สิขีสพฺพฆโสปิ จ วีณวโร, ปิสุณา มิตฺตเภทิกา นนฺที นที;

มุทุลกฺขณ โสทริยา จ มโน, วิส สาธุชิเตน ภวนฺติ ทสาติฯ

8. วรุณวคฺโค

71. วรุณชาตกํ

[71]

โย ปุพฺเพ กรณียานิ, ปจฺฉา โส กาตุมิจฺฉติ;

วรุณกฏฺฐ [วรณกฏฺฐ (สี. ปี.)] ภญฺโชว, ส ปจฺฉา มนุตปฺปตีติฯ

วรุณชาตกํ ปฐมํฯ

72. สีลวหตฺถิชาตกํ

[72]

อกตญฺญุสฺส โปสสฺส, นิจฺจํ วิวรทสฺสิโน;

สพฺพํ เจ ปถวิํ [ปฐวิํ (สี. สฺยา. ปี.)] ทชฺชา, เนว นํ อภิราธเยติฯ

สีลวหตฺถิชาตกํ ทุติยํฯ

73. สจฺจํกิรชาตกํ

[73]

สจฺจํ กิเรวมาหํสุ, นรา เอกจฺจิยา อิธ;

กฏฺฐํ นิปฺลวิตํ [วิปฺลาวิตํ (สี. ปี.)] เสยฺโย, น ตฺเวเวกจฺจิโย นโรติฯ

สจฺจํกิรชาตกํ ตติยํฯ

74. รุกฺขธมฺมชาตกํ

[74]

สาธู สมฺพหุลา ญาตี, อปิ รุกฺขา อรญฺญชา;

วาโต วหติ เอกฏฺฐํ, พฺรหนฺตมฺปิ วนปฺปตินฺติฯ

รุกฺขธมฺมชาตกํ จตุตฺถํฯ

75. มจฺฉชาตกํ

[75]

อภิตฺถนย ปชฺชุนฺน, นิธิํ กากสฺส นาสย;

กากํ โสกาย รนฺเธหิ, มญฺจ โสกา ปโมจยาติฯ

มจฺฉชาตกํ ปญฺจมํฯ

76. อสงฺกิยชาตกํ

[76]

อสงฺกิโยมฺหิ คามมฺหิ, อรญฺเญ นตฺถิ เม ภยํ;

อุชุํ มคฺคํ สมารูฬฺโห, เมตฺตาย กรุณาย จาติฯ

อสงฺกิยชาตกํ ฉฏฺฐํฯ

77. มหาสุปินชาตกํ

[77]

อุสภา รุกฺขา คาวิโย ควา จ, อสฺโส กํโส สิงฺคาลี [สิคาสี (สี. สฺยา. ปี.)] จ กุมฺโภ;

โปกฺขรณี จ อปากจนฺทนํ, ลาพูนิ สีทนฺติ สิลา ปฺลวนฺติฯ

มณฺฑูกิโย กณฺหสปฺเป คิลนฺติ, กากํ สุปณฺณา ปริวารยนฺติ;

ตสา วกา เอฬกานํ ภยาหิ, วิปริยาโส [วิปริยาโย (สฺยา. ก.)] วตฺตติ นยิธ มตฺถีติฯ

มหาสุปินชาตกํ สตฺตมํฯ

78. อิลฺลิสชาตกํ

[78]

อุโภ ขญฺชา อุโภ กุณี, อุโภ วิสมจกฺขุกา [จกฺขุลา (สี. ปี.)];

อุภินฺนํ ปิฬกา [ปีฬกา (สฺยา.)] ชาตา, นาหํ ปสฺสามิ อิลฺลิสนฺติฯ

อิลฺลิสชาตกํ อฏฺฐมํฯ