เมนู

อถ ลกฺขณ สาข ธิรตฺถุ ปุน, น กิรตฺถิ รเสหิ ขราทิยา;

อติโภติ วร [รส (สพฺพตฺถ)] มาลุต ปาณ, มุจฺเจน นฬอวฺหยเนน ภวนฺติ ทสาติฯ

3. กุรุงฺควคฺโค

21. กุรุงฺคมิคชาตกํ

[21]

ญาตเมตํ กุรุงฺคสฺส, ยํ ตฺวํ เสปณฺณิ สิยฺยสิ [เสยฺยสิ (สี. สฺยา. ปี.)];

อญฺญํ เสปณฺณิ คจฺฉามิ, น เม เต รุจฺจเต ผลนฺติฯ

กุรุงฺคมิคชาตกํ ปฐมํฯ

22. กุกฺกุรชาตกํ

[22]

เย กุกฺกุรา ราชกุลมฺหิ วทฺธา, โกเลยฺยกา วณฺณพลูปปนฺนา;

เตเม น วชฺฌา มยมสฺม วชฺฌา, นายํ สฆจฺจา ทุพฺพลฆาติกายนฺติฯ

กุกฺกุรชาตกํ ทุติยํฯ

23. โคชานียชาตกํ

[23]

อปิ ปสฺเสน เสมาโน, สลฺเลภิ สลฺลลีกโต;

เสยฺโยว วฬวา โคโช [โภชฺโช (สี.), โภชฺโฌ (สฺยา. ปี.)], ยุญฺช มญฺเญว สารถีติฯ

โคชานีย [โภชาชานีย (สี. สฺยา. ปี.)] ชาตกํ ตติยํฯ

24. อาชญฺญชาตกํ

[24]

ยทา ยทา ยตฺถ ยทา, ยตฺถ ยตฺถ ยทา ยทา;

อาชญฺโญ กุรุเต เวคํ, หายนฺติ ตตฺถ วาฬวาติฯ

อาชญฺญชาตกํ จตุตฺถํฯ

25. ติตฺถชาตกํ

[25]

อญฺญมญฺเญหิ ติตฺเถหิ, อสฺสํ ปาเยหิ สารถิ;

อจฺจาสนสฺส ปุริโส, ปายาสสฺสปิ ตปฺปตีติฯ

ติตฺถชาตกํ ปญฺจมํฯ

26. มหิฬามุขชาตกํ

[26]

ปุราณโจราน วโจ นิสมฺม, มหิฬามุโข โปถยมนฺวจารี;

สุสญฺญตานญฺหิ วโจ นิสมฺม, คชุตฺตโม สพฺพคุเณสุ อฏฺฐาติฯ

มหิฬามุขชาตกํ ฉฏฺฐํฯ

27. อภิณฺหชาตกํ

[27]

นาลํ กพฬํ ปทาตเว, น จ ปิณฺฑํ น กุเส น ฆํสิตุํ;

มญฺญามิ อภิณฺหทสฺสนา, นาโค สฺเนหมกาสิ [สิเนหมกาสิ (สี. สฺยา. ปี.)] กุกฺกุเรติฯ

อภิณฺหชาตกํ สตฺตมํฯ

28. นนฺทิวิสาลชาตกํ

[28]

มนุญฺญเมว ภาเสยฺย, นามนุญฺญํ กุทาจนํ;

มนุญฺญํ ภาสมานสฺส, ครุํ ภารํ อุททฺธริ;

ธนญฺจ นํ อลาเภสิ, เตน จตฺตมโน อหูติฯ

นนฺทิวิสาลชาตกํ อฏฺฐมํฯ

29. กณฺหชาตกํ

[29]

ยโต ยโต ครุ ธุรํ, ยโต คมฺภีรวตฺตนี;

ตทาสฺสุ กณฺหํ ยุญฺชนฺติ, สฺวาสฺสุ ตํ วหเต ธุรนฺติฯ

กณฺหชาตกํ นวมํฯ