97. นามสิทฺธิชาตกํ
[97]
ชีวกญฺจ มตํ ทิสฺวา, ธนปาลิญฺจ ทุคฺคตํ;
ปนฺถกญฺจ วเน มูฬฺหํ, ปาปโก ปุนราคโตติฯ
นามสิทฺธิชาตกํ สตฺตมํฯ
98. กูฏวาณิชชาตกํ
[98]
สาธุ โข ปณฺฑิโต นาม, น ตฺเวว อติปณฺฑิโต;
อติปณฺฑิเตน ปุตฺเตน, มนมฺหิ อุปกูฬิโตติ [อุปกูลิโตติ (สี.), อุปกุฏฺฐิโตติ (สฺยา.), อุปกุฏิโต (ก.)]ฯ
กูฏวาณิชชาตกํ อฏฺฐมํฯ
99. ปโรสหสฺสชาตกํ
[99]
ปโรสหสฺสมฺปิ สมาคตานํ, กนฺเทยฺยุํ เต วสฺสสตํ อปญฺญา;
เอโกว เสยฺโย ปุริโส สปญฺโญ, โย ภาสิตสฺส วิชานาติ อตฺถนฺติฯ
ปโรสหสฺสชาตกํ นวมํฯ
100. อสาตรูปชาตกํ
[100]
อสาตํ สาตรูเปน, ปิยรูเปน อปฺปิยํ;
ทุกฺขํ สุขสฺส รูเปน, ปมตฺตมติวตฺตตีติฯ
อสาตรูปชาตกํ ทสมํฯ
ลิตฺตวคฺโค ทสโมฯ
ตสฺสุทฺทานํ –
คิลมกฺขกุตูหล มาตุกสฺสา, มุนินา จ อนิจฺจต ปตฺตวรํ;
ธนปาลิวโร อติปณฺฑิตโก, สปโรสหสฺสอสาตทสาติฯ
มชฺฌิโม ปณฺณาสโกฯ
11. ปโรสตวคฺโค
101. ปโรสตชาตกํ
[101]
ปโรสตํ เจปิ สมาคตานํ, ฌาเยยฺยุํ เต วสฺสสตํ อปญฺญา;
เอโกว เสยฺโย ปุริโส สปญฺโญ, โย ภาสิตสฺส วิชานาติ อตฺถนฺติฯ
ปโรสตชาตกํ ปฐมํฯ
102. ปณฺณิกชาตกํ
[102]
โย ทุกฺขผุฏฺฐาย ภเวยฺย ตาณํ, โส เม ปิตา ทุพฺภิ [ทูภิ (สี. ปี.)] วเน กโรติ;
สา กสฺส กนฺทามิ วนสฺส มชฺเฌ, โย ตายิตา โส สหสํ [สหสา (สี. สฺยา. ปี.)] กโรตีติฯ
ปณฺณิกชาตกํ ทุติยํฯ
103. เวริชาตกํ
[103]
ยตฺถ เวรี นิวิสติ [นิวสติ (สี. ก.)], น วเส ตตฺถ ปณฺฑิโต;
เอกรตฺตํ ทิรตฺตํ วา, ทุกฺขํ วสติ เวริสูติฯ
เวริชาตกํ ตติยํฯ
104. มิตฺตวินฺทกชาตกํ
[104]
จตุพฺภิ อฏฺฐชฺฌคมา, อฏฺฐาหิปิ จ โสฬส;
โสฬสาหิ จ พาตฺติํส [พตฺติํส (สี. สฺยา. ปี.)], อตฺริจฺฉํ จกฺกมาสโท;
อิจฺฉาหตสฺส โปสสฺส, จกฺกํ ภมติ มตฺถเกติฯ
มิตฺตวินฺทกชาตกํ จตุตฺถํฯ