8. คามณิชาตกํ
[8]
อปิ อตรมานานํ, ผลาสาว สมิชฺฌติ;
วิปกฺกพฺรหฺมจริโยสฺมิ, เอวํ ชานาหิ คามณีติฯ
คามณิชาตกํ อฏฺฐมํฯ
9. มฆเทวชาตกํ
[9]
อุตฺตมงฺครุหา มยฺหํ, อิเม ชาตา วโยหรา;
ปาตุภูตา เทวทูตา, ปพฺพชฺชาสมโย มมาติฯ
มฆเทว [มขาเทว (สี. ปี.), เทวทูต (ก.)] ชาตกํ นวมํฯ
10. สุขวิหาริชาตกํ
[10]
ยญฺจ อญฺเญ น รกฺขนฺติ, โย จ อญฺเญ น รกฺขติ;
ส เว ราช สุขํ เสติ, กาเมสุ อนเปกฺขวาติฯ
สุขวิหาริชาตกํ ทสมํฯ
อปณฺณกวคฺโค ปฐโมฯ
ตสฺสุทฺทานํ –
วราปณฺณก วณฺณุปถ เสริวโร, สุวิจกฺขณ ตณฺฑุลนาฬิกสฺสา;
หิริ ปุตฺตวรุตฺตคามณินา, โย จ น รกฺขติ เตน ทสาติฯ
2. สีลวคฺโค
11. ลกฺขณมิคชาตกํ
[11]
โหติ สีลวตํ อตฺโถ, ปฏิสนฺถาร [ปฏิสนฺธาร (ก.)] วุตฺตินํ;
ลกฺขณํ ปสฺส อายนฺตํ, ญาติสงฺฆปุรกฺขตํ [ปุรกฺขิตํ (สฺยา.), ปุเรกฺขิตํ (ก.)];
อถ ปสฺสสิมํ กาฬํ, สุวิหีนํว ญาติภีติฯ
ลกฺขณมิคชาตกํ ปฐมํฯ
12. นิคฺโรธมิคชาตกํ
[12]
นิคฺโรธเมว เสเวยฺย, น สาขมุปสํวเส;
นิคฺโรธสฺมิํ มตํ เสยฺโย, ยญฺเจ สาขสฺมิ [สาขสฺมิํ (สี. ปี.)] ชีวิตนฺติฯ
นิคฺโรธมิคชาตกํ ทุติยํฯ
13. กณฺฑิชาตกํ
[13]
ธิรตฺถุ กณฺฑินํ สลฺลํ, ปุริสํ คาฬฺหเวธินํ;
ธิรตฺถุ ตํ ชนปทํ, ยตฺถิตฺถี ปริณายิกา;
เต จาปิ ธิกฺกิตา [ธิกฺกตา (?)] สตฺตา, เย อิตฺถีนํ วสํคตาติฯ
กณฺฑิชาตกํ ตติยํฯ
14. วาตมิคชาตกํ
[14]
น กิรตฺถิ รเสหิ ปาปิโย, อาวาเสหิ ว [วา (สพฺพตฺถ)] สนฺถเวหิ วา;
วาตมิคํ คหนนิสฺสิตํ [เคหนิสฺสิตํ (สี. ปี.)], วสมาเนสิ รเสหิ สญฺชโยติฯ
วาตมิคชาตกํ จตุตฺถํฯ
15. ขราทิยชาตกํ
[15]
อฏฺฐกฺขุรํ ขราทิเย, มิคํ วงฺกาติวงฺกินํ;
สตฺตหิ กาลาติกฺกนฺตํ [สตฺตหิ กลาห’ติกฺกนฺตํ (สี.), สตฺตกาเลห’ติกฺกนฺตํ (สฺยา.), สตฺตหิ กาลาห’ติกฺกนฺตํ (ปี.)], น นํ โอวทิตุสฺสเหติฯ
ขราทิยชาตกํ ปญฺจมํฯ