิภวํ (สี. ปี.)], โก ฆรํ ปฏิปชฺชตีติฯ
วจฺฉนขชาตกํ ปญฺจมํฯ
236. พกชาตกํ (2-9-6)
[171]
ภทฺทโก วตยํ ปกฺขี, ทิโช กุมุทสนฺนิโภ;
วูปสนฺเตหิ ปกฺเขหิ, มนฺทมนฺโทว ฌายติฯ
[172]
นาสฺส สีลํ วิชานาถ, อนญฺญาย ปสํสถ;
อมฺเห ทิโช น ปาเลติ, เตน ปกฺขี น ผนฺทตีติฯ
พกชาตกํ ฉฏฺฐํฯ
237. สาเกตชาตกํ (2-9-7)
[173]
โก นุ โข ภควา เหตุ, เอกจฺเจ อิธ ปุคฺคเล;
อตีว หทยํ นิพฺพาติ, จิตฺตญฺจาปิ ปสีทติฯ
[174]
ปุพฺเพว สนฺนิวาเสน, ปจฺจุปฺปนฺนหิเตน วา;
เอวํ ตํ ชายเต เปมํ, อุปฺปลํว ยโถทเกติฯ
สาเกตชาตกํ สตฺตมํฯ
238. เอกปทชาตกํ (2-9-8)
[175]
อิงฺฆ เอกปทํ ตาต, อเนกตฺถปทสฺสิตํ [ปทนิสฺสิตํ (สี. ปี.)];
กิญฺจิ สงฺคาหิกํ พฺรูสิ, เยนตฺเถ สาธเยมเสฯ
[176]
ทกฺเขยฺเยกปทํ ตาต, อเนกตฺถปทสฺสิตํ;
ตญฺจ สีเลน สญฺญุตฺตํ, ขนฺติยา อุปปาทิตํ;
อลํ มิตฺเต สุขาเปตุํ, อมิตฺตานํ ทุขาย จาติฯ
เอกปทชาตกํ อฏฺฐมํฯ
239. หริตมณฺฑูกชาตกํ (2-9-9)
[177]
อาสีวิสมฺปิ มํ [อาสีวิสํ มมํ (สี. ปี.)] สนฺตํ, ปวิฏฺฐํ กุมินามุขํ;
รุจฺจเต หริตามาตา, ยํ มํ ขาทนฺติ มจฺฉกาฯ
[178]
วิลุมฺปเตว ปุริโส, ยาวสฺส อุปกปฺปติ;
ยทา จญฺเญ วิลุมฺปนฺติ, โส วิลุตฺโต วิลุมฺปตีติ [วิลุปฺปตีติ (?)]ฯ
หริตมณฺฑูกชาตกํ นวมํฯ
240. มหาปิงฺคลชาตกํ (2-9-10)
[179]
สพฺโพ ชโน หิํสิโต ปิงฺคเลน, ตสฺมิํ มเต ปจฺจยา [ปจฺจยํ (สี. สฺยา. ปี.)] เวทยนฺติ;
ปิโย นุ เต อาสิ อกณฺหเนตฺโต, กสฺมา นุ ตฺวํ โรทสิ ทฺวารปาลฯ
[180]
น เม ปิโย อาสิ อกณฺหเนตฺโต, ภายามิ ปจฺจาคมนาย ตสฺส;
อิโต คโต หิํเสยฺย มจฺจุราชํ, โส หิํสิโต อาเนยฺย ปุน อิธฯ
[181]
ทฑฺโฒ วาหสหสฺเสหิ, สิตฺโต ฆฏสเตหิ โส;
ปริกฺขตา จ สา ภูมิ, มา ภายิ นาคมิสฺสตีติฯ
มหาปิงฺคลชาตกํ ทสมํฯ
อุปาหนวคฺโค นวโมฯ
ตสฺสุทฺทานํ –
วรุปาหน ขุชฺช วิกณฺณกโก, อสิตาภุย ปญฺจมวจฺฉนโข;
ทิช เปมวรุตฺตมเอกปทํ, กุมินามุข ปิงฺคลเกน ทสาติฯ
10. สิงฺคาลวคฺโค
241. สพฺพทาฐิชาตกํ (2-10-1)
[182]
สิงฺคาโล มานถทฺโธ จ, ปริวาเรน อตฺถิโก;
ปาปุณิ มหติํ ภูมิํ, ราชาสิ สพฺพทาฐินํฯ
[183]
เอวเมว มนุสฺเสสุ, โย โหติ ปริวารวา;
โส หิ ตตฺถ มหา โหติ, สิงฺคาโล วิย ทาฐินนฺติฯ
สพฺพทาฐิชาตกํ ปฐมํฯ
242. สุนขชาตกํ (2-10-2)
[184]
พาโล วตายํ สุนโข, โย วรตฺตํ [โย จ โยตฺตํ (ก.)] น ขาทติ;
พนฺธนา จ ปมุญฺเจยฺย, อสิโต จ ฆรํ วเชฯ
[185]