เมนู

42. กโปตชาตกํ

[42]

โย อตฺถกามสฺส หิตานุกมฺปิโน, โอวชฺชมาโน น กโรติ สาสนํ;

กโปตกสฺส วจนํ อกตฺวา, อมิตฺตหตฺถตฺถคโตว เสตีติฯ

กโปตชาตกํ ทุติยํฯ

43. เวฬุกชาตกํ

[43]

โย อตฺถกามสฺส หิตานุกมฺปิโน, โอวชฺชมาโน น กโรติ สาสนํ;

เอวํ โส นิหโต เสติ, เวฬุกสฺส ยถา ปิตาติฯ

เวฬุกชาตกํ ตติยํฯ

44. มกสชาตกํ

[44]

เสยฺโย อมิตฺโต มติยา อุเปโต, น ตฺเวว มิตฺโต มติวิปฺปหีโน;

มกสํ วธิสฺสนฺติ หิ เอฬมูโค, ปุตฺโต ปิตุ อพฺภิทา อุตฺตมงฺคนฺติฯ

มกสชาตกํ จตุตฺถํฯ

45. โรหิณิชาตกํ

[45]

เสยฺโย อมิตฺโต เมธาวี, ยญฺเจ พาลานุกมฺปโก;

ปสฺส โรหิณิกํ ชมฺมิํ, มาตรํ หนฺตฺวาน โสจตีติฯ

โรหิณิชาตกํ ปญฺจมํฯ

46. อารามทูสกชาตกํ

[46]

น เว อนตฺถกุสเลน, อตฺถจริยา สุขาวหา;

หาเปติ อตฺถํ ทุมฺเมโธ, กปิ อารามิโก ยถาติฯ

อารามทูสกชาตกํ ฉฏฺฐํฯ

47. วารุณิทูสกชาตกํ

[47]

เว อนตฺถกุสเลน, อตฺถจริยา สุขาวหา;

หาเปติ อตฺถํ ทุมฺเมโธ, โกณฺฑญฺโญ วารุณิํ ยถาติฯ

วารุณิทูสกชาตกํ สตฺตมํฯ

48. เวทพฺพชาตกํ

[48]

อนุปาเยน โย อตฺถํ, อิจฺฉติ โส วิหญฺญติ;

เจตา หนิํสุ เวทพฺพํ [เวทพฺภํ (สี. ปี.)], สพฺเพ เต พฺยสนมชฺฌคูติฯ

เวทพฺพ [เวทพฺภ (สี. ปี.)] ชาตกํ อฏฺฐมํฯ

49. นกฺขตฺตชาตกํ

[49]

นกฺขตฺตํ ปฏิมาเนนฺตํ, อตฺโถ พาลํ อุปจฺจคา;

อตฺโถ อตฺถสฺส นกฺขตฺตํ, กิํ กริสฺสนฺติ ตารกาติฯ

นกฺขตฺตชาตกํ นวมํฯ

50. ทุมฺเมธชาตกํ

[50]

ทุมฺเมธานํ สหสฺเสน, ยญฺโญ เม อุปยาจิโต;

อิทานิ โขหํ ยชิสฺสามิ, พหุ [พหู (สี. ปี.), พหุํ (ก.)] อธมฺมิโก ชโนติฯ

ทุมฺเมธชาตกํ ทสมํฯ

อตฺถกามวคฺโค ปญฺจโมฯ

ตสฺสุทฺทานํ –

อถ มิตฺตก มาตุ กโปตวโร, ตถา เวฬูก เอฬมูโค โรหิณี;

กปิ วารุณิ เจตจรา จ ปุน, ตถา ตารก ยญฺญวเรน ทสาติฯ

ปฐโม ปณฺณาสโกฯ

6. อาสีสวคฺโค