อติเวลปภาสติ ชีตวโร, วนมชฺฌ รเถสภ ชิมฺหคโม;
อถ ชมฺพุ ติณาสนปีฐวรํ, อถ ตณฺฑุล โมร วิสยฺห ทสาติฯ
5. จูฬกุณาลวคฺโค
341. กณฺฑรีชาตกํ (4-5-1)
[161]
นรานมารามกราสุ นาริสุ, อเนกจิตฺตาสุ อนิคฺคหาสุ จ;
สพฺพตฺถ นาปีติกราปิ [สพฺพ’ตฺตนา’ปีติกราปิ (สี. สฺยา.)] เจ สิยา [สิยุํ (สฺยา.)], น วิสฺสเส ติตฺถสมา หิ นาริโยฯ
[162]
ยํ เว [ยญฺจ (สฺยา. ก.)] ทิสฺวา กณฺฑรีกินฺนรานํ [กินฺนรกินฺนรีนํ (สฺยา.), กินฺนรีกินฺนรานํ (ก.)], สพฺพิตฺถิโย น รมนฺติ อคาเร;
ตํ ตาทิสํ มจฺจํ จชิตฺวา ภริยา, อญฺญํ ทิสฺวา ปุริสํ ปีฐสปฺปิํฯ
[163]
พกสฺส จ พาวริกสฺส [ปาวาริกสฺส (สี.)] รญฺโญ, อจฺจนฺตกามานุคตสฺส ภริยา;
อวาจรี [อจฺจาจริ (สฺยา.), อนาจริ (ก.)] ปฏฺฐวสานุคสฺส [พทฺธวสานุคสฺส (สี. สฺยา.), ปตฺตวสานุคตสฺส (ก.)], กํ วาปิ อิตฺถี นาติจเร ตทญฺญํฯ
[164]
ปิงฺคิยานี สพฺพโลกิสฺสรสฺส, รญฺโญ ปิยา พฺรหฺมทตฺตสฺส ภริยา;
อวาจรี ปฏฺฐวสานุคสฺส, ตํ วาปิ สา นาชฺฌคา กามกามินีติฯ
กณฺฑรีชาตกํ [กินฺนรีชาตกํ (ก. สี. ก.), กุณฺฑลิกชาตกํ (สฺยา.)] ปฐมํฯ
342. วานรชาตกํ (4-5-2)
[165]
อสกฺขิํ วต อตฺตานํ, อุทฺธาตุํ อุทกา ถลํ;
น ทานาหํ ปุน ตุยฺหํ, วสํ คจฺฉามิ วาริชฯ
[166]
อลเมเตหิ อมฺเพหิ, ชมฺพูหิ ปนเสหิ จ;
ยานิ ปารํ สมุทฺทสฺส, วรํ มยฺหํ อุทุมฺพโรฯ
[167]
โย จ อุปฺปติตํ อตฺถํ, น ขิปฺปมนุพุชฺฌติ;
อมิตฺตวสมนฺเวติ , ปจฺฉา จ อนุตปฺปติฯ
[168]
โย จ อุปฺปติตํ อตฺถํ, ขิปฺปเมว นิโพธติ;
มุจฺจเต สตฺตุสมฺพาธา, น จ ปจฺฉานุตปฺปตีติฯ
วานรชาตกํ ทุติยํฯ
343. กุนฺตินีชาตกํ (4-5-3)
[169]
อวสิมฺห ตวาคาเร, นิจฺจํ สกฺกตปูชิตา;
ตฺวเมว ทานิมกริ, หนฺท ราช วชามหํฯ
[170]
โย เว กเต ปฏิกเต, กิพฺพิเส ปฏิกิพฺพิเส;
เอวํ ตํ สมฺมตี เวรํ, วส กุนฺตินิ มาคมาฯ
[171]
น กตสฺส จ กตฺตา จ, เมตฺติ [เมตฺตี (ปี.), มิตฺตี (ก.)] สนฺธียเต ปุน;
หทยํ นานุชานาติ, คจฺฉญฺเญว รเถสภฯ
[172]
กตสฺส เจว กตฺตา จ, เมตฺติ สนฺธียเต ปุน;
ธีรานํ โน จ พาลานํ, วส กุนฺตินิ มาคมาติฯ
กุนฺตินีชาตกํ ตติยํฯ
344. อมฺพชาตกํ (4-5-4)
[173]
โย นีลิยํ มณฺฑยติ, สณฺฑาเสน วิหญฺญติ;
ตสฺส สา วสมนฺเวตุ, ยา เต อมฺเพ อวาหริฯ
[174]
วีสํ วา ปญฺจวีสํ [ปณฺณุวีสํ (ก. สี. ปี.)] วา, อูนติํสํ ว ชาติยา;
ตาทิสา ปติ มา ลทฺธา [ปติํ มา ลทฺธา (ปี.), ปติ มา’ลตฺถ (?)], ยา เต อมฺเพ อวาหริฯ
[175]
ทีฆํ คจฺฉตุ อทฺธานํ, เอกิกา อภิสาริกา;
สงฺเกเต ปติ มา อทฺท [มา อทฺทส (สี. ปี.)], ยา เต อมฺเพ อวาหริฯ
[176]
อลงฺกตา สุวสนา, มาลินี จนฺทนุสฺสทา;
เอกิกา สยเน เสตุ, ยา เต อมฺเพ อวาหรีติฯ
อมฺพชาตกํ [อมฺพโจรชาตกํ (ก. สี. ปี.)] จตุตฺถํฯ
345. คชกุมฺภชาตกํ (4-5-5)
[177]
วนํ ยทคฺคิ ทหติ, ปาวโก กณฺหวตฺตนี;
กถํ กโรสิ ปจลก, เอวํ ทนฺธปรกฺกโมฯ
[178]
พหูนิ รุกฺขฉิทฺทานิ, ปถพฺยา วิวรานิ จ;
ตานิ เจ นาภิสมฺโภม, โหติ โน กาลปริยาโยฯ
[179]
โย ทนฺธกาเล ตรติ, ตรณีเย จ ทนฺธติ;
สุกฺขปณฺณํว อกฺกมฺม, อตฺถํ ภญฺชติ อตฺตโนฯ
[180]
โย ทนฺธกาเล ทนฺเธติ, ตรณีเย จ ตารยิ;
สสีว รตฺติํ วิภชํ, ตสฺสตฺโถ ปริปูรตีติฯ
คชกุมฺภชาตกํ ปญฺจมํฯ
346. เกสวชาตกํ (4-5-6)
[181]
มนุสฺสินฺทํ ชหิตฺวาน, สพฺพกามสมิทฺธินํ;
กถํ นุ ภควา เกสี, กปฺปสฺส รมติ อสฺสเม [รมตสฺสเม (ก.)]ฯ
[182]
สาทูนี [สาธูนิ (ก. สี. สฺยา. ก.)] รมณียานิ, สนฺติ วกฺขา มโนรมา;
สุภาสิตานิ กปฺปสฺส, นารท รมยนฺติ มํฯ
[183]
สาลีนํ โอทนํ ภุญฺเช, สุจิํ มํสูปเสจนํ;
กถํ สามากนีวารํ, อโลณํ ฉาทยนฺติ ตํฯ
[184]
สาทุํ วา [อสาทุํ (ปี.)] ยทิ วาสาทุํ, อปฺปํ วา ยทิ วา พหุํ;
วิสฺสตฺโถ ยตฺถ ภุญฺเชยฺย, วิสฺสาสปรมา รสาติฯ
เกสวชาตกํ [เกสีชาตกํ (ก.)] ฉฏฺฐํฯ
347. อยกูฏชาตกํ (4-5-7)
[185]
สพฺพายสํ กูฏมติปฺปมาณํ, ปคฺคยฺห โย [โส (ปี.)] ติฏฺฐสิ อนฺตลิกฺเข;
รกฺขาย เม [มํ (สี.)] ตฺวํ วิหิโต นุสชฺช, อุทาหุ เม เจตยเส [วายมเส (สี. สฺยา.)] วธายฯ
[186]
ทูโต อหํ ราชิธ รกฺขสานํ, วธาย ตุยฺหํ ปหิโตหมสฺมิ;
อินฺโท จ ตํ รกฺขติ เทวราชา, เตนุตฺตมงฺคํ น เต [น หิ (ก. สี. ปี.), เต น (ก.)] ผาลยามิฯ
[187]
สเจ จ มํ รกฺขติ เทวราชา, เทวานมินฺโท มฆวา สุชมฺปติ;
กามํ ปิสาจา วินทนฺตุ สพฺเพ, น สนฺตเส รกฺขสิยา ปชายฯ
[188]
กามํ กนฺทนฺตุ [กนฺตนฺตุ (ก.), กณฺฑนฺตุ (สฺยา.)] กุมฺภณฺฑา, สพฺเพ ปํสุปิสาจกา;
นาลํ ปิสาจา ยุทฺธาย, มหตี สา วิภิํสิกาติ [วิเภสิกาติ (สฺยา.), วิเหสิกาติ (ปี.)]ฯ
อยกูฏชาตกํ สตฺตมํฯ
348. อรญฺญชาตกํ (4-5-8)
[189]
อรญฺญา คามมาคมฺม, กิํสีลํ กิํวตํ อหํ;
ปุริสํ ตาต เสเวยฺยํ, ตํ เม อกฺขาหิ ปุจฺฉิโตฯ
[190]
โย ตํ วิสฺสาสเย ตาต, วิสฺสาสญฺจ ขเมยฺย เต;
สุสฺสูสี จ ติติกฺขี จ, ตํ ภเชหิ อิโต [ตํ ภเชยฺยาสิโต (ก.)] คโตฯ
[191]
ยสฺส กาเยน วาจาย, มนสา นตฺถิ ทุกฺกฏํ;
อุรสีว ปติฏฺฐาย, ตํ ภเชหิ อิโต คโตฯ
[192]
หลิทฺทิราคํ กปิจิตฺตํ, ปุริสํ ราควิราคินํ;
ตาทิสํ ตาต มา เสวิ, นิมฺมนุสฺสมฺปิ เจ สิยาติฯ
อรญฺญชาตกํ อฏฺฐมํฯ
349. สนฺธิเภทชาตกํ (4-5-9)
[193]
เนว อิตฺถีสุ สามญฺญํ, นาปิ ภกฺเขสุ สารถิ;
อถสฺส สนฺธิเภทสฺส, ปสฺส ยาว สุจินฺติตํฯ
[194]
อสิ ติกฺโขว มํสมฺหิ, เปสุญฺญํ ปริวตฺตติ;
ยตฺถูสภญฺจ สีหญฺจ, ภกฺขยนฺติ มิคาธมาฯ
[195]
อิมํ โส สยนํ เสติ, ยมิมํ [ยยิมํ (สี. ปี.), ยิมํ (ก.)] ปสฺสสิ สารถิ;
โย วาจํ สนฺธิเภทสฺส, ปิสุณสฺส นิโพธติฯ
[196]
เต ชนา สุขเมธนฺติ, นรา สคฺคคตาริว;
เย วาจํ สนฺธิเภทสฺส, นาวโพธนฺติ สารถีติฯ
สนฺธิเภทชาตกํ นวมํฯ
350. เทวตาปญฺหชาตกํ (4-5-10)
[197]
หนฺติ หตฺเถหิ ปาเทหิ, มุขญฺจ ปริสุมฺภติ;
ส เว ราช ปิโย โหติ, กํ เตน ตฺวาภิปสฺสสิ [มภิปสฺสสิ (สี.)]ฯ
[198]
อกฺโกสติ ยถากามํ, อาคมญฺจสฺส อิจฺฉติ;
ส เว ราช ปิโย โหติ, กํ เตน ตฺวาภิปสฺสสิฯ
[199]
อพฺภกฺขาติ อภูเตน, อลิเกนาภิสารเย;
ส เว ราช ปิโย โหติ, กํ เตน ตฺวาภิปสฺสสิฯ
[200]
หรํ อนฺนญฺจ ปานญฺจ, วตฺถเสนาสนานิ จ;
อญฺญทตฺถุหรา สนฺตา, เต เว ราช ปิยา โหนฺติ;
กํ เตน ตฺวาภิปสฺสสีติฯ
เทวตาปญฺหชาตกํ ทสมํฯ
จูฬกุณาลวคฺโค ปญฺจโมฯ
ตสฺสุทฺทานํ –
นรานํ อสกฺขิวสิมฺหวโร, นีลิยมคฺคิวรญฺจ ปุน;
ปุน รสายสกูฏวโร, ตถารญฺญ สารถิ หนฺติ ทสาติฯ
อถ วคฺคุทฺทานํ –
กาลิงฺคํ [วิวรํ (พหูสุ)] ปุจิมนฺทญฺจ, กุฏิทูสก โกกิลา [กุฏิทูสํ พหุภาณกํ (พหูสุ)];
จูฬกุณาลวคฺโค โส, ปญฺจโม สุปฺปกาสิโตติฯ
จตุกฺกนิปาตํ นิฏฺฐิตํฯ
5. ปญฺจกนิปาโต
1. มณิกุณฺฑลวคฺโค
351. มณิกุณฺฑลชาตกํ (5-1-1)
[1]