สีหงฺคุลี สีหนโข, สีหปาทปติฏฺฐิโต;
โส สีโห สีหสงฺฆมฺหิ, เอโก นทติ อญฺญถาฯ
[76]
มา ตฺวํ นทิ ราชปุตฺต, อปฺปสทฺโท วเน วส;
สเรน โข [มา (ก.)] ตํ ชาเนยฺยุํ, น หิ เต เปตฺติโก สโรติฯ
สีหโกตฺถุชาตกํ อฏฺฐมํฯ
189. สีหจมฺมชาตกํ (2-4-9)
[77]
เนตํ สีหสฺส นทิตํ, น พฺยคฺฆสฺส น [พฺยคฺฆสฺส น จ (ก.)] ทีปิโน;
ปารุโต สีหจมฺเมน, ชมฺโม นทติ คทฺรโภฯ
[78]
จิรมฺปิ โข ตํ ขาเทยฺย, คทฺรโภ หริตํ ยวํ;
ปารุโต สีหจมฺเมน, รวมาโนว ทูสยีติฯ
สีหจมฺมชาตกํ นวมํฯ
190. สีลานิสํสชาตกํ (2-4-10)
[79]
ปสฺส สทฺธาย สีลสฺส, จาคสฺส จ อยํ ผลํ;
นาโค นาวาย วณฺเณน, สทฺธํ วหตุปาสกํฯ
[80]
สพฺภิเรว สมาเสถ, สพฺภิ กุพฺเพถ สนฺถวํ;
สตญฺหิ สนฺนิวาเสน, โสตฺถิํ คจฺฉติ นฺหาปิโตติฯ
สีลานิสํสชาตกํ ทสมํฯ
อสทิสวคฺโค จตุตฺโถฯ
ตสฺสุทฺทานํ –
ธนุคฺคห กุญฺชร อปฺปรโส, คิริทตฺตมนาวิลจิตฺตวรํ;
ทธิวาหน ชมฺพูก สีหนโข, หริตยว นาควเรน ทสาติฯ
5. รุหกวคฺโค
191. รุหกชาตกํ (2-5-1)
[81]
อปิ [อมฺโภ (สฺยา. ก. สี.)] รุหก ฉินฺนาปิ, ชิยา สนฺธียเต ปุน;
สนฺธียสฺสุ ปุราณิยา, มา โกธสฺส วสํ คมิฯ
[82]
วิชฺชมาเนสุ วาเกสุ [วิชฺชมานาสุ มรุวาสุ (สี.), วิชฺชมานาสุ มรูทฺวาสุ (ปี.)], วิชฺชมาเนสุ การิสุ;
อญฺญํ ชิยํ กริสฺสามิ, อลญฺเญว ปุราณิยาติฯ
รุหกชาตกํ ปฐมํฯ
192. สิริกาฬกณฺณิชาตกํ (2-5-2)
[83]
อิตฺถี สิยา รูปวตี, สา จ สีลวตี สิยา;
ปุริโส ตํ น อิจฺเฉยฺย, สทฺทหาสิ มโหสธฯ
[84]
สทฺทหามิ มหาราช, ปุริโส ทุพฺภโค สิยา;
สิรี จ กาฬกณฺณี จ, น สเมนฺติ กุทาจนนฺติฯ
สิริกาฬกณฺณิชาตกํ ทุติยํฯ
193. จูฬปทุมชาตกํ (2-5-3)
[85]
อยเมว สา อหมปิ [อหมฺปิ (สี. สฺยา. ปี.), อหมฺสิ (ก.)] โส อนญฺโญ, อยเมว โส หตฺถจฺฉินฺโน อนญฺโญ;
ยมาห ‘‘โกมารปตี มม’’นฺติ, วชฺฌิตฺถิโย นตฺถิ อิตฺถีสุ สจฺจํฯ
[86]
อิมญฺจ ชมฺมํ มุสเลน หนฺตฺวา, ลุทฺทํ ฉวํ ปรทารูปเสวิํ;
อิมิสฺสา จ นํ ปาปปติพฺพตาย, ชีวนฺติยา ฉินฺทถ กณฺณนาสนฺติฯ
จูฬปทุมชาตกํ ตติยํฯ
194. มณิโจรชาตกํ (2-5-4)
[87]
น สนฺติ เทวา ปวสนฺติ นูน, น หิ นูน สนฺติ อิธ โลกปาลา;
สหสา กโรนฺตานมสญฺญตานํ, น หิ นูน สนฺตี ปฏิเสธิตาโรฯ
[88]
อกาเล วสฺสตี ตสฺส, กาเล ตสฺส น วสฺสติ;
สคฺคา จ จวติ ฐานา, นนุ โส ตาวตา หโตติฯ
มณิโจรชาตกํ จตุตฺถํฯ
195. ปพฺพตูปตฺถรชาตกํ (2-5-5)
[89]
ปพฺพตูปตฺถเร [ปพฺพตปตฺถเร (สี. สฺยา. ปี.)] รมฺเม, ชาตา โปกฺขรณี สิวา;
ตํ สิงฺคาโล อปาปายิ [อปาปาสิ (สี. สฺยา. ปี.)], ชานํ สีเหน รกฺขิตํฯ
[90]
ปิวนฺติ เจ [ปิวนฺติ เว (สี.), ปิวนฺติว (ปี.), ปิวนฺเตว (?)] มหาราช, สาปทานิ มหานทิํ;
น เตน อนที โหติ, ขมสฺสุ ยทิ เต ปิยาติฯ
ปพฺพตูปตฺถร [ปพฺพตปตฺถร (สี. สฺยา. ปี.)] ชาตกํ ปญฺจมํฯ
196. วลาหกสฺสชาตกํ (2-5-6)
[91]
เย น กาหนฺติ โอวาทํ, นรา พุทฺเธน เทสิตํ;
พฺยสนํ เต คมิสฺสนฺติ, รกฺขสีหิว วาณิชาฯ
[92]
เย จ กาหนฺติ โอวาทํ, นรา พุทฺเธน เทสิตํ;
โสตฺถิํ ปารํ คมิสฺสนฺติ, วลาเหเนว [วาลาเหเนว (สี. ปี.)] วาณิชาติฯ
วลาหกสฺส [วาลาหสฺส (สี. ปี.)] ชาตกํ ฉฏฺฐํฯ
197. มิตฺตามิตฺตชาตกํ (2-5-7)
[93]
น นํ อุมฺหยเต ทิสฺวา, น จ นํ ปฏินนฺทติ;
จกฺขูนิ จสฺส น ททาติ, ปฏิโลมญฺจ วตฺตติฯ
[94]
เอเต ภวนฺติ อาการา, อมิตฺตสฺมิํ ปติฏฺฐิตา;
เยหิ อมิตฺตํ ชาเนยฺย, ทิสฺวา สุตฺวา จ ปณฺฑิโตติฯ
มิตฺตามิตฺตชาตกํ สตฺตมํฯ
198. ราธชาตกํ (2-5-8)
[95]
ปวาสา อาคโต ตาต, อิทานิ นจิราคโต;
กจฺจินฺนุ ตาต เต มาตา, น อญฺญมุปเสวติฯ
[96]
น โข ปเนตํ สุภณํ, คิรํ สจฺจุปสํหิตํ;
สเยถ โปฏฺฐปาโทว, มุมฺมุเร [มุมฺมุเร (สฺยา.), มํ ปุเร (ก.) มุมฺมุรสทฺโท ถุสคฺคิมฺหิ กุกฺกุเฬ จ วตฺตตีติ สกฺกตาภิธาเนสุ] อุปกูถิโตติ [อุปกูสิโตติ (สี. สฺยา. ปี.), อุปกูลิโต (ก.)]ฯ
ราธชาตกํ อฏฺฐมํฯ
199. คหปติชาตกํ (2-5-9)
[97]
อุภยํ เม น ขมติ, อุภยํ เม น รุจฺจติ;
ยาจายํ โกฏฺฐโมติณฺณา, นาทฺทสํ อิติ ภาสติฯ
[98]
ตํ ตํ คามปติ พฺรูมิ, กทเร อปฺปสฺมิ ชีวิเต;
ทฺเว มาเส สงฺครํ กตฺวา [การํ กตฺวาน (สี. ปี.), สํกรํ กตฺวา (ก.)], มํสํ ชรคฺควํ กิสํ;
อปฺปตฺตกาเล โจเทสิ, ตมฺปิ มยฺหํ น รุจฺจตีติฯ
คหปติชาตกํ นวมํฯ
200. สาธุสีลชาตกํ (2-5-10)
[99]
สรีรทพฺยํ วุฑฺฒพฺยํ [วทฺธพฺยํ (สี. ปี.)], โสชจฺจํ สาธุสีลิยํ;
พฺราหฺมณํ เตว ปุจฺฉาม, กนฺนุ เตสํ วนิมฺหเส [วณิมฺหเส (สี. ปี.)]ฯ
[100]
อตฺโถ อตฺถิ สรีรสฺมิํ, วุฑฺฒพฺยสฺส นโม กเร;
อตฺโถ อตฺถิ สุชาตสฺมิํ, สีลํ อสฺมาก รุจฺจตีติฯ
สาธุสีลชาตกํ ทสมํฯ
รุหกวคฺโค ปญฺจโมฯ
ตสฺสุทฺทานํ –
อปิรุหก รูปวตี มุสโล, ปวสนฺติ สปญฺจมโปกฺขรณี;
อถ มุตฺติมวาณิช อุมฺหยเต, จิรอาคต โกฏฺฐ สรีร ทสาติฯ
6. นตํทฬฺหวคฺโค
201. พนฺธนาคารชาตกํ (2-6-1)
[101]
น ตํ ทฬฺหํ พนฺธนมาหุ ธีรา, ยทายสํ ทารุชปพฺพชญฺจ [พพฺพชญฺจ (สี.)];
สารตฺตรตฺตา มณิกุณฺฑเลสุ, ปุตฺเตสุ ทาเรสุ จ ยา อเปกฺขาฯ
[102]
เอตํ ทฬฺหํ พนฺธนมาหุ ธีรา, โอหารินํ สิถิลํ ทุปฺปมุญฺจํ;
เอตมฺปิ เฉตฺวาน วชนฺติ ธีรา, อนเปกฺขิโน กามสุขํ ปหายาติฯ
พนฺธนาคารชาตกํ ปฐมํฯ
202. เกฬิสีลชาตกํ (2-6-2)
[103]
หํสา โกญฺจา มยูรา จ, หตฺถโย [หตฺถิโน (สี.), หตฺถิโย (สฺยา. ปี.)] ปสทา มิคา;
สพฺเพ สีหสฺส ภายนฺติ, นตฺถิ กายสฺมิ ตุลฺยตาฯ
[104]
เอวเมว มนุสฺเสสุ, ทหโร เจปิ ปญฺญวา;
โส หิ ตตฺถ มหา โหติ, เนว พาโล สรีรวาติฯ
เกฬิสีลชาตกํ ทุติยํฯ
203. ขณฺฑชาตกํ (2-6-3)
[105]
วิรูปกฺเขหิ เม เมตฺตํ, เมตฺตํ เอราปเถหิ เม;
ฉพฺยาปุตฺเตหิ เม เมตฺตํ, เมตฺตํ กณฺหาโคตมเกหิ จฯ