อถ อินฺทสมาน สปณฺณกุฏิ, สุสิมุตฺตม คิชฺฌ ชลาพุชโก;

อุปสาฬก ภิกฺขุ สลาปวโร, อถ เมตฺตวโร ทสปุณฺณมตีติฯ

3. กลฺยาณวคฺโค

171. กลฺยาณธมฺมชาตกํ (2-3-1)

[41]

กลฺยาณธมฺโมติ ยทา ชนินฺท, โลเก สมญฺญํ อนุปาปุณาติ;

ตสฺมา น หิยฺเยถ [หีเยถ (สี.)] นโร สปญฺโญ, หิริยาปิ สนฺโต ธุรมาทิยนฺติฯ

[42]

สายํ สมญฺญา อิธ มชฺช ปตฺตา, กลฺยาณธมฺโมติ ชนินฺท โลเก;

ตาหํ สเมกฺขํ อิธ ปพฺพชิสฺสํ, น หิ มตฺถิ ฉนฺโท อิธ กามโภเคติฯ

กลฺยาณธมฺมชาตกํ ปฐมํฯ

172. ททฺทรชาตกํ (2-3-2)

[43]

โก นุ สทฺเทน มหตา, อภินาเทติ ททฺทรํ;

ตํ สีหา นปฺปฏินทนฺติ [กิํ สีหา นปฺปฏินทนฺติ (สี. ปี.), น สีหา ปฏินทนฺติ (ก.)], โก นาเมโส มิคาธิภูฯ

[44]

อธโม มิคชาตานํ, สิงฺคาโล ตาต วสฺสติ;

ชาติมสฺส ชิคุจฺฉนฺตา, ตุณฺหี สีหา สมจฺฉเรติฯ

ททฺทรชาตกํ ทุติยํฯ

173. มกฺกฏชาตกํ (2-3-3)

[45]

ตาต มาณวโก เอโส, ตาลมูลํ อปสฺสิโต;

อคารกญฺจิทํ อตฺถิ, หนฺท เทมสฺสคารกํฯ

[46]

มา โข ตฺวํ ตาต ปกฺโกสิ, ทูเสยฺย โน อคารกํ;

เนตาทิสํ มุขํ โหติ, พฺราหฺมณสฺส สุสีลิโนติฯ

มกฺกฏชาตกํ ตติยํฯ

174. ทุพฺภิยมกฺกฏชาตกํ (2-3-4)

[47]

อทมฺห เต วาริ ปหูตรูปํ, ฆมฺมาภิตตฺตสฺส ปิปาสิตสฺส;

โส ทานิ ปิตฺวาน [ปีตฺวาน (สี. ปี.)] กิริงฺกโรสิ [กิกิํกโรสิ (สี. สฺยา. ปี.)], อสงฺคโม ปาปชเนน เสยฺโยฯ

[48]

โก เต สุโต วา ทิฏฺโฐ วา, สีลวา นาม มกฺกโฏ;

อิทานิ โข ตํ โอหจฺฉํ [อูหจฺจ (สี. ปี.), โอหจฺจํ (สฺยา.), อุหชฺชํ (ก.)], เอสา อสฺมาก ธมฺมตาติฯ

ทุพฺภิยมกฺกฏชาตกํ จตุตฺถํฯ

175. อาทิจฺจุปฏฺฐานชาตกํ (2-3-5)

[49]

สพฺเพสุ กิร ภูเตสุ, สนฺติ สีลสมาหิตา;

ปสฺส สาขามิคํ ชมฺมํ, อาทิจฺจมุปติฏฺฐติฯ

[50]

นาสฺส สีลํ วิชานาถ, อนญฺญาย ปสํสถ;

อคฺคิหุตฺตญฺจ อุหนฺนํ [อูหนฺตํ (สี.), อูหนํ (สฺยา.), อูหนฺติ (ปี.), อุหทํ (ก.)], ทฺเว จ ภินฺนา กมณฺฑลูติฯ

อาทิจฺจุปฏฺฐานชาตกํ ปญฺจมํฯ

176. กฬายมุฏฺฐิชาตกํ (2-3-6)

[51]

พาโล วตายํ ทุมสาขโคจโร, ปญฺญา ชนินฺท นยิมสฺส วิชฺชติ;

กฬายมุฏฺฐิํ [กลายมุฏฺฐิํ (สี. ปี.)] อวกิริย เกวลํ, เอกํ กฬายํ ปติตํ คเวสติฯ

[52]

เอวเมว มยํ ราช, เย จญฺเญ อติโลภิโน;

อปฺเปน พหุํ ชิยฺยาม, กฬาเยเนว วานโรติฯ

กฬายมุฏฺฐิชาตกํ ฉฏฺฐํฯ

177. ตินฺทุกชาตกํ (2-3-7)

[53]

ธนุหตฺถกลาเปหิ, เนตฺติํ สวรธาริภิ;

สมนฺตา ปริกิณฺณมฺห, กถํ โมกฺโข ภวิสฺสติฯ

[54]

อปฺเปว พหุกิจฺจานํ, อตฺโถ ชาเยถ โกจิ นํ;

อตฺถิ รุกฺขสฺส อจฺฉินฺนํ, ขชฺชถญฺเญว ตินฺทุกนฺติฯ

ตินฺทุกชาตกํ สตฺตมํฯ

178. กจฺฉปชาตกํ (2-3-8)

[55]

ชนิตฺตํ เม ภวิตฺตํ เม, อิติ ปงฺเก อวสฺสยิํ;

ตํ มํ ปงฺโก อชฺฌภวิ, ยถา ทุพฺพลกํ ตถา;

ตํ ตํ วทามิ ภคฺคว, สุโณหิ วจนํ มมฯ

[56]

คาเม วา ยทิ วา รญฺเญ, สุขํ ยตฺราธิคจฺฉติ;

ตํ ชนิตฺตํ ภวิตฺตญฺจ, ปุริสสฺส ปชานโต;

ยมฺหิ ชีเว ตมฺหิ คจฺเฉ, น นิเกตหโต สิยาติฯ

กจฺฉปชาตกํ อฏฺฐมํฯ

179. สตธมฺมชาตกํ (2-3-9)

[57]

ตญฺจ อปฺปญฺจ อุจฺฉิฏฺฐํ, ตญฺจ กิจฺเฉน โน อทา;

โสหํ พฺราหฺมณชาติโก, ยํ ภุตฺตํ ตมฺปิ อุคฺคตํฯ

[58]

เอวํ ธมฺมํ นิรํกตฺวา [นิรากตฺวา (?) นิ อา กร ตฺวา], โย อธมฺเมน ชีวติ;

สตธมฺโมว ลาเภน, ลทฺเธนปิ น นนฺทตีติฯ

สตธมฺมชาตกํ นวมํฯ

180. ทุทฺททชาตกํ (2-3-10)

[59]

ทุทฺททํ ททมานานํ, ทุกฺกรํ กมฺม กุพฺพตํ;

อสนฺโต นานุกุพฺพนฺติ, สตํ ธมฺโม ทุรนฺนโยฯ

[60]

ตสฺมา สตญฺจ อสตํ, นานา โหติ อิโต คติ;

อสนฺโต นิรยํ ยนฺติ, สนฺโต สคฺคปรายณาติ [ปรายนา (สฺยา. ก.)]ฯ

ทุทฺททชาตกํ ทสมํฯ

กลฺยาณวคฺโค ตติโยฯ

ตสฺสุทฺทานํ –

สุสมญฺญมิคาธิภู มาณวโก, วาริปหูตรูปาทิจฺจุปฏฺฐานา;

สกฬายสตินฺทุกปงฺก ปุน, สตธมฺม สุทุทฺททเกน ทสาติฯ

4. อสทิสวคฺโค

181. อสทิสชาตกํ (2-4-1)

[61]

ธนุคฺคโห อสทิโส, ราชปุตฺโต มหพฺพโล;

ทูเรปาตี อกฺขณเวธี, มหากายปฺปทาลโนฯ

[62]

สพฺพามิตฺเต รณํ กตฺวา, น จ กญฺจิ วิเหฐยิ;

ภาตรํ โสตฺถิํ กตฺวาน, สํยมํ อชฺฌุปาคมีติฯ

อสทิสชาตกํ ปฐมํฯ

182. สงฺคามาวจรชาตกํ (2-4-2)

[63]