119. อกาลราวิชาตกํ

[119]

อมาตาปิตรสํวทฺโธ [ปิตริ (สี. ปี.), ปิตุ (สฺยา.)], อนาเจรกุเล วสํ;

นายํ กาลํ อกาลํ วา, อภิชานาติ กุกฺกุโฏติฯ

อกาลราวิชาตกํ นวมํฯ

120. พนฺธนโมกฺขชาตกํ

[120]

อพทฺธา ตตฺถ พชฺฌนฺติ, ยตฺถ พาลา ปภาสเร;

พทฺธาปิ ตตฺถ มุจฺจนฺติ, ยตฺถ ธีรา ปภาสเรติฯ

พนฺธนโมกฺขชาตกํ ทสมํฯ

หํจิวคฺโค [หํสิวคฺโค (สี. สฺยา.)] ทฺวาทสโมฯ

ตสฺสุทฺทานํ –

อถ คทฺรภ สตฺตุว กํสสตํ, พหุจินฺติ สาสิกายาติกร;

อติเวล วิเสสมนาจริโยว, ธีราปภาสรเตน ทสาติฯ

13. กุสนาฬิวคฺโค

121. กุสนาฬิชาตกํ

[121]

กเร สริกฺโข อถ วาปิ เสฏฺโฐ, นิหีนโก วาปิ กเรยฺย เอโก;

กเรยฺยุเมเต [กเรยฺยุํ เต (สี. ปี.)] พฺยสเน อุตฺตมตฺถํ, ยถา อหํ กุสนาฬิ รุจายนฺติฯ

กุสนาฬิชาตกํ ปฐมํฯ

122. ทุมฺเมธชาตกํ

[122]

ยสํ ลทฺธาน ทุมฺเมโธ, อนตฺถํ จรติ อตฺตโน;

อตฺตโน จ ปเรสญฺจ, หิํสาย ปฏิปชฺชตีติฯ

ทุมฺเมธชาตกํ ทุติยํฯ

123. นงฺคลีสชาตกํ

[123]

อสพฺพตฺถคามิํ วาจํ, พาโล สพฺพตฺถ ภาสติ;

นายํ ทธิํ เวทิ น [น เวทิ (ก.)] นงฺคลีสํ, ทธิปฺปยํ [ทธิมฺปยํ (สี. ปี.)] มญฺญติ นงฺคลีสนฺติฯ

นงฺคลีสชาตกํ ตติยํฯ

124. อมฺพชาตกํ

[124]

วายเมเถว ปุริโส, น นิพฺพินฺเทยฺย ปณฺฑิโต;

วายามสฺส ผลํ ปสฺส, ภุตฺตา อมฺพา อนีติหนฺติฯ

อมฺพชาตกํ จตุตฺถํฯ

125. กฏาหกชาตกํ

[125]

พหุมฺปิ โส วิกตฺเถยฺย, อญฺญํ ชนปทํ คโต;

อนฺวาคนฺตฺวาน ทูเสยฺย, ภุญฺช โภเค กฏาหกาติฯ

กฏาหกชาตกํ ปญฺจมํฯ

126. อสิลกฺขณชาตกํ

[126]

ตเทเวกสฺส [ตเถเวกสฺส (สี. สฺยา. ปี. อฏฺฐ. มูลปาโฐ)] กลฺยาณํ, ตเทเวกสฺส ปาปกํ;

ตสฺมา สพฺพํ น กลฺยาณํ, สพฺพํ วาปิ น ปาปกนฺติฯ

อสิลกฺขณชาตกํ ฉฏฺฐํฯ

127. กลณฺฑุกชาตกํ

[127]

เต เทสา ตานิ วตฺถูนิ, อหญฺจ วนโคจโร;

อนุวิจฺจ โข ตํ คณฺเหยฺยุํ, ปิว [ปิป (สี. ปี.)] ขีรํ กลณฺฑุกาติฯ

กลณฺฑุกชาตกํ สตฺตมํฯ