ฯ นโม ตสฺส ภควโต อรหโต สมฺมาสมฺพุทฺธสฺสฯ
ขุทฺทกนิกาเย
ชาตกปาฬิ
(ปฐโม ภาโค)
1. เอกกนิปาโต
1. อปณฺณกวคฺโค
1. อปณฺณกชาตกํ
[1]
อปณฺณกํ ฐานเมเก, ทุติยํ อาหุ ตกฺกิกา;
เอตทญฺญาย เมธาวี, ตํ คณฺเห ยทปณฺณกนฺติ [ตํ คณฺเหยฺย อปณฺณกํ (ก.)]ฯ
อปณฺณกชาตกํ ปฐมํฯ
2. วณฺณุปถชาตกํ
[2]
อกิลาสุโน วณฺณุปเถ [วณฺณปเถ (ก.)] ขณนฺตา, อุทงฺคเณ ตตฺถ ปปํ อวินฺทุํ;
เอวํ มุนี วีริย [มุนิ วิริย (ปี.), มุนิ วีริย (สฺยา. ก.)] พลูปปนฺโน, อกิลาสุ วินฺเท หทยสฺส สนฺตินฺติฯ
วณฺณุปถชาตกํ ทุติยํฯ
3. เสริววาณิชชาตกํ
[3]
อิธ เจ นํ [อิธ เจ หิ นํ (สี. ปี.)] วิราเธสิ, สทฺธมฺมสฺส นิยามตํ [นิยามกํ (สฺยา. ก.)];
จิรํ ตฺวํ อนุตปฺเปสิ [อนุตเปสฺสสิ (สี. ปี.), อนุตปฺปิสฺสสิ (?)], เสริวายํว วาณิโชติฯ
เสริววาณิชชาตกํ ตติยํฯ
4. จูฬเสฏฺฐิชาตกํ
[4]
อปฺปเกนปิ เมธาวี, ปาภเตน วิจกฺขโณ;
สมุฏฺฐาเปติ อตฺตานํ, อณุํ อคฺคิํว สนฺธมนฺติฯ
จูฬ [จุลฺล (สี.), จุลฺลก (สฺยา. ปี.)] เสฏฺฐิชาตกํ จตุตฺถํฯ
5. ตณฺฑุลนาฬิชาตกํ
[5]
[กิมคฺฆตี ตณฺฑุลนาฬิกา จ, พาราณสี อนฺตรพาหิรานิ; อสฺสปญฺจสเต ตานิ, เอกา ตณฺฑุลนาฬิกาติ; (สฺยา.)] กิมคฺฆติ ตณฺฑุลนาฬิกาย, อสฺสาน มูลาย วเทหิ ราช [นาฬิกา จ (สี.), นาฬิกาย (ก. สี. อฏฺฐ.)];
พาราณสิํ สนฺตรพาหิรโต [พาหิรนฺตํ (สี.)], อยมคฺฆติ ตณฺฑุลนาฬิกาติ [กิมคฺฆตี วณฺฑุลนาฬิกา จ, พาราณสี อนฺตรพาหิรานิ; อสฺสปญฺจสเต ตานิ, เอกา ตณฺฑุลนาฬิกาติ; (สฺยา.)]ฯ
ตณฺฑุลนาฬิชาตกํ ปญฺจมํฯ
6. เทวธมฺมชาตกํ
[6]
หิริโอตฺตปฺปสมฺปนฺนา , สุกฺกธมฺมสมาหิตา;
สนฺโต สปฺปุริสา โลเก, เทวธมฺมาติ วุจฺจเรติฯ
เทวธมฺมชาตกํ ฉฏฺฐํฯ
7. กฏฺฐหาริชาตกํ
[7]
ปุตฺโต ตฺยาหํ มหาราช, ตฺวํ มํ โปส ชนาธิป;
อญฺเญปิ เทโว โปเสติ, กิญฺจ [กิญฺจิ (ก.)] เทโว สกํ ปชนฺติฯ
กฏฺฐหาริ [กฏฺฐวาหน (ก.)] ชาตกํ สตฺตมํฯ