132. ภีรุกชาตกํ
[132]
กุสลูปเทเส ธิติยา ทฬฺหาย จ, อนิวตฺติตตฺตาภยภีรุตาย [อวตฺถิตตฺตาภยภีรุตาย (สี. สฺยา. ปี.)] จ;
น รกฺขสีนํ วสมาคมิมฺหเส, ส โสตฺถิภาโว มหตา ภเยน เมติฯ
ภีรุก [ปญฺจครุก (สี. ปี.), ปญฺจภีรุก (สฺยา.), อภยภีรุต§(?)] ชาตกํ ทุติยํฯ
133. ฆตาสนชาตกํ
[133]
เขมํ ยหิํ ตตฺถ อรี อุทีริโต [อริ อุทฺธริโต (ก.)], ทกสฺส มชฺเฌ ชลเต ฆตาสโน;
น อชฺช วาโส มหิยา มหีรุเห, ทิสา ภชวฺโห สรณาชฺช โน ภยนฺติฯ
ฆตาสนชาตกํ ตติยํฯ
134. ฌานโสธนชาตกํ
[134]
เย สญฺญิโน เตปิ ทุคฺคตา, เยปิ อสญฺญิโน เตปิ ทุคฺคตา;
เอตํ อุภยํ วิวชฺชย, ตํ สมาปตฺติสุขํ อนงฺคณนฺติฯ
ฌานโสธนชาตกํ จตุตฺถํฯ
135. จนฺทาภชาตกํ
[135]
จนฺทาภํ สูริยาภญฺจ, โยธ ปญฺญาย คาธติฯ
อวิตกฺเกน ฌาเนน, โหติ อาภสฺสรูปโคติฯ
จนฺทาภชาตกํ ปญฺจมํฯ
136. สุวณฺณหํสชาตกํ
[136]
ยํ ลทฺธํ เตน ตุฏฺฐพฺพํ, อติโลโภ หิ ปาปโก;
หํสราชํ คเหตฺวาน, สุวณฺณา ปริหายถาติฯ
สุวณฺณหํสชาตกํ ฉฏฺฐํฯ
137. พพฺพุชาตกํ
[137]
ยตฺเถโก ลภเต พพฺพุ, ทุติโย ตตฺถ ชายติ;
ตติโย จ จตุตฺโถ จ, อิทํ เต พพฺพุกา พิลนฺติฯ
พพฺพุชาตกํ สตฺตมํฯ
138. โคธชาตกํ
[138]
กิํ เต ชฏาหิ ทุมฺเมธ, กิํ เต อชินสาฏิยา;
อพฺภนฺตรํ เต คหนํ, พาหิรํ ปริมชฺชสีติฯ
โคธชาตกํ อฏฺฐมํฯ
139. อุภโตภฏฺฐชาตกํ
[139]
อกฺขี ภินฺนา ปโฏ นฏฺโฐ, สขิเคเห จ ภณฺฑนํ;
อุภโต ปทุฏฺฐา กมฺมนฺตา [ปทุฏฺฐกมฺมนฺโต (สี.), ปทุฏฺโฐ กมฺมนฺโต (ปี.)], อุทกมฺหิ ถลมฺหิ จาติฯ
อุภโตภฏฺฐชาตกํ นวมํฯ
140. กากชาตกํ
[140]
นิจฺจํ อุพฺพิคฺคหทยา, สพฺพโลกวิเหสกา;
ตสฺมา เนสํ วสา นตฺถิ, กากานมฺหาก [กากานสฺมาก (สี. สฺยา. ปี.)] ญาตินนฺติฯ
กากชาตกํ ทสมํฯ
อสมฺปทานวคฺโค จุทฺทสโมฯ
ตสฺสุทฺทานํ –