56. กญฺจนกฺขนฺธชาตกํ
[56]
โย ปหฏฺเฐน จิตฺเตน, ปหฏฺฐมนโส นโร;
ภาเวติ กุสลํ ธมฺมํ, โยคกฺเขมสฺส ปตฺติยา;
ปาปุเณ อนุปุพฺเพน, สพฺพสํโยชนกฺขยนฺติฯ
กญฺจนกฺขนฺธชาตกํ ฉฏฺฐํฯ
57. วานรินฺทชาตกํ
[57]
ยสฺเสเต จตุโร ธมฺมา, วานรินฺท ยถา ตว;
สจฺจํ ธมฺโม ธิติ [ธิตี (สี. ปี.)] จาโค, ทิฏฺฐํ โส อติวตฺตตีติฯ
วานรินฺทชาตกํ สตฺตมํฯ
58. ตโยธมฺมชาตกํ
[58]
ยสฺเสเต จ [ยสฺส เอเต (สี. ปี.)] ตโย ธมฺมา, วานรินฺท ยถา ตว;
ทกฺขิยํ สูริยํ ปญฺญา, ทิฏฺฐํ โส อติวตฺตตีติฯ
ตโยธมฺมชาตกํ อฏฺฐมํฯ
59. เภริวาทกชาตกํ
[59]
ธเม ธเม นาติธเม, อติธนฺตญฺหิ ปาปกํ;
ธนฺเตน หิ สตํ ลทฺธํ, อติธนฺเตน นาสิตนฺติฯ
เภริวาทกชาตกํ นวมํฯ
60. สงฺขธมชาตกํ
[60]
ธเม ธเม นาติธเม, อติธนฺตญฺหิ ปาปกํ;
ธนฺเตนาธิคตา โภคา, เต ตาโต วิธมี ธมนฺติฯ
สงฺขธมชาตกํ ทสมํฯ
อาสีสวคฺโค ฉฏฺโฐฯ
ตสฺสุทฺทานํ –
ยถา อิจฺฉิํ ตถาหุทกา ถลา, สุร สาทุผโล จ อลีนมโน;
สมฺปหฏฺฐมโน จตุโร จ ตโย, สตลทฺธก โภคธเนน ทสาติฯ
7. อิตฺถิวคฺโค
61. อสาตมนฺตชาตกํ
[61]
อสา โลกิตฺถิโย นาม, เวลา ตาสํ น วิชฺชติ;
สารตฺตา จ ปคพฺภา จ, สิขี สพฺพฆโส ยถา;
ตา หิตฺวา ปพฺพชิสฺสามิ, วิเวกมนุพฺรูหยนฺติฯ
อสาตมนฺตชาตกํ ปฐมํฯ
62. อณฺฑภูตชาตกํ
[62]
ยํ พฺราหฺมโณ อวาเทสิ, วีณํ สมุขเวฐิโต;
อณฺฑภูตา ภตา ภริยา, ตาสุ โก ชาตุ วิสฺสเสติฯ
อณฺฑภูตชาตกํ ทุติยํฯ
63. ตกฺกปณฺฑิตชาตกํ
[63]
โกธนา อกตญฺญู จ, ปิสุณา มิตฺตเภทิกา [ปิสุณา จ วิเภทิกา (สี. สฺยา. ปี.)];
พฺรหฺมจริยํ จร ภิกฺขุ, โส สุขํ น วิหาหสีติ [ปิหาหิสีติ (สี. สฺยา. ปี.), วิหายสิ (ก.)]ฯ
ตกฺกปณฺฑิตชาตกํ [ตกฺกชาตกํ (สี. สฺยา. ปี. อฏฺฐ.)] ตติยํฯ
64. ทุราชานชาตกํ
[64]
มา สุ นนฺทิ อิจฺฉติ มํ, มา สุ โสจิ น มิจฺฉติ [น อิจฺฉติ (สี. สฺยา. ปี.)];
ถีนํ ภาโว ทุราชาโน, มจฺฉสฺเสโวทเก คตนฺติฯ
ทุราชานชาตกํ จตุตฺถํฯ