อิทานิ โข มํ ภาเยติ, มหาเนรุนิทสฺสนํ;
หํสสฺส อนภิญฺญาย, มหา เม ภยมาคตํฯ
[109]
น ตสฺส วุฑฺฒิ กุสลปฺปสตฺถา, โย วฑฺฒมาโน ฆสเต ปติฏฺฐํ;
ตสฺสูปโรธํ ปริสงฺกมาโน, ปตารยี มูลวธาย ธีโรติฯ
ปลาสชาตกํ ทสมํฯ
วณฺณาโรหวคฺโค ทุติโย [อิมสฺสุทฺทานํ ตติยวคฺคปริโยสาเน ภวิสฺสติ]ฯ
3. อฑฺฒวคฺโค
371. ทีฆีติโกสลชาตกํ (5-3-1)
[110]
เอวํภูตสฺส เต ราช, อาคตสฺส วเส [วโส (ปี. ก.)] มม;
อตฺถิ นุ โกจิ ปริยาโย, โย ตํ ทุกฺขา ปโมจเยฯ
[111]
เอวํภูตสฺส เม ตาต, อาคตสฺส วเส ตว;
นตฺถิ โน โกจิ ปริยาโย, โย มํ ทุกฺขา ปโมจเยฯ
[112]
นาญฺญํ สุจริตํ ราช, นาญฺญํ ราช สุภาสิตํ;
ตายเต มรณกาเล, เอวเมวิตรํ ธนํฯ
[113]
อกฺโกจฺฉิ มํ อวธิ มํ, อชินิ มํ อหาสิ เม;
เย จ ตํ อุปนยฺหนฺติ, เวรํ เตสํ น สมฺมติฯ
[114]
อกฺโกจฺฉิ มํ อวธิ มํ, อชินิ มํ อหาสิ เม;
เย จ ตํ นุปนยฺหนฺติ, เวรํ เตสูปสมฺมติฯ
[115]
น หิ เวเรน เวรานิ, สมฺมนฺตีธ กุทาจนํ;
อเวเรน จ สมฺมนฺติ, เอส ธมฺโม สนนฺตโนติฯ
ทีฆีติโกสลชาตกํ ปฐมํฯ
372. มิคโปตกชาตกํ (5-3-2)
[116]
อคารา ปจฺจุเปตสฺส, อนคารสฺส เต สโต;
สมณสฺส น ตํ สาธุ, ยํ เปตมนุโสจสิฯ
[117]
สํวาเสน หเว สกฺก, มนุสฺสสฺส มิคสฺส วา;
หทเย ชายเต เปมํ, น ตํ สกฺกา อโสจิตุํฯ
[118]
มตํ มริสฺสํ โรทนฺติ, เย รุทนฺติ ลปนฺติ จ;
ตสฺมา ตฺวํ อิสิ มา โรทิ, โรทิตํ โมฆมาหุ สนฺโตฯ
[119]
โรทิเตน หเว พฺรหฺเม, มโต เปโต สมุฏฺฐเห;
สพฺเพ สงฺคมฺม โรทาม, อญฺญมญฺญสฺส ญาตเกฯ
[120]
อาทิตฺตํ วต มํ สนฺตํ, ฆตสิตฺตํว ปาวกํ;
วารินา วิย โอสิญฺจํ, สพฺพํ นิพฺพาปเย ทรํฯ
[121]
อพฺพหิ วต เม สลฺลํ, ยมาสิ หทยสฺสิตํ;
โย เม โสกปเรตสฺส, ปุตฺตโสกํ อปานุทิฯ
[122]
โสหํ อพฺพูฬฺหสลฺโลสฺมิ, วีตโสโก อนาวิโล;
น โสจามิ น โรทามิ, ตว สุตฺวาน วาสวาติฯ
มิคโปตกชาตกํ ทุติยํฯ
373. มูสิกชาตกํ (5-3-3)
[123]
กุหิํ คตา กตฺถ คตา, อิติ ลาลปฺปตี ชโน;
อหเมเวโก ชานามิ, อุทปาเน มูสิกา หตาฯ
[124]
ยญฺเจตํ [ยเถตํ (ปี.), ยเวตํ (ก.), ยเมตํ (กตฺถจิ)] อิติ จีติ จ, คทฺรโภว นิวตฺตสิ;
อุทปาเน มูสิกํ หนฺตฺวา, ยวํ ภกฺเขตุมิจฺฉสิฯ
[125]
ทหโร จาสิ ทุมฺเมธ, ปฐมุปฺปตฺติโก [ปฐมุปฺปตฺติโต (สี. ปี.)] สุสุ;
ทีฆญฺเจตํ [ทีฆเมตํ (ปี.)] สมาสชฺช [สมาปชฺช (สฺยา. ก.)], น เต ทสฺสามิ ชีวิตํฯ
[126]
นานฺตลิกฺขภวเนน, นางฺคปุตฺตปิเนน [นางฺคปุตฺตสิเรน (สี. สฺยา. ปี.)] วา;
ปุตฺเตน หิ ปตฺถยิโต, สิโลเกหิ ปโมจิโตฯ
[127]
สพฺพํ สุตมธีเยถ, หีนมุกฺกฏฺฐมชฺฌิมํ;
สพฺพสฺส อตฺถํ ชาเนยฺย, น จ สพฺพํ ปโยชเย;
โหติ ตาทิสโก กาโล, ยตฺถ อตฺถาวหํ สุตนฺติฯ
มูสิกชาตกํ ตติยํฯ
374. จูฬธนุคฺคหชาตกํ (5-3-4)
[128]
สพฺพํ ภณฺฑํ สมาทาย, ปารํ ติณฺโณสิ พฺราหฺมณ;
ปจฺจาคจฺฉ ลหุํ ขิปฺปํ, มมฺปิ ตาเรหิ ทานิโต [ทานิโภ (สฺยา.)]ฯ
[129]
อสนฺถุตํ มํ จิรสนฺถุเตน, นิมีนิ โภตี อทฺธุวํ ธุเวน;
มยาปิ โภตี นิมิเนยฺย อญฺญํ, อิโต อหํ ทูรตรํ คมิสฺสํฯ
[130]
กายํ เอฬคลาคุมฺเพ [เอฬคณคุมฺเพ (ก.)], กโรติ อหุหาสิยํ;
นยีธ นจฺจคีตํ วา [นยิธ นจฺจํ วา คีตํ วา (สี. สฺยา. ปี.)], ตาฬํ วา สุสมาหิตํ;
อนมฺหิกาเล [อนมฺหกาเล (ปี.)] สุโสณิ [สุสฺโสณิ (สี. สฺยา. ปี.)], กิํ นุ ชคฺฆสิ โสภเน [โสภเณ (ปี. ก.)]ฯ
[131]
สิงฺคาล พาล ทุมฺเมธ, อปฺปปญฺโญสิ ชมฺพุก;
ชีโน มจฺฉญฺจ เปสิญฺจ, กปโณ วิย ฌายสิฯ
[132]
สุทสฺสํ วชฺชมญฺเญสํ, อตฺตโน ปน ทุทฺทสํ;
ชีนา ปติญฺจ ชารญฺจ, มญฺเญ ตฺวญฺเญว [มมฺปิ ตฺวญฺเญว (สี. สฺยา.), ตฺวมฺปิ มญฺเญว (ปี.)] ฌายสิฯ
[133]
เอวเมตํ มิคราช, ยถา ภาสสิ ชมฺพุก;
สา นูนาหํ อิโต คนฺตฺวา, ภตฺตุ เหสฺสํ วสานุคาฯ
[134]
โย หเร มตฺติกํ ถาลํ, กํสถาลมฺปิ โส หเร;
กตญฺเจว [กตํเยว (สี. สฺยา. ปี.)] ตยา ปาปํ, ปุนเปวํ กริสฺสสีติฯ
จูฬธนุคฺคหชาตกํ จตุตฺถํฯ
375. กโปตชาตกํ (5-3-5)
[135]
อิทานิ โขมฺหิ สุขิโต อโรโค, นิกฺกณฺฏโก นิปฺปติโต กโปโต;
กาหามิ ทานี หทยสฺส ตุฏฺฐิํ, ตถาหิมํ มํสสากํ พเลติฯ
[136]
กายํ พลากา สิขิโน, โจรี ลงฺฆิปิตามหา;
โอรํ พลาเก อาคจฺฉ, จณฺโฑ เม วายโส สขาฯ
[137]
อลญฺหิ เต ชคฺฆิตาเย, มมํ ทิสฺวาน เอทิสํ;
วิลูนํ สูทปุตฺเตน, ปิฏฺฐมณฺเฑน [ปิฏฺฐมทฺเทน (สี. สฺยา. ปี.)] มกฺขิตํฯ
[138]
สุนฺหาโต สุวิลิตฺโตสิ, อนฺนปาเนน ตปฺปิโต;
กณฺเฐ จ เต เวฬุริโย, อคมา นุ กชงฺคลํฯ
[139]
มา เต มิตฺโต อมิตฺโต วา, อคมาสิ กชงฺคลํ;
ปิญฺฉานิ ตตฺถ ลายิตฺวา, กณฺเฐ พนฺธนฺติ วฏฺฏนํฯ
[140]
ปุนปาปชฺชสี สมฺม, สีลญฺหิ ตว ตาทิสํ;
น หิ มานุสกา โภคา, สุภุญฺชา โหนฺติ ปกฺขินาติฯ
กโปตชาตกํ ปญฺจมํฯ
อฑฺฒวคฺโค ตติโยฯ
ตสฺสุทฺทานํ –
อถ วณฺณ สสีล หิริ ลภเต, สุมุขา วิส สาฬิยมิตฺตวโร;
อถ จกฺก ปลาส สราช สโต, ยว พาล กโปตก ปนฺนรสาติฯ
อถ วคฺคุทฺทานํ –
ชีนญฺจ วณฺณํ อสมํวคุปฺปริ, สุเทสิตา ชาตกนฺติ สนฺติ วีสติ [ชาตก ปญฺจวีสติ (?)];
มเหสิโน พฺรหฺมจริตฺตมุตฺต-มโวจ คาถา อตฺถวตี สุพฺยญฺชนาติฯ
ปญฺจกนิปาตํ นิฏฺฐิตํฯ
6. ฉกฺกนิปาโต
1. อวาริยวคฺโค
376. อวาริยชาตกํ (6-1-1)
[1]
