16. ติปลฺลตฺถมิคชาตกํ
[16]
มิคํ ติปลฺลตฺถ [ติปลฺลตฺต (ก.)] มเนกมายํ, อฏฺฐกฺขุรํ อฑฺฒรตฺตาปปายิํ [อฑฺฒรตฺตาวปายิํ (สี. ปี.)];
เอเกน โสเตน ฉมาสฺสสนฺโต, ฉหิ กลาหิติโภติ [กลาหติโภติ (สี. สฺยา. ปี.)] ภาคิเนยฺโยติฯ
ติปลฺลตฺถมิคชาตกํ ฉฏฺฐํฯ
17. มาลุตชาตกํ
[17]
กาเฬ วา ยทิ วา ชุณฺเห, ยทา วายติ มาลุโต;
วาตชานิ หิ สีตานิ, อุโภตฺถมปราชิตาติฯ
มาลุตชาตกํ สตฺตมํฯ
18. มตกภตฺตชาตกํ
[18]
เอวํ เจ สตฺตา ชาเนยฺยุํ, ทุกฺขายํ ชาติสมฺภโว;
น ปาโณ ปาณินํ หญฺเญ, ปาณฆาตี หิ โสจตีติฯ
มตกภตฺตชาตกํ อฏฺฐมํฯ
19. อายาจิตภตฺตชาตกํ
[19]
สเจ มุจฺเจ [มุญฺเจ (สี. สฺยา. ปี.)] เปจฺจ มุจฺเจ [มุญฺเจ (สี. สฺยา. ปี.)], มุจฺจมาโน หิ พชฺฌติ;
น เหวํ ธีรา มุจฺจนฺติ, มุตฺติ พาลสฺส พนฺธนนฺติฯ
อายาจิตภตฺตชาตกํ นวมํฯ
20. นฬปานชาตกํ
[20]
ทิสฺวา ปทมนุตฺติณฺณํ, ทิสฺวาโนตริตํ ปทํ;
นเฬน วาริํ ปิสฺสาม [ปิวิสฺสาม (สี. สฺยา. ปี.)], เนว [น จ (ก.)] มํ ตฺวํ วธิสฺสสีติฯ
นฬปานชาตกํ ทสมํฯ
สีลวคฺโค ทุติโยฯ
ตสฺสุทฺทานํ –
อถ ลกฺขณ สาข ธิรตฺถุ ปุน, น กิรตฺถิ รเสหิ ขราทิยา;
อติโภติ วร [รส (สพฺพตฺถ)] มาลุต ปาณ, มุจฺเจน นฬอวฺหยเนน ภวนฺติ ทสาติฯ
3. กุรุงฺควคฺโค
21. กุรุงฺคมิคชาตกํ
[21]
ญาตเมตํ กุรุงฺคสฺส, ยํ ตฺวํ เสปณฺณิ สิยฺยสิ [เสยฺยสิ (สี. สฺยา. ปี.)];
อญฺญํ เสปณฺณิ คจฺฉามิ, น เม เต รุจฺจเต ผลนฺติฯ
กุรุงฺคมิคชาตกํ ปฐมํฯ
22. กุกฺกุรชาตกํ
[22]
เย กุกฺกุรา ราชกุลมฺหิ วทฺธา, โกเลยฺยกา วณฺณพลูปปนฺนา;
เตเม น วชฺฌา มยมสฺม วชฺฌา, นายํ สฆจฺจา ทุพฺพลฆาติกายนฺติฯ
กุกฺกุรชาตกํ ทุติยํฯ
23. โคชานียชาตกํ
[23]
อปิ ปสฺเสน เสมาโน, สลฺเลภิ สลฺลลีกโต;
เสยฺโยว วฬวา โคโช [โภชฺโช (สี.), โภชฺโฌ (สฺยา. ปี.)], ยุญฺช มญฺเญว สารถีติฯ
โคชานีย [โภชาชานีย (สี. สฺยา. ปี.)] ชาตกํ ตติยํฯ
24. อาชญฺญชาตกํ
[24]
ยทา ยทา ยตฺถ ยทา, ยตฺถ ยตฺถ ยทา ยทา;
อาชญฺโญ กุรุเต เวคํ, หายนฺติ ตตฺถ วาฬวาติฯ
อาชญฺญชาตกํ จตุตฺถํฯ