ยถา อิจฺฉิํ ตถาหุทกา ถลา, สุร สาทุผโล จ อลีนมโน;
สมฺปหฏฺฐมโน จตุโร จ ตโย, สตลทฺธก โภคธเนน ทสาติฯ
7. อิตฺถิวคฺโค
61. อสาตมนฺตชาตกํ
[61]
อสา โลกิตฺถิโย นาม, เวลา ตาสํ น วิชฺชติ;
สารตฺตา จ ปคพฺภา จ, สิขี สพฺพฆโส ยถา;
ตา หิตฺวา ปพฺพชิสฺสามิ, วิเวกมนุพฺรูหยนฺติฯ
อสาตมนฺตชาตกํ ปฐมํฯ
62. อณฺฑภูตชาตกํ
[62]
ยํ พฺราหฺมโณ อวาเทสิ, วีณํ สมุขเวฐิโต;
อณฺฑภูตา ภตา ภริยา, ตาสุ โก ชาตุ วิสฺสเสติฯ
อณฺฑภูตชาตกํ ทุติยํฯ
63. ตกฺกปณฺฑิตชาตกํ
[63]
โกธนา อกตญฺญู จ, ปิสุณา มิตฺตเภทิกา [ปิสุณา จ วิเภทิกา (สี. สฺยา. ปี.)];
พฺรหฺมจริยํ จร ภิกฺขุ, โส สุขํ น วิหาหสีติ [ปิหาหิสีติ (สี. สฺยา. ปี.), วิหายสิ (ก.)]ฯ
ตกฺกปณฺฑิตชาตกํ [ตกฺกชาตกํ (สี. สฺยา. ปี. อฏฺฐ.)] ตติยํฯ
64. ทุราชานชาตกํ
[64]
มา สุ นนฺทิ อิจฺฉติ มํ, มา สุ โสจิ น มิจฺฉติ [น อิจฺฉติ (สี. สฺยา. ปี.)];
ถีนํ ภาโว ทุราชาโน, มจฺฉสฺเสโวทเก คตนฺติฯ
ทุราชานชาตกํ จตุตฺถํฯ
65. อนภิรติชาตกํ
[65]
ยถา นที จ ปนฺโถ จ, ปานาคารํ สภา ปปา;
เอวํ โลกิตฺถิโย นาม, นาสํ กุชฺฌนฺติ ปณฺฑิตาติฯ
อนภิรติชาตกํ ปญฺจมํฯ
66. มุทุลกฺขณชาตกํ
[66]
เอกา อิจฺฉา ปุเร อาสิ, อลทฺธา มุทุลกฺขณํ;
ยโต ลทฺธา อฬารกฺขี, อิจฺฉา อิจฺฉํ วิชายถาติฯ
มุทุลกฺขณชาตกํ ฉฏฺฐํฯ
67. อุจฺฉงฺคชาตกํ
[67]
อุจฺฉงฺเค เทว เม ปุตฺโต, ปเถ ธาวนฺติยา ปติ;
ตญฺจ เทสํ น ปสฺสามิ, ยโต โสทริยมานเยติ [โสทริยํ นเย (ก.)]ฯ
อุจฺฉงฺคชาตกํ สตฺตมํฯ
68. สาเกตชาตกํ
[68]
ยสฺมิํ มโน นิวิสติ, จิตฺตญฺจาปิ [จิตฺตํ วาปิ (กตฺถจิ)] ปสีทติ;
อทิฏฺฐปุพฺพเก โปเส, กามํ ตสฺมิมฺปิ วิสฺสเสติฯ
สาเกตชาตกํ อฏฺฐมํฯ
69. วิสวนฺตชาตกํ
[69]
ธิรตฺถุ ตํ วิสํ วนฺตํ, ยมหํ ชีวิตการณา;
วนฺตํ ปจฺจาวมิสฺสามิ [ปจฺจาหริสฺสามิ (ก.)], มตํ เม ชีวิตา วรนฺติฯ
วิสวนฺตชาตกํ นวมํฯ
70. กุทฺทาลชาตกํ
[70]
น ตํ ชิตํ สาธุ ชิตํ, ยํ ชิตํ อวชียติ;
ตํ โข ชิตํ สาธุ ชิตํ, ยํ ชิตํ นาวชียตีติฯ
กุทฺทาลชาตกํ ทสมํฯ
อิตฺถิวคฺโค สตฺตโมฯ
ตสฺสุทฺทานํ –