เมนู

91. ลิตฺตชาตกํ

[91]

ลิตฺตํ ปรเมน เตชสา, คิลมกฺขํ ปุริโส น พุชฺฌติ;

คิล เร คิล ปาปธุตฺตก, ปจฺฉา เต กฏุกํ ภวิสฺสตีติฯ

ลิตฺตชาตกํ ปฐมํฯ

92. มหาสารชาตกํ

[92]

อุกฺกฏฺเฐ สูรมิจฺฉนฺติ, มนฺตีสุ อกุตูหลํ;

ปิยญฺจ อนฺนปานมฺหิ, อตฺเถ ชาเต จ ปณฺฑิตนฺติฯ

มหาสารชาตกํ ทุติยํฯ

93. วิสาสโภชนชาตกํ

[93]

น วิสฺสเส อวิสฺสตฺเถ, วิสฺสตฺเถปิ น วิสฺสเส;

วิสฺสาสา ภยมนฺเวติ, สีหํว มิคมาตุกาติ [มิคมาตุยา (ก.)]

วิสาสโภชนชาตกํ ตติยํฯ

94. โลมหํสชาตกํ

[94]

โสตตฺโต โสสินฺโท [โสสีโต (สี. สฺยา. ปี.), โสสิโน (ก.)] เจว, เอโก ภิํสนเก วเน;

นคฺโค น จคฺคิมาสีโน, เอสนาปสุโต มุนีติฯ

โลมหํสชาตกํ จตุตฺถํฯ

95. มหาสุทสฺสนชาตกํ

[95]

อนิจฺจา วต สงฺขารา, อุปฺปาทวยธมฺมิโน;

อุปฺปชฺชิตฺวา นิรุชฺฌนฺติ, เตสํ วูปสโม สุโขติฯ

มหาสุทสฺสนชาตกํ ปญฺจมํฯ

96. เตลปตฺตชาตกํ

[96]

สมติตฺติกํ อนวเสกํ, เตลปตฺตํ ยถา ปริหเรยฺย;

เอวํ สจิตฺตมนุรกฺเข, ปตฺถยาโน ทิสํ อคตปุพฺพนฺติฯ

เตลปตฺตชาตกํ ฉฏฺฐํฯ

97. นามสิทฺธิชาตกํ

[97]

ชีวกญฺจ มตํ ทิสฺวา, ธนปาลิญฺจ ทุคฺคตํ;

ปนฺถกญฺจ วเน มูฬฺหํ, ปาปโก ปุนราคโตติฯ

นามสิทฺธิชาตกํ สตฺตมํฯ

98. กูฏวาณิชชาตกํ

[98]

สาธุ โข ปณฺฑิโต นาม, น ตฺเวว อติปณฺฑิโต;

อติปณฺฑิเตน ปุตฺเตน, มนมฺหิ อุปกูฬิโตติ [อุปกูลิโตติ (สี.), อุปกุฏฺฐิโตติ (สฺยา.), อุปกุฏิโต (ก.)]

กูฏวาณิชชาตกํ อฏฺฐมํฯ

99. ปโรสหสฺสชาตกํ

[99]

ปโรสหสฺสมฺปิ สมาคตานํ, กนฺเทยฺยุํ เต วสฺสสตํ อปญฺญา;

เอโกว เสยฺโย ปุริโส สปญฺโญ, โย ภาสิตสฺส วิชานาติ อตฺถนฺติฯ

ปโรสหสฺสชาตกํ นวมํฯ

100. อสาตรูปชาตกํ

[100]

อสาตํ สาตรูเปน, ปิยรูเปน อปฺปิยํ;

ทุกฺขํ สุขสฺส รูเปน, ปมตฺตมติวตฺตตีติฯ

อสาตรูปชาตกํ ทสมํฯ

ลิตฺตวคฺโค ทสโมฯ

ตสฺสุทฺทานํ –

คิลมกฺขกุตูหล มาตุกสฺสา, มุนินา จ อนิจฺจต ปตฺตวรํ;

ธนปาลิวโร อติปณฺฑิตโก, สปโรสหสฺสอสาตทสาติฯ

มชฺฌิโม ปณฺณาสโกฯ

11. ปโรสตวคฺโค