อปิรุหก รูปวตี มุสโล, ปวสนฺติ สปญฺจมโปกฺขรณี;
อถ มุตฺติมวาณิช อุมฺหยเต, จิรอาคต โกฏฺฐ สรีร ทสาติฯ
6. นตํทฬฺหวคฺโค
201. พนฺธนาคารชาตกํ (2-6-1)
[101]
น ตํ ทฬฺหํ พนฺธนมาหุ ธีรา, ยทายสํ ทารุชปพฺพชญฺจ [พพฺพชญฺจ (สี.)];
สารตฺตรตฺตา มณิกุณฺฑเลสุ, ปุตฺเตสุ ทาเรสุ จ ยา อเปกฺขาฯ
[102]
เอตํ ทฬฺหํ พนฺธนมาหุ ธีรา, โอหารินํ สิถิลํ ทุปฺปมุญฺจํ;
เอตมฺปิ เฉตฺวาน วชนฺติ ธีรา, อนเปกฺขิโน กามสุขํ ปหายาติฯ
พนฺธนาคารชาตกํ ปฐมํฯ
202. เกฬิสีลชาตกํ (2-6-2)
[103]
หํสา โกญฺจา มยูรา จ, หตฺถโย [หตฺถิโน (สี.), หตฺถิโย (สฺยา. ปี.)] ปสทา มิคา;
สพฺเพ สีหสฺส ภายนฺติ, นตฺถิ กายสฺมิ ตุลฺยตาฯ
[104]
เอวเมว มนุสฺเสสุ, ทหโร เจปิ ปญฺญวา;
โส หิ ตตฺถ มหา โหติ, เนว พาโล สรีรวาติฯ
เกฬิสีลชาตกํ ทุติยํฯ
203. ขณฺฑชาตกํ (2-6-3)
[105]
วิรูปกฺเขหิ เม เมตฺตํ, เมตฺตํ เอราปเถหิ เม;
ฉพฺยาปุตฺเตหิ เม เมตฺตํ, เมตฺตํ กณฺหาโคตมเกหิ จฯ
อปาทเกหิ เม เมตฺตํ, เมตฺตํ ทฺวิปาทเกหิ เม;
จตุปฺปเทหิ เม เมตฺตํ, เมตฺตํ พหุปฺปเทหิ เมฯ
มา มํ อปาทโก หิํสิ, มา มํ หิํสิ ทฺวิปาทโก;
มา มํ จตุปฺปโท หิํสิ, มา มํ หิํสิ พหุปฺปโทฯ
สพฺเพ สตฺตา สพฺเพ ปาณา, สพฺเพ ภูตา จ เกวลา;
สพฺเพ ภทฺรานิ ปสฺสนฺตุ, มา กญฺจิ [กิญฺจิ (สฺยา. ก.)] ปาปมาคมาฯ
[106]
อปฺปมาโณ พุทฺโธ, อปฺปมาโณ ธมฺโม;
อปฺปมาโณ สงฺโฆ, ปมาณวนฺตานิ สรีสปานิ [สิริสปานิ (สี. สฺยา. ปี.)];
อหิวิจฺฉิกสตปที, อุณฺณนาภิ [อุณฺณานาภิ (สี. สฺยา. ปี.)] สรพูมูสิกาฯ
กตา เม รกฺขา กตา เม ปริตฺตา, ปฏิกฺกมนฺตุ ภูตานิ;
โสหํ นโม ภควโต, นโม สตฺตนฺนํ สมฺมาสมฺพุทฺธานนฺติฯ
ขณฺฑชาตกํ ตติยํฯ
204. วีรกชาตกํ (2-6-4)
[107]
อปิ วีรก ปสฺเสสิ, สกุณํ มญฺชุภาณกํ;
มยูรคีวสงฺกาสํ, ปติํ มยฺหํ สวิฏฺฐกํฯ
[108]
อุทกถลจรสฺส ปกฺขิโน, นิจฺจํ อามกมจฺฉโภชิโน;
ตสฺสานุกรํ สวิฏฺฐโก, เสวาเล ปลิคุณฺฐิโต มโตติฯ
วีรกชาตกํ จตุตฺถํฯ
205. คงฺเคยฺยชาตกํ (2-6-5)
[109]
โสภติ มจฺโฉ คงฺเคยฺโย, อโถ โสภติ ยามุโน [โสภนฺติ มจฺฉา คงฺเคยฺยา, อโถ โสภนฺติ ยามุนา (สฺยา. ปี.)];
จตุปฺปโทยํ ปุริโส, นิคฺโรธปริมณฺฑโล;
อีสกายต [อีสมายต (ก.)] คีโว จ, สพฺเพว อติโรจติฯ
[110]
ยํ ปุจฺฉิโต น ตํ อกฺขาสิ [อกฺขา (สี. สฺยา. ปี.)], อญฺญํ อกฺขาสิ [อกฺขาติ (สฺยา. ปี.)] ปุจฺฉิโต;
อตฺตปฺปสํสโก โปโส, นายํ อสฺมาก รุจฺจตีติฯ
คงฺเคยฺยชาตกํ ปญฺจมํฯ
206. กุรุงฺคมิคชาตกํ (2-6-6)
[111]
อิงฺฆ วทฺธมยํ [วทฺธมยํ (สี. สฺยา. ปี.)] ปาสํ, ฉินฺท ทนฺเตหิ กจฺฉป;
อหํ ตถา กริสฺสามิ, ยถา เนหิติ ลุทฺทโกฯ
[112]
กจฺฉโป ปาวิสี วาริํ, กุรุงฺโค ปาวิสี วนํ;
สตปตฺโต ทุมคฺคมฺหา, ทูเร ปุตฺเต อปานยีติฯ
กุรุงฺคมิคชาตกํ ฉฏฺฐํฯ
207. อสฺสกชาตกํ (2-6-7)
[113]
อยมสฺสกราเชน, เทโส วิจริโต มยา;
อนุกามย กาเมน [อนุกามยวนุกาเมน (สี. ปี.)], ปิเยน ปตินา สหฯ
[114]
นเวน สุขทุกฺเขน, โปราณํ อปิธียติ [อปิถียติ (สี. ปี.), อปิถิยฺยติ (สฺยา.)];
ตสฺมา อสฺสกรญฺญาว, กีโฏ ปิยตโร มมาติฯ
อสฺสกชาตกํ สตฺตมํฯ
208. สุสุมารชาตกํ (2-6-8)
[115]
อลํ เมเตหิ อมฺเพหิ, ชมฺพูหิ ปนเสหิ จ;
ยานิ ปารํ สมุทฺทสฺส, วรํ มยฺหํ อุทุมฺพโรฯ
[116]
มหตี วต เต โพนฺทิ, น จ ปญฺญา ตทูปิกา;
สุสุมาร [สุํสุมาร (สี. สฺยา. ปี.)] วญฺจิโต เมสิ, คจฺฉ ทานิ ยถาสุขนฺติฯ
สุสุมารชาตกํ อฏฺฐมํฯ
209. กุกฺกุฏชาตกํ (2-6-9)
[117]
ทิฏฺฐา มยา วเน รุกฺขา, อสฺสกณฺณา วิภีฏกา [วิเภทกา (สฺยา. ก.)];
น ตานิ เอวํ สกฺกนฺติ, ยถา ตฺวํ รุกฺข สกฺกสิฯ
[118]
ปุราณกุกฺกุโฏ [กกฺกโร (สี. สฺยา. ปี.)] อยํ, เภตฺวา ปญฺชรมาคโต;
กุสโล วาฬปาสานํ, อปกฺกมติ ภาสตีติฯ
กุกฺกุฏ [กกฺกร (สี. สฺยา. ปี.)] ชาตกํ นวมํฯ
210. กนฺทคลกชาตกํ (2-6-10)
[119]
อมฺโภ โก นาม ยํ รุกฺโข, สินฺนปตฺโต [สีนปตฺโต (สี. ปี.)] สกณฺฏโก;
ยตฺถ เอกปฺปหาเรน, อุตฺตมงฺคํ วิภิชฺชิตํ [วิสาฏิกํ (สี. สฺยา. ปี.), วิฆาฏิตํ (สี. นิยฺย)]ฯ
[120]
อจาริ วตายํ วิตุทํ วนานิ, กฏฺฐงฺครุกฺเขสุ อสารเกสุ;
อถาสทา ขทิรํ ชาตสารํ [ชาติสารํ (ก.)], ยตฺถพฺภิทา ครุโฬ อุตฺตมงฺคนฺติฯ
กนฺทคลก [กนฺทลก (ก.)] ชาตกํ ทสมํฯ
นตํทฬฺหวคฺโค ฉฏฺโฐฯ
ตสฺสุทฺทานํ –
ทฬฺหพนฺธน หํสวโร จ ปุน, วิรูปกฺข สวิฏฺฐก มจฺฉวโร;
สกุรุงฺค สอสฺสก อมฺพวโร, ปุน กุกฺกุฏโก ครุเฬน ทสาติฯ
7. พีรณถมฺภวคฺโค
211. โสมทตฺตชาตกํ (2-7-1)
[121]
อกาสิ โยคฺคํ ธุวมปฺปมตฺโต, สํวจฺฉรํ พีรณถมฺภกสฺมิํ;
พฺยากาสิ สญฺญํ ปริสํ วิคยฺห, น นิยฺยโม ตายติ อปฺปปญฺญํฯ
[122]