82. มิตฺตวินฺทกชาตกํ

[82]

อติกฺกมฺม รมณกํ, สทามตฺตญฺจ ทูภกํ;

สฺวาสิ ปาสาณมาสีโน, ยสฺมา ชีวํ น โมกฺขสีติฯ

มิตฺตวินฺทกชาตกํ ทุติยํฯ

83. กาลกณฺณิชาตกํ

[83]

มิตฺโต หเว สตฺตปเทน โหติ, สหาโย ปน ทฺวาทสเกน โหติ;

มาสฑฺฒมาเสน จ ญาติ โหติ, ตตุตฺตริํ อตฺตสโมปิ โหติ;

โสหํ กถํ อตฺตสุขสฺส เหตุ, จิรสนฺถุตํ [จิรสนฺธวํ (ก.), จิรสตฺถุนํ (ปี.)] กาฬกณฺณิํ ชเหยฺยนฺติฯ

กาลกณฺณิชาตกํ ตติยํฯ

84. อตฺถสฺสทฺวารชาตกํ

[84]

อาโรคฺยมิจฺเฉ ปรมญฺจ ลาภํ, สีลญฺจ วุทฺธานุมตํ สุตญฺจ;

ธมฺมานุวตฺตี จ อลีนตา จ, อตฺถสฺส ทฺวารา ปมุขา ฉเฬเตติฯ

อตฺถสฺสทฺวารชาตกํ จตุตฺถํฯ

85. กิํปกฺกชาตกํ

[85]

อายติํ โทสํ นาญฺญาย, โย กาเม ปฏิเสวติ;

วิปากนฺเต หนนฺติ นํ, กิํปกฺกมิว ภกฺขิตนฺติฯ

กิํปกฺกชาตกํ ปญฺจมํฯ

86. สีลวีมํสกชาตกํ

[86]

สีลํ กิเรว กลฺยาณํ, สีลํ โลเก อนุตฺตรํ;

ปสฺส โฆรวิโส นาโค, สีลวาติ น หญฺญตีติฯ

สีลวีมํสกชาตกํ ฉฏฺฐํฯ

87. มงฺคลชาตกํ

[87]

ยสฺส มงฺคลา สมูหตาเส [สมูหตา (สี. สฺยา. ปี. สุ. นิ. 362], อุปฺปาตา [อุปฺปาทา (ปี.)] สุปินา จ ลกฺขณา จ;

โส [ส (สี. ปี. ก.)] มงฺคลโทสวีติวตฺโต, ยุคโยคาธิคโต น ชาตุเมตีติฯ

มงฺคลชาตกํ สตฺตมํฯ

88. สารมฺภชาตกํ

[88]

กลฺยาณิเมว มุญฺเจยฺย, น หิ มุญฺเจยฺย ปาปิกํ;

โมกฺโข กลฺยาณิยา สาธุ, มุตฺวา ตปฺปติ ปาปิกนฺติฯ

สารมฺภชาตกํ อฏฺฐมํฯ

89. กุหกชาตกํ

[89]

วาจาว กิร เต อาสิ, สณฺหา สขิลภาณิโน;

ติณมตฺเต อสชฺชิตฺโถ, โน จ นิกฺขสตํ หรนฺติฯ

กุหกชาตกํ นวมํฯ

90. อกตญฺญุชาตกํ

[90]

โย ปุพฺเพ กตกลฺยาโณ, กตตฺโถ นาวพุชฺฌติ;

ปจฺฉา กิจฺเจ สมุปฺปนฺเน, กตฺตารํ นาธิคจฺฉตีติฯ

อกตญฺญุชาตกํ ทสมํฯ

อปายิมฺหวคฺโค นวโมฯ

ตสฺสุทฺทานํ –

อปายิมฺห จ ทูภกํ สตฺตปทํ, ฉฬทฺวร จ อายตินา จ ปุน;

อหิสีลว มงฺคลิ ปาปิกสฺสา, สตํนิกฺข กตตฺถวเรน ทสาติฯ

10. ลิตฺตวคฺโค