ยถา อิจฺฉิํ ตถาหุทกา ถลา, สุร สาทุผโล จ อลีนมโน;

สมฺปหฏฺฐมโน จตุโร จ ตโย, สตลทฺธก โภคธเนน ทสาติฯ

7. อิตฺถิวคฺโค

61. อสาตมนฺตชาตกํ

[61]

อสา โลกิตฺถิโย นาม, เวลา ตาสํ น วิชฺชติ;

สารตฺตา จ ปคพฺภา จ, สิขี สพฺพฆโส ยถา;

ตา หิตฺวา ปพฺพชิสฺสามิ, วิเวกมนุพฺรูหยนฺติฯ

อสาตมนฺตชาตกํ ปฐมํฯ

62. อณฺฑภูตชาตกํ

[62]

ยํ พฺราหฺมโณ อวาเทสิ, วีณํ สมุขเวฐิโต;

อณฺฑภูตา ภตา ภริยา, ตาสุ โก ชาตุ วิสฺสเสติฯ

อณฺฑภูตชาตกํ ทุติยํฯ

63. ตกฺกปณฺฑิตชาตกํ

[63]

โกธนา อกตญฺญู จ, ปิสุณา มิตฺตเภทิกา [ปิสุณา จ วิเภทิกา (สี. สฺยา. ปี.)];

พฺรหฺมจริยํ จร ภิกฺขุ, โส สุขํ น วิหาหสีติ [ปิหาหิสีติ (สี. สฺยา. ปี.), วิหายสิ (ก.)]ฯ

ตกฺกปณฺฑิตชาตกํ [ตกฺกชาตกํ (สี. สฺยา. ปี. อฏฺฐ.)] ตติยํฯ

64. ทุราชานชาตกํ

[64]

มา สุ นนฺทิ อิจฺฉติ มํ, มา สุ โสจิ น มิจฺฉติ [น อิจฺฉติ (สี. สฺยา. ปี.)];

ถีนํ ภาโว ทุราชาโน, มจฺฉสฺเสโวทเก คตนฺติฯ

ทุราชานชาตกํ จตุตฺถํฯ