อิตรีตร รกฺขสิ เขมิโย จ, ปโรสตปญฺเหน อาภสฺสโร ปุน;
อถ หํสวรุตฺตมพพฺพุชฏํ, ปฏนฏฺฐก กากวเรน ทสาติฯ
15. กกณฺฏกวคฺโค
141. โคธชาตกํ
[141]
น ปาปชนสํเสวี, อจฺจนฺตสุขเมธติ;
โคธากุลํ [โคธกฺกุลํ (ก.)] กกณฺฏาว [กกณฺฏกา (ก.)], กลิํ ปาเปติ อตฺตนนฺติฯ
โคธชาตกํ ปฐมํฯ
142. สิงฺคาลชาตกํ
[142]
เอตญฺหิ เต ทุราชานํ, ยํ เสสิ มตสายิกํ;
ยสฺส เต กฑฺฒมานสฺส, หตฺถา ทณฺโฑ น มุจฺจตีติฯ
สิงฺคาลชาตกํ ทุติยํฯ
143. วิโรจชาตกํ
[143]
ลสี จ เต นิปฺผลิตา, มตฺถโก จ ปทาลิโต [วิทาลิโต (สี. ปี.)];
สพฺพา เต ผาสุกา ภคฺคา, อชฺช โข ตฺวํ วิโรจสีติฯ
วิโรจชาตกํ ตติยํฯ
144. นงฺคุฏฺฐชาตกํ
[144]
พหุมฺเปตํ อสพฺภิ [พหุเปตมสพฺภิ (ก.)] ชาตเวท, ยํ ตํ วาลธินาภิปูชยาม;
มํสารหสฺส นตฺถชฺช มํสํ, นงฺคุฏฺฐมฺปิ ภวํ ปฏิคฺคหาตูติฯ
นงฺคุฏฺฐชาตกํ จตุตฺถํฯ
145. ราธชาตกํ
[145]
น ตฺวํ ราธ วิชานาสิ, อฑฺฒรตฺเต อนาคเต;
อพฺยยตํ [อพฺยายตํ (สี. สฺยา. ปี.), อพฺยตฺตตํ (?)] วิลปสิ, วิรตฺตา โกสิยายเนติฯ
ราธชาตกํ ปญฺจมํฯ
146. สมุทฺทกากชาตกํ
[146]
อปิ นุ หนุกา สนฺตา, มุขญฺจ ปริสุสฺสติ;
โอรมาม น ปาเรม, ปูรเตว มโหทธีติฯ
สมุทฺทกากชาตกํ ฉฏฺฐํฯ
147. ปุปฺผรตฺตชาตกํ
[147]
นยิทํ ทุกฺขํ อทุํ ทุกฺขํ, ยํ มํ ตุทติ วายโส;
ยํ สามา ปุปฺผรตฺเตน, กตฺติกํ นานุโภสฺสตีติฯ
ปุปฺผรตฺตชาตกํ สตฺตมํฯ
148. สิงฺคาลชาตกํ
[148]
นาหํ ปุนํ น จ ปุนํ, น จาปิ อปุนปฺปุนํ;
หตฺถิโพนฺทิํ ปเวกฺขามิ, ตถา หิ ภยตชฺชิโตติฯ
สิงฺคาลชาตกํ อฏฺฐมํฯ
149. เอกปณฺณชาตกํ
[149]
เอกปณฺโณ อยํ รุกฺโข, น ภูมฺยา จตุรงฺคุโล;
ผเลน วิสกปฺเปน, มหายํ กิํ ภวิสฺสตีติฯ
เอกปณฺณชาตกํ นวมํฯ