122. ทุมฺเมธชาตกํ

[122]

ยสํ ลทฺธาน ทุมฺเมโธ, อนตฺถํ จรติ อตฺตโน;

อตฺตโน จ ปเรสญฺจ, หิํสาย ปฏิปชฺชตีติฯ

ทุมฺเมธชาตกํ ทุติยํฯ

123. นงฺคลีสชาตกํ

[123]

อสพฺพตฺถคามิํ วาจํ, พาโล สพฺพตฺถ ภาสติ;

นายํ ทธิํ เวทิ น [น เวทิ (ก.)] นงฺคลีสํ, ทธิปฺปยํ [ทธิมฺปยํ (สี. ปี.)] มญฺญติ นงฺคลีสนฺติฯ

นงฺคลีสชาตกํ ตติยํฯ

124. อมฺพชาตกํ

[124]

วายเมเถว ปุริโส, น นิพฺพินฺเทยฺย ปณฺฑิโต;

วายามสฺส ผลํ ปสฺส, ภุตฺตา อมฺพา อนีติหนฺติฯ

อมฺพชาตกํ จตุตฺถํฯ

125. กฏาหกชาตกํ

[125]

พหุมฺปิ โส วิกตฺเถยฺย, อญฺญํ ชนปทํ คโต;

อนฺวาคนฺตฺวาน ทูเสยฺย, ภุญฺช โภเค กฏาหกาติฯ

กฏาหกชาตกํ ปญฺจมํฯ

126. อสิลกฺขณชาตกํ

[126]

ตเทเวกสฺส [ตเถเวกสฺส (สี. สฺยา. ปี. อฏฺฐ. มูลปาโฐ)] กลฺยาณํ, ตเทเวกสฺส ปาปกํ;

ตสฺมา สพฺพํ น กลฺยาณํ, สพฺพํ วาปิ น ปาปกนฺติฯ

อสิลกฺขณชาตกํ ฉฏฺฐํฯ

127. กลณฺฑุกชาตกํ

[127]

เต เทสา ตานิ วตฺถูนิ, อหญฺจ วนโคจโร;

อนุวิจฺจ โข ตํ คณฺเหยฺยุํ, ปิว [ปิป (สี. ปี.)] ขีรํ กลณฺฑุกาติฯ

กลณฺฑุกชาตกํ สตฺตมํฯ

128. พิฬารวตชาตกํ

[128]

โย เว ธมฺมํ ธชํ [ธมฺมธชํ (สฺยา. ปี. ก.)] กตฺวา, นิคูฬฺโห ปาปมาจเร;

วิสฺสาสยิตฺวา ภูตานิ, พิฬารํ นาม ตํ วตนฺติฯ

พิฬารวตชาตกํ อฏฺฐมํฯ

129. อคฺคิกภารทฺวาชชาตกํ

[129]

นายํ สิขา ปุญฺญเหตุ, ฆาสเหตุ อยํ สิขา;

นางฺคุฏฺฐคณนํ ยาติ, อลํ เต โหตุ อคฺคิกาติฯ

อคฺคิกภารทฺวาชชาตกํ นวมํฯ

130. โกสิยชาตกํ

[130]

ยถา วาจา จ ภุญฺชสฺสุ, ยถา ภุตฺตญฺจ พฺยาหร;

อุภยํ เต น สเมติ, วาจา ภุตฺตญฺจ โกสิเยติฯ

โกสิยชาตกํ ทสมํฯ

กุสนาฬิวคฺโค [สริกฺขวคฺโค (ก.)] เตรสโมฯ

ตสฺสุทฺทานํ –

กุสนาฬิสิริวฺหยโน จ ยสํ, ทธิ มมฺพ กฏาหกปญฺจมโก;

อถ ปาปก ขีร พิฬารวตํ, สิขิ โกสิยสวฺหยเนน ทสาติฯ

14. อสมฺปทานวคฺโค

131. อสมฺปทานชาตกํ

[131]

อสมฺปทาเนนิตรีตรสฺส, พาลสฺส มิตฺตานิ กลี ภวนฺติ;

ตสฺมา หรามิ ภุสํ อฑฺฒมานํ, มา เม มิตฺติ ชียิตฺถ สสฺสตายนฺติฯ

อสมฺปทานชาตกํ ปฐมํฯ