79. ขรสฺสรชาตกํ

[79]

ยโต วิลุตฺตา จ หตา จ คาโว, ทฑฺฒานิ เคหานิ ชโน จ นีโต;

อถาคมา ปุตฺตหตาย ปุตฺโต, ขรสฺสรํ ฑิณฺฑิมํ [เทณฺฑิมํ (สี. สฺยา. ปี.), ฑินฺทิมํ (ก.)] วาทยนฺโตติฯ

ขรสฺสรชาตกํ นวมํฯ

80. ภีมเสนชาตกํ

[80]

ยํ เต ปวิกตฺถิตํ ปุเร, อถ เต ปูติสรา สชนฺติ ปจฺฉา;

อุภยํ น สเมติ ภีมเสน, ยุทฺธกถา จ อิทญฺจ เต วิหญฺญนฺติฯ

ภีมเสนชาตกํ ทสมํฯ

วรุณวคฺโค [วรณวคฺโค (สี. ปี.)] อฏฺฐโมฯ

ตสฺสุทฺทานํ –

วรุณา อกตญฺญูวเร ตุ สจฺจวรํ, สวนปฺปตินา จ อภิตฺถนย;

กรุณาย สิลาปฺลว อิลฺลิสโต, ปุน ฑิณฺฑิมปูติสเรน ทสาติฯ

9. อปายิมฺหวคฺโค

81. สุราปานชาตกํ

[81]

อปายิมฺห อนจฺจิมฺห, อคายิมฺห รุทิมฺห จ;

วิสญฺญิกรณิํ ปิตฺวา [ปีตฺวา (สี. สฺยา. ปี.)], ทิฏฺฐา นาหุมฺห วานราติฯ

สุราปานชาตกํ ปฐมํฯ

82. มิตฺตวินฺทกชาตกํ

[82]

อติกฺกมฺม รมณกํ, สทามตฺตญฺจ ทูภกํ;

สฺวาสิ ปาสาณมาสีโน, ยสฺมา ชีวํ น โมกฺขสีติฯ

มิตฺตวินฺทกชาตกํ ทุติยํฯ

83. กาลกณฺณิชาตกํ

[83]

มิตฺโต หเว สตฺตปเทน โหติ, สหาโย ปน ทฺวาทสเกน โหติ;

มาสฑฺฒมาเสน จ ญาติ โหติ, ตตุตฺตริํ อตฺตสโมปิ โหติ;

โสหํ กถํ อตฺตสุขสฺส เหตุ, จิรสนฺถุตํ [จิรสนฺธวํ (ก.), จิรสตฺถุนํ (ปี.)] กาฬกณฺณิํ ชเหยฺยนฺติฯ

กาลกณฺณิชาตกํ ตติยํฯ

84. อตฺถสฺสทฺวารชาตกํ

[84]

อาโรคฺยมิจฺเฉ ปรมญฺจ ลาภํ, สีลญฺจ วุทฺธานุมตํ สุตญฺจ;

ธมฺมานุวตฺตี จ อลีนตา จ, อตฺถสฺส ทฺวารา ปมุขา ฉเฬเตติฯ

อตฺถสฺสทฺวารชาตกํ จตุตฺถํฯ

85. กิํปกฺกชาตกํ

[85]

อายติํ โทสํ นาญฺญาย, โย กาเม ปฏิเสวติ;

วิปากนฺเต หนนฺติ นํ, กิํปกฺกมิว ภกฺขิตนฺติฯ

กิํปกฺกชาตกํ ปญฺจมํฯ

86. สีลวีมํสกชาตกํ

[86]

สีลํ กิเรว กลฺยาณํ, สีลํ โลเก อนุตฺตรํ;

ปสฺส โฆรวิโส นาโค, สีลวาติ น หญฺญตีติฯ

สีลวีมํสกชาตกํ ฉฏฺฐํฯ