เอวํ ธมฺมํ นิรํกตฺวา [นิรากตฺวา (?) นิ อา กร ตฺวา], โย อธมฺเมน ชีวติ;
สตธมฺโมว ลาเภน, ลทฺเธนปิ น นนฺทตีติฯ
สตธมฺมชาตกํ นวมํฯ
180. ทุทฺททชาตกํ (2-3-10)
[59]
ทุทฺททํ ททมานานํ, ทุกฺกรํ กมฺม กุพฺพตํ;
อสนฺโต นานุกุพฺพนฺติ, สตํ ธมฺโม ทุรนฺนโยฯ
[60]
ตสฺมา สตญฺจ อสตํ, นานา โหติ อิโต คติ;
อสนฺโต นิรยํ ยนฺติ, สนฺโต สคฺคปรายณาติ [ปรายนา (สฺยา. ก.)]ฯ
ทุทฺททชาตกํ ทสมํฯ
กลฺยาณวคฺโค ตติโยฯ
ตสฺสุทฺทานํ –
สุสมญฺญมิคาธิภู มาณวโก, วาริปหูตรูปาทิจฺจุปฏฺฐานา;
สกฬายสตินฺทุกปงฺก ปุน, สตธมฺม สุทุทฺททเกน ทสาติฯ
4. อสทิสวคฺโค
181. อสทิสชาตกํ (2-4-1)
[61]
ธนุคฺคโห อสทิโส, ราชปุตฺโต มหพฺพโล;
ทูเรปาตี อกฺขณเวธี, มหากายปฺปทาลโนฯ
[62]
สพฺพามิตฺเต รณํ กตฺวา, น จ กญฺจิ วิเหฐยิ;
ภาตรํ โสตฺถิํ กตฺวาน, สํยมํ อชฺฌุปาคมีติฯ
อสทิสชาตกํ ปฐมํฯ
182. สงฺคามาวจรชาตกํ (2-4-2)
[63]
สงฺคามาวจโร สูโร, พลวา อิติ วิสฺสุโต;
กิํ นุ โตรณมาสชฺช, ปฏิกฺกมสิ กุญฺชรฯ
[64]
โอมทฺท ขิปฺปํ ปลิฆํ, เอสิกานิ จ อพฺพห [อุพฺพห (สฺยา.), อพฺภุห (ก.)];
โตรณานิ จ มทฺทิตฺวา, ขิปฺปํ ปวิส กุญฺชราติฯ
สงฺคามาวจรชาตกํ ทุติยํฯ
183. วาโลทกชาตกํ (2-4-3)
[65]
วาโลทกํ อปฺปรสํ นิหีนํ, ปิตฺวา [ปีตฺวา (สี. ปี.)] มโท ชายติ คทฺรภานํ;
อิมญฺจ ปิตฺวาน รสํ ปณีตํ, มโท น สญฺชายติ สินฺธวานํฯ
[66]
อปฺปํ ปิวิตฺวาน นิหีนชจฺโจ, โส มชฺชตี เตน ชนินฺท ปุฏฺโฐ [ผุฏฺโฐ (สี. สฺยา.), มุฏฺโฐ (ก.)];
โธรยฺหสีลี จ กุลมฺหิ ชาโต, น มชฺชตี อคฺครสํ ปิวิตฺวาติฯ
วาโลทกชาตกํ ตติยํฯ
184. คิริทตฺตชาตกํ (2-4-4)
[67]
ทูสิโต คิริทตฺเตน [คิริทนฺเตน (ปี.)], หโย สามสฺส ปณฺฑโว;
โปราณํ ปกติํ หิตฺวา, ตสฺเสวานุวิธิยฺยติ [นุวิธียติ (สี. ปี.)]ฯ
[68]
สเจ จ ตนุโช โปโส, สิขราการ [สิงฺคาราการ (สฺยา.)] กปฺปิโต;
อานเน นํ [ตํ (สี. สฺยา. ปี.)] คเหตฺวาน, มณฺฑเล ปริวตฺตเย;
ขิปฺปเมว ปหนฺตฺวาน, ตสฺเสวานุวิธิยฺยตีติฯ
คิริทตฺตชาตกํ จตุตฺถํฯ
185. อนภิรติชาตกํ (2-4-5)
[69]
ยโถทเก อาวิเล อปฺปสนฺเน, น ปสฺสติ สิปฺปิกสมฺพุกญฺจ;
สกฺขรํ วาลุกํ มจฺฉคุมฺพํ, เอวํ อาวิลมฺหิ [อาวิเล หิ (สี.)] จิตฺเต;
น ปสฺสติ อตฺตทตฺถํ ปรตฺถํฯ
[70]
ยโถทเก อจฺเฉ วิปฺปสนฺเน, โส ปสฺสติ สิปฺปิกสมฺพุกญฺจ;
สกฺขรํ วาลุกํ มจฺฉคุมฺพํ, เอวํ อนาวิลมฺหิ จิตฺเต;
โส ปสฺสติ อตฺตทตฺถํ ปรตฺถนฺติฯ
อนภิรติชาตกํ ปญฺจมํฯ
186. ทธิวาหนชาตกํ (2-4-6)
[71]
วณฺณคนฺธรสูเปโต , อมฺโพยํ อหุวา ปุเร;
ตเมว ปูชํ ลภมาโน, เกนมฺโพ กฏุกปฺผโลฯ
[72]
ปุจิมนฺทปริวาโร, อมฺโพ เต ทธิวาหน;
มูลํ มูเลน สํสฏฺฐํ, สาขา สาขา [สาขํ (สฺยา. ก.)] นิเสวเร [นิวีสเร (ก.)];
อสาตสนฺนิวาเสน, เตนมฺโพ กฏุกปฺผโลติฯ
ทธิวาหนชาตกํ ฉฏฺฐํฯ
187. จตุมฏฺฐชาตกํ (2-4-7)
[73]
อุจฺเจ วิฏภิมารุยฺห, มนฺตยวฺโห รโหคตา;
นีเจ โอรุยฺห มนฺตวฺโห, มิคราชาปิ โสสฺสติฯ
[74]
ยํ สุวณฺโณ สุวณฺเณน [ยํ สุปณฺโณ สุปณฺเณน (สี. สฺยา. ปี.)], เทโว เทเวน มนฺตเย;
กิํ เตตฺถ จตุมฏฺฐสฺส, พิลํ ปวิส ชมฺพุกาติฯ
จตุมฏฺฐชาตกํ สตฺตมํฯ
188. สีหโกตฺถุชาตกํ (2-4-8)
[75]
สีหงฺคุลี สีหนโข, สีหปาทปติฏฺฐิโต;
โส สีโห สีหสงฺฆมฺหิ, เอโก นทติ อญฺญถาฯ
[76]
มา ตฺวํ นทิ ราชปุตฺต, อปฺปสทฺโท วเน วส;
สเรน โข [มา (ก.)] ตํ ชาเนยฺยุํ, น หิ เต เปตฺติโก สโรติฯ
สีหโกตฺถุชาตกํ อฏฺฐมํฯ
189. สีหจมฺมชาตกํ (2-4-9)
[77]
เนตํ สีหสฺส นทิตํ, น พฺยคฺฆสฺส น [พฺยคฺฆสฺส น จ (ก.)] ทีปิโน;
ปารุโต สีหจมฺเมน, ชมฺโม นทติ คทฺรโภฯ
[78]
จิรมฺปิ โข ตํ ขาเทยฺย, คทฺรโภ หริตํ ยวํ;
ปารุโต สีหจมฺเมน, รวมาโนว ทูสยีติฯ
สีหจมฺมชาตกํ นวมํฯ
190. สีลานิสํสชาตกํ (2-4-10)
[79]
ปสฺส สทฺธาย สีลสฺส, จาคสฺส จ อยํ ผลํ;
นาโค นาวาย วณฺเณน, สทฺธํ วหตุปาสกํฯ
[80]
สพฺภิเรว สมาเสถ, สพฺภิ กุพฺเพถ สนฺถวํ;
สตญฺหิ สนฺนิวาเสน, โสตฺถิํ คจฺฉติ นฺหาปิโตติฯ
สีลานิสํสชาตกํ ทสมํฯ
อสทิสวคฺโค จตุตฺโถฯ
ตสฺสุทฺทานํ –
ธนุคฺคห กุญฺชร อปฺปรโส, คิริทตฺตมนาวิลจิตฺตวรํ;
ทธิวาหน ชมฺพูก สีหนโข, หริตยว นาควเรน ทสาติฯ
5. รุหกวคฺโค
191. รุหกชาตกํ (2-5-1)
[81]