ตสฺสาหํ โอทหิํ ปสฺสํ, ขุรปฺปานิสฺส ราชิโน;
ตทาหํ สุขิโต มุตฺโต, มาตรํ ทฏฺฐุมาคโตติฯ
นนฺทิยมิคราชชาตกํ ทสมํฯ
อวาริยวคฺโค ปฐโมฯ
ตสฺสุทฺทานํ –
อถ กุชฺฌรเถสภ เกตุวโร, สทรีมุข เนรุ ลตา จ ปุน;
อปนนฺท สิรี จ สุจิตฺตวโร, อถ ธมฺมิก นนฺทิมิเคน ทสาติฯ
2. ขรปุตฺตวคฺโค
386. ขรปุตฺตชาตกํ (6-2-1)
[76]
สจฺจํ กิเรวมาหํสุ, วสฺตํ [ภสฺตํ (สี. ปี.), กลกํ (สฺยา.), ครํ (ก.)] พาโลติ ปณฺฑิตา;
ปสฺส พาโล รโหกมฺมํ, อาวิกุพฺพํ น พุชฺฌติฯ
[77]
ตฺวํ โขปิ [ตฺวํ นุ โข (สี. สฺยา.), ตฺวญฺจ โข (ปี.)] สมฺม พาโลสิ, ขรปุตฺต วิชานหิ;
รชฺชุยา หิ [รชฺชุยาสิ (ปี.)] ปริกฺขิตฺโต, วงฺโกฏฺโฐ โอหิโตมุโขฯ
[78]
อปรมฺปิ สมฺม เต พาลฺยํ [อยมฺปิ สมฺม เต พาโล (ก.)], โย มุตฺโต น ปลายสิ;
โส จ พาลตโร สมฺม, ยํ ตฺวํ วหสิ เสนกํฯ
[79]
ยํ นุ สมฺม อหํ พาโล, อชราช วิชานหิ;
อถ เกน เสนโก พาโล, ตํ เม อกฺขาหิ ปุจฺฉิโตฯ
[80]
อุตฺตมตฺถํ ลภิตฺวาน, ภริยาย โย ปทสฺสติ [ภยิยา โย ปทสฺสติ (ปี.), ภยิยา น ภวิสฺสติ (ก.)];
เตน ชหิสฺสตตฺตานํ, สา เจวสฺส น เหสฺสติฯ
[81]
น เว ปิยมฺเมติ [น ปิยเมติ (ก.), น ปิยเมทนฺติ (กตฺถจิ)] ชนินฺท ตาทิโส, อตฺตํ นิรํกตฺวา ปิยานิ เสวติ [เสวเย (?)];
อตฺตาว เสยฺโย ปรมา จ เสยฺโย, ลพฺภา ปิยา โอจิตตฺเถน ปจฺฉาติฯ
ขรปุตฺตชาตกํ ปฐมํฯ
387. สูจิชาตกํ (6-2-2)
[82]
อกกฺกสํ อผรุสํ, ขรโธตํ สุปาสิยํ;
สุขุมํ ติขิณคฺคญฺจ, โก สูจิํ เกตุมิจฺฉติฯ
[83]
สุมชฺชญฺจ สุปาสญฺจ, อนุปุพฺพํ [อนุปุพฺพ (สี. สฺยา.)] สุวฏฺฏิตํ;
ฆนฆาติมํ ปฏิถทฺธํ, โก สูจิํ เกตุมิจฺฉติฯ
[84]
อิโต ทานิ ปตายนฺติ, สูจิโย พฬิสานิ จ;
โกยํ กมฺมารคามสฺมิํ, สูจิํ วิกฺเกตุมิจฺฉติฯ
[85]
อิโต สตฺถานิ คจฺฉนฺติ, กมฺมนฺตา วิวิธา ปุถู;
โกยํ กมฺมารคามสฺมิํ, สูจิํ วิกฺเกตุมิจฺฉติ [มรหติ (สี. สฺยา. ปี.)]ฯ
[86]
สูจิํ กมฺมารคามสฺมิํ, วิกฺเกตพฺพา ปชานตา;
อาจริยาว ชานนฺติ [อาจริยา สญฺชานนฺติ (ก.), อาจริยา ปชานนฺติ (สฺยา.), อาจริยาว สญฺชานนฺติ (ปี.)], กมฺมํ สุกตทุกฺกฏํ [ทุกฺกตํ (สี. ปี.)]ฯ
[87]
อิมํ เจ [อิมญฺจ (สี. สฺยา. ปี.)] เต ปิตา ภทฺเท, สูจิํ ชญฺญา มยา กตํ;
ตยา จ มํ นิมนฺเตยฺย, ยญฺจตฺถญฺญํ ฆเร ธนนฺติฯ
สูจิชาตกํ ทุติยํฯ
388. ตุณฺฑิลชาตกํ (6-2-3)
[88]
นวฉนฺนเก [นวฉนฺทเก (สี. ปี.), นวจฺฉทฺทเก (สฺยา.)] ทานิ [โทณิ (ก.), ทานํ, ทาเน (กตฺถจิ)] ทิยฺยติ, ปุณฺณายํ โทณิ สุวามินี ฐิตา;
พหุเก ชเน ปาสปาณิเก, โน จ โข เม ปฏิภาติ ภุญฺชิตุํฯ
[89]
ตสสิ ภมสิ เลณมิจฺฉสิ, อตฺตาโณสิ กุหิํ คมิสฺสสิ;
อปฺโปสฺสุกฺโก ภุญฺช ตุณฺฑิล, มํสตฺถาย หิ โปสิตามฺหเส [โปสิยามเส (สี. สฺยา. ปี.)]ฯ
[90]
โอคห รหทํ อกทฺทมํ, สพฺพํ เสทมลํ ปวาหย;
คณฺหาหิ นวํ วิเลปนํ, ยสฺส คนฺโธ น กทาจิ ฉิชฺชติฯ
[91]
กตโม รหโท อกทฺทโม, กิํสุ เสทมลนฺติ วุจฺจติ;
กตมญฺจ นวํ วิเลปนํ, ยสฺส คนฺโธ น กทาจิ ฉิชฺชติฯ
[92]
ธมฺโม รหโท อกทฺทโม, ปาปํ เสทมลนฺติ วุจฺจติ;
สีลญฺจ นวํ วิเลปนํ, ตสฺส คนฺโธ น กทาจิ ฉิชฺชติฯ
[93]
นนฺทนฺติ สรีรฆาติโน, น จ นนฺทนฺติ สรีรธาริโน;
ปุณฺณาย จ ปุณฺณมาสิยา, รมมานาว ชหนฺติ ชีวิตนฺติฯ
ตุณฺฑิลชาตกํ ตติยํฯ
389. สุวณฺณกกฺกฏชาตกํ (6-2-4)
[94]
สิงฺคีมิโค อายตจกฺขุเนตฺโต, อฏฺฐิตฺตโจ วาริสโย อโลโม;
เตนาภิภูโต กปณํ รุทามิ, หเร สขา กิสฺส นุ มํ ชหาสิฯ
[95]
โส ปสฺสสนฺโต มหตา ผเณน, ภุชงฺคโม กกฺกฏมชฺฌปตฺโต;
สขา สขารํ ปริตายมาโน, ภุชงฺคมํ กกฺกฏโก คเหสิฯ
[96]
น วายสํ โน ปน กณฺหสปฺปํ, ฆาสตฺถิโก กกฺกฏโก อเทยฺย;
ปุจฺฉามิ ตํ อายตจกฺขุเนตฺต, อถ กิสฺส เหตุมฺห อุโภ คหีตาฯ
[97]
อยํ ปุริโส มม อตฺถกาโม, โย มํ คเหตฺวาน ทกาย เนติ;
ตสฺมิํ มเต ทุกฺขมนปฺปกํ เม, อหญฺจ เอโส จ อุโภ น โหมฯ
[98]
มมญฺจ ทิสฺวาน ปวทฺธกายํ, สพฺโพ ชโน หิํสิตุเมว มิจฺเฉ;
สาทุญฺจ ถูลญฺจ มุทุญฺจ มํสํ, กากาปิ มํ ทิสฺวาน [ทิสฺว (สี. ปี.)] วิเหฐเยยฺยุํฯ
[99]
สเจตสฺส เหตุมฺห อุโภ คหีตา, อุฏฺฐาตุ โปโส วิสมาวมามิ [วิสมาจมามิ (สี. ปี. ก.)];
มมญฺจ กากญฺจ ปมุญฺจ ขิปฺปํ, ปุเร วิสํ คาฬฺหมุเปติ มจฺจํฯ
[100]
สปฺปํ ปโมกฺขามิ น ตาว กากํ, ปฏิพนฺธโก [ปฏิพทฺธโก (สี. ปี.)] โหหิติ [โหติ หิ (สฺยา.)] ตาว กาโก;
ปุริสญฺจ ทิสฺวาน สุขิํ อโรคํ, กากํ ปโมกฺขามิ ยเถว สปฺปํฯ
[101]
กาโก ตทา เทวทตฺโต อโหสิ, มาโร ปน กณฺหสปฺโป อโหสิ;
อานนฺทภทฺโท กกฺกฏโก อโหสิ, อหํ ตทา พฺราหฺมโณ โหมิ สตฺถาติ [ตตฺถาติ (สี. ปี.)]ฯ
สุวณฺณกกฺกฏชาตกํ จตุตฺถํฯ
390. มยฺหกชาตกํ (6-2-5)
[102]
สกุโณ มยฺหโก นาม, คิริสานุทรีจโร;
ปกฺกํ ปิปฺผลิมารุยฺห, มยฺหํ มยฺหนฺติ กนฺทติฯ
[103]
ตสฺเสวํ วิลปนฺตสฺส, ทิชสงฺฆา สมาคตา;
ภุตฺวาน ปิปฺผลิํ ยนฺติ, วิลปตฺเวว โส ทิโชฯ
[104]
เอวเมว อิเธกจฺโจ, สงฺฆริตฺวา พหุํ ธนํ;
เนวตฺตโน น ญาตีนํ, ยโถธิํ ปฏิปชฺชติฯ
[105]
น โส อจฺฉาทนํ ภตฺตํ, น มาลํ น วิเลปนํ;
อนุโภติ [นานุโภติ (สฺยา. ก.)] สกิํ กิญฺจิ, น สงฺคณฺหาติ ญาตเกฯ
[106]
ตสฺเสวํ วิลปนฺตสฺส, มยฺหํ มยฺหนฺติ รกฺขโต;
ราชาโน อถ วา โจรา, ทายทา เย ว [เย จ (สฺยา. ก.)] อปฺปิยา;
ธนมาทาย คจฺฉนฺติ, วิลปตฺเวว โส นโรฯ
[107]
ธีโร [ธีโร จ (สี.)] โภเค อธิคมฺม, สงฺคณฺหาติ จ ญาตเก;
เตน โส กิตฺติํ ปปฺโปติ, เปจฺจ สคฺเค ปโมทตีติ [สคฺเค จ โมทตีติ (สี. ปี.)]ฯ
มยฺหกชาตกํ ปญฺจมํฯ
391. วิชฺชาธรชาตกํ (6-2-6)
[108]
ทุพฺพณฺณรูปํ ตุวมริยวณฺณี, ปุรกฺขตฺวา [ปุรกฺขิตฺวา (สฺยา. ก.)] ปญฺชลิโก นมสฺสสิ;
เสยฺโย นุ เต โส อุทวา [อุทาหุ (สฺยา. ก.)] สริกฺโข, นามํ ปรสฺสตฺตโน จาปิ พฺรูหิฯ
[109]
น นามโคตฺตํ คณฺหนฺติ ราช, สมฺมคฺคตานุชฺชุคตาน [สมคฺคตานุชฺชุคตาน (สฺยา.), สมุคฺคตานุชฺชุคตาน (ก.)] เทวา;
อหญฺจ เต นามเธยฺยํ วทามิ, สกฺโกหมสฺมี ติทสานมินฺโทฯ
[110]
โย ทิสฺวา ภิกฺขุํ จรณูปปนฺนํ, ปุรกฺขตฺวา ปญฺชลิโก นมสฺสติ;
ปุจฺฉามิ ตํ เทวราเชตมตฺถํ, อิโต จุโต กิํ ลภเต สุขํ โสฯ
[111]
โย ทิสฺวา ภิกฺขุํ จรณูปปนฺนํ, ปุรกฺขตฺวา ปญฺชลิโก นมสฺสติ;
ทิฏฺเฐว ธมฺเม ลภเต ปสํสํ, สคฺคญฺจ โส ยาติ สรีรเภทาฯ
[112]
ลกฺขี วต เม อุทปาทิ อชฺช, ยํ วาสวํ ภูตปติทฺทสาม;
ภิกฺขุญฺจ ทิสฺวาน ตุวญฺจ สกฺก, กาหามิ ปุญฺญานิ อนปฺปกานิฯ
[113]
อทฺธา หเว เสวิตพฺพา สปญฺญา, พหุสฺสุตา เย พหุฐานจินฺติโน;
ภิกฺขุญฺจ ทิสฺวาน มมญฺจ ราช, กโรหิ ปุญฺญานิ อนปฺปกานิฯ
[114]
อกฺโกธโน นิจฺจปสนฺนจิตฺโต, สพฺพาติถียาจโยโค ภวิตฺวา;
นิหจฺจ มานํ อภิวาทยิสฺสํ, สุตฺวาน เทวินฺท สุภาสิตานีติฯ
วิชฺชาธร [ธชวิเหฐก (สี. ปี.), ปพฺพชิตวิเหฐก (สฺยา.)] ชาตกํ ฉฏฺฐํฯ
392. สิงฺฆปุปฺผชาตกํ (6-2-7)
[115]
ยเมตํ [ยเมกํ (ปี.)] วาริชํ ปุปฺผํ, อทินฺนํ อุปสิงฺฆสิ;
เอกงฺคเมตํ เถยฺยานํ, คนฺธเถโนสิ มาริสฯ
[116]
น หรามิ น ภญฺชามิ, อารา สิงฺฆามิ วาริชํ;
อถ เกน นุ วณฺเณน, คนฺธเถโนติ วุจฺจติฯ
[117]
โยยํ ภิสานิ ขณติ, ปุณฺฑรีกานิ ภญฺชติ;
เอวํ อากิณฺณกมฺมนฺโต, กสฺมา เอโส น วุจฺจติฯ
[118]
อากิณฺณลุทฺโท ปุริโส, ธาติเจลํว มกฺขิโต;
ตสฺมิํ เม วจนํ นตฺถิ, ตญฺจารหามิ วตฺตเวฯ
[119]
อนงฺคณสฺส โปสสฺส, นิจฺจํ สุจิคเวสิโน;
วาลคฺคมตฺตํ ปาปสฺส, อพฺภามตฺตํว ขายติฯ
[120]
อทฺธา มํ ยกฺข ชานาสิ, อโถ มํ อนุกมฺปสิ;
ปุนปิ ยกฺข วชฺชาสิ, ยทา ปสฺสสิ เอทิสํฯ
[121]
เนว ตํ อุปชีวามิ, นปิ เต ภตกามฺหเส [ภตกมฺหเส (สี. ปี.), ภติกมฺหเส (สฺยา.)];
ตฺวเมว ภิกฺขุ ชาเนยฺย, เยน คจฺเฉยฺย สุคฺคตินฺติฯ
สิงฺฆปุปฺผ [ภิสปุปฺผ (สี. ปี.), อุปสิงฺฆปุปฺผ (สฺยา.)] ชาตกํ สตฺตมํฯ
393. วิฆาสาทชาตกํ (6-2-8)
[122]
สุสุขํ วต ชีวนฺติ, เย ชนา วิฆาสาทิโน;
ทิฏฺเฐว ธมฺเม ปาสํสา, สมฺปราเย จ สุคฺคตีฯ
[123]
สุกสฺส [สุวสฺส (สี. สฺยา. ปี.)] ภาสมานสฺส, น นิสาเมถ ปณฺฑิตา;
อิทํ สุณาถ โสทริยา, อมฺเหวายํ ปสํสติฯ
[124]
นาหํ ตุมฺเห ปสํสามิ, กุณปาทา สุณาถ เม;
อุจฺฉิฏฺฐโภชิโน [โภชนา (ก.)] ตุมฺเห, น ตุมฺเห วิฆาสาทิโนฯ
[125]
สตฺตวสฺสา ปพฺพชิตา, เมชฺฌารญฺเญ [มชฺเฌรญฺเญ (ก.)] สิขณฺฑิโน;
วิฆาเสเนว ยาเปนฺตา, มยํ เจ โภโต คารยฺหา;
เก นุ โภโต ปสํสิยาฯ
[126]
ตุมฺเห สีหานํ พฺยคฺฆานํ, วาฬานญฺจาวสิฏฺฐกํ;
อุจฺฉิฏฺเฐเนว ยาเปนฺตา, มญฺญิวฺโห วิฆาสาทิโนฯ
[127]
เย พฺราหฺมณสฺส สมณสฺส, อญฺญสฺส วา [อญฺญสฺส จ (สี. สฺยา.), อญฺญสฺเสว (ปี.)] วนิพฺพิโน [วณิพฺพิโน (สี. สฺยา.)];
ทตฺวาว [ทตฺวาน (ปี. ก.)] เสสํ ภุญฺชนฺติ, เต ชนา วิฆาสาทิโนติฯ
วิฆาสาทชาตกํ อฏฺฐมํฯ
394. วฏฺฏกชาตกํ (6-2-9)
[128]
ปณีตํ ภุญฺชเส ภตฺตํ, สปฺปิเตลญฺจ มาตุล;
อถ เกน นุ วณฺเณน, กิโส ตฺวมสิ วายสฯ
[129]
อมิตฺตมชฺเฌ วสโต, เตสุ อามิสเมสโต;
นิจฺจํ อุพฺพิคฺคหทยสฺส, กุโต กากสฺส ทฬฺหิยํฯ
[130]
นิจฺจํ อุพฺเพคิโน [อุพฺพิคฺคิโน (สฺยา. ก.), อุพฺเพธิโน (สี.)] กากา, ธงฺกา ปาเปน กมฺมุนา;
ลทฺโธ ปิณฺโฑ น ปีเณติ, กิโส เตนสฺมิ วฏฺฏกฯ
[131]
ลูขานิ ติณพีชานิ, อปฺปสฺเนหานิ ภุญฺชสิ;
อถ เกน นุ วณฺเณน, ถูโล ตฺวมสิ วฏฺฏกฯ
[132]
อปฺปิจฺฉา อปฺปจินฺตาย, อทูรคมเนน จ;
ลทฺธาลทฺเธน ยาเปนฺโต, ถูโล เตนสฺมิ วายสฯ
[133]
อปฺปิจฺฉสฺส หิ โปสสฺส, อปฺปจินฺตสุขสฺส [อปฺปจินฺติสุขสฺส (สี. สฺยา. ปี.)] จ;
สุสงฺคหิตมานสฺส [สุสงฺคหิตปมาณสฺส (สี. สฺยา. ปี.)], วุตฺตี สุสมุทานยาติฯ
วฏฺฏกชาตกํ นวมํฯ
395. ปาราวตชาตกํ (6-2-10)
[134]
จิรสฺสํ วต ปสฺสามิ, สหายํ มณิธารินํ;
สุกตา [สุกตาย (สี. ปี.)] มสฺสุกุตฺติยา, โสภเต วต เม สขาฯ
[135]
ปรูฬฺหกจฺฉนขโลโม , อหํ กมฺเมสุ พฺยาวโฏ;
จิรสฺสํ นฺหาปิตํ ลทฺธา, โลมํ ตํ อชฺชํ หารยิํ [อปหารยิํ (สี. ปี.)]ฯ
[136]
ยํ นุ โลมํ อหาเรสิ, ทุลฺลภํ ลทฺธ กปฺปกํ;
อถ กิญฺจรหิ เต สมฺม, กณฺเฐ กิณิกิณายติ [อิทํ กณฺเฐ กิณายติ (ก.), กณฺเฐ กิํนิกิลายติ (สฺยา.)]ฯ
[137]
มนุสฺสสุขุมาลานํ, มณิ กณฺเฐสุ ลมฺพติ;
เตสาหํ อนุสิกฺขามิ, มา ตฺวํ มญฺญิ ทวา กตํฯ
[138]
สเจปิมํ ปิหยสิ, มสฺสุกุตฺติํ สุการิตํ;
การยิสฺสามิ เต สมฺม, มณิญฺจาปิ ททามิ เตฯ
[139]
ตฺวญฺเญว มณินา ฉนฺโน, สุกตาย จ มสฺสุยา;
อามนฺต โข ตํ คจฺฉามิ, ปิยํ เม ตว ทสฺสนนฺติฯ
ปาราวตชาตกํ [กากชาตกํ (สี. ปี.), มณิชาตกํ (สฺยา.)] ทสมํฯ
ขรปุตฺตวคฺโค [เสนกวคฺโค (สี. ปี.), ขุรปุตฺตวคฺโค (สฺยา.), สูจิวคฺโค (ก.)] ทุติโยฯ
ตสฺสุทฺทานํ –
อถ ปสฺส สสูจิ จ ตุณฺฑิลโก, มิค มยฺหกปญฺจมปกฺขิวโร;
อถ ปญฺชลิ วาริช เมชฺฌ ปุน, อถ วฏฺฏ กโปตวเรน ทสาติฯ
อถ วคฺคุทฺทานํ –
อถ วคฺคํ ปกิตฺติสฺสํ, ฉนิปาตํ วรุตฺตเม;
อวาริยา จ ขโร จ [เสนก (สี.), สูจิ จ (สฺยา. ก.)], ทฺเว จ วุตฺตา สุพฺยญฺชนาติฯ
ฉกฺกนิปาตํ นิฏฺฐิตํฯ
7. สตฺตกนิปาโต
1. กุกฺกุวคฺโค
396. กุกฺกุชาตกํ (7-1-1)
[1]