87. มงฺคลชาตกํ

[87]

ยสฺส มงฺคลา สมูหตาเส [สมูหตา (สี. สฺยา. ปี. สุ. นิ. 362], อุปฺปาตา [อุปฺปาทา (ปี.)] สุปินา จ ลกฺขณา จ;

โส [ส (สี. ปี. ก.)] มงฺคลโทสวีติวตฺโต, ยุคโยคาธิคโต น ชาตุเมตีติฯ

มงฺคลชาตกํ สตฺตมํฯ

88. สารมฺภชาตกํ

[88]

กลฺยาณิเมว มุญฺเจยฺย, น หิ มุญฺเจยฺย ปาปิกํ;

โมกฺโข กลฺยาณิยา สาธุ, มุตฺวา ตปฺปติ ปาปิกนฺติฯ

สารมฺภชาตกํ อฏฺฐมํฯ

89. กุหกชาตกํ

[89]

วาจาว กิร เต อาสิ, สณฺหา สขิลภาณิโน;

ติณมตฺเต อสชฺชิตฺโถ, โน จ นิกฺขสตํ หรนฺติฯ

กุหกชาตกํ นวมํฯ

90. อกตญฺญุชาตกํ

[90]

โย ปุพฺเพ กตกลฺยาโณ, กตตฺโถ นาวพุชฺฌติ;

ปจฺฉา กิจฺเจ สมุปฺปนฺเน, กตฺตารํ นาธิคจฺฉตีติฯ

อกตญฺญุชาตกํ ทสมํฯ

อปายิมฺหวคฺโค นวโมฯ

ตสฺสุทฺทานํ –

อปายิมฺห จ ทูภกํ สตฺตปทํ, ฉฬทฺวร จ อายตินา จ ปุน;

อหิสีลว มงฺคลิ ปาปิกสฺสา, สตํนิกฺข กตตฺถวเรน ทสาติฯ

10. ลิตฺตวคฺโค

91. ลิตฺตชาตกํ

[91]

ลิตฺตํ ปรเมน เตชสา, คิลมกฺขํ ปุริโส น พุชฺฌติ;

คิล เร คิล ปาปธุตฺตก, ปจฺฉา เต กฏุกํ ภวิสฺสตีติฯ

ลิตฺตชาตกํ ปฐมํฯ

92. มหาสารชาตกํ

[92]

อุกฺกฏฺเฐ สูรมิจฺฉนฺติ, มนฺตีสุ อกุตูหลํ;

ปิยญฺจ อนฺนปานมฺหิ, อตฺเถ ชาเต จ ปณฺฑิตนฺติฯ

มหาสารชาตกํ ทุติยํฯ

93. วิสาสโภชนชาตกํ

[93]

น วิสฺสเส อวิสฺสตฺเถ, วิสฺสตฺเถปิ น วิสฺสเส;

วิสฺสาสา ภยมนฺเวติ, สีหํว มิคมาตุกาติ [มิคมาตุยา (ก.)]ฯ

วิสาสโภชนชาตกํ ตติยํฯ

94. โลมหํสชาตกํ

[94]

โสตตฺโต โสสินฺโท [โสสีโต (สี. สฺยา. ปี.), โสสิโน (ก.)] เจว, เอโก ภิํสนเก วเน;

นคฺโค น จคฺคิมาสีโน, เอสนาปสุโต มุนีติฯ

โลมหํสชาตกํ จตุตฺถํฯ

95. มหาสุทสฺสนชาตกํ

[95]

อนิจฺจา วต สงฺขารา, อุปฺปาทวยธมฺมิโน;

อุปฺปชฺชิตฺวา นิรุชฺฌนฺติ, เตสํ วูปสโม สุโขติฯ

มหาสุทสฺสนชาตกํ ปญฺจมํฯ

96. เตลปตฺตชาตกํ

[96]

สมติตฺติกํ อนวเสกํ, เตลปตฺตํ ยถา ปริหเรยฺย;

เอวํ สจิตฺตมนุรกฺเข, ปตฺถยาโน ทิสํ อคตปุพฺพนฺติฯ

เตลปตฺตชาตกํ ฉฏฺฐํฯ