105. ทุพฺพลกฏฺฐชาตกํ
[105]
พหุมฺเปตํ วเน กฏฺฐํ, วาโต ภญฺชติ ทุพฺพลํ;
ตสฺส เจ ภายสี นาค, กิโส นูน ภวิสฺสสีติฯ
ทุพฺพลกฏฺฐชาตกํ ปญฺจมํฯ
106. อุทญฺจนีชาตกํ
[106]
สุขํ วต มํ ชีวนฺตํ [สุขกํ วต ชีวํ (ก.)], ปจมานา อุทญฺจนี;
โจรี ชายปฺปวาเทน, เตลํ โลณญฺจ ยาจตีติฯ
อุทญฺจนีชาตกํ ฉฏฺฐํฯ
107. สาลิตฺตกชาตกํ
[107]
สาธุ โข สิปฺปกํ นาม, อปิ ยาทิส กีทิสํ;
ปสฺส ขญฺชปฺปหาเรน, ลทฺธา คามา จตุทฺทิสาติฯ
สาลิตฺตกชาตกํ สตฺตมํฯ
108. พาหิยชาตกํ
[108]
สิกฺเขยฺย สิกฺขิตพฺพานิ, สนฺติ ตจฺฉนฺทิโน [สจฺฉนฺทิโน (สี. ปี.)] ชนา;
พาหิยา หิ [ปิ (สี. สฺยา. ปี.)] สุหนฺเนน, ราชานมภิราธยีติฯ
พาหิยชาตกํ อฏฺฐมํฯ
109. กุณฺฑปูวชาตกํ
[109]
ยถนฺโน ปุริโส โหติ, ตถนฺนา ตสฺส เทวตา;
อาหเรตํ กุณฺฑปูวํ [กณํ ปูวํ (สี. ปี.)], มา เม ภาคํ วินาสยาติฯ
กุณฺฑปูวชาตกํ นวมํฯ
110. สพฺพสํหารกปญฺหชาตกํ
[110]
สพฺพสํหารโก [สพฺพสาหารโก (ก.)] นตฺถิ, สุทฺธํ กงฺคุ ปวายติ;
อลิกํ ภายติยํ ธุตฺตี, สจฺจมาห มหลฺลิกาติฯ
สพฺพสํหารกปญฺหชาตกํ ทสมํฯ
ปโรสตวคฺโค เอกาทสโมฯ
ตสฺสุทฺทานํ –
สปโรสต ตายิต เวรี ปุน, ภมจกฺกถ นาคสิริวฺหยโน;
สุขกญฺจ วต สิปฺปก พาหิยา, กุณฺฑปูว มหลฺลิกกา จ ทสาติฯ
12. หํจิวคฺโค
111. คทฺรภปญฺหชาตกํ
[111]
หํจิ [หํสิ (สี. สฺยา.), หญฺจิ (?)] ตุวํ เอวมญฺญสิ เสยฺโย, ปุตฺเตน ปิตาติ ราชเสฏฺฐ;
หนฺทสฺสตรสฺส เต อยํ, อสฺสตรสฺส หิ คทฺรโภ ปิตาติฯ
คทฺรภปญฺหชาตกํ ปฐมํฯ
112. อมราเทวีปญฺหชาตกํ
[112]
เยน สตฺตุพิลงฺคา จ, ทิคุณปลาโส จ ปุปฺผิโต;
เยน ททามิ [เยนา’ทามิ (สี. สฺยา.)] เตน วทามิ, เยน น ททามิ [เยน นา’ทามิ (สี. สฺยา.)] น เตน วทามิ;
เอส มคฺโค ยวมชฺฌกสฺส, เอตํ ฉนฺนปถํ วิชานาหีติฯ
อมราเทวีปญฺหชาตกํ ทุติยํฯ