วีสติวสฺสสหสฺสานิ , อายุ ตสฺส มเหสิโน;

ตาวตา ติฏฺฐมาโน โส, ตาเรสิ ชนตํ พหุํฯ

[43]

ธมฺมตฬากํ มาปยิตฺวา, สีลํ ทตฺวา วิเลปนํ;

ธมฺมทุสฺสํ นิวาเสตฺวา, ธมฺมมาลํ วิภชฺชิยฯ

[44]

ธมฺมวิมลมาทาสํ, ฐปยิตฺวา มหาชเน;

เกจิ นิพฺพานํ ปตฺเถนฺตา, ปสฺสนฺตุ เม อลงฺกรํฯ

[45]

สีลกญฺจุกํ ทตฺวาน, ฌานกวจวมฺมิตํ;

ธมฺมจมฺมํ ปารุปิตฺวา, ทตฺวา สนฺนาหมุตฺตมํฯ

[46]

สติผลกํ ทตฺวาน, ติขิณญาณกุนฺติมํ;

ธมฺมขคฺควรํ ทตฺวา, สีลสํสคฺคมทฺทนํฯ

[47]

เตวิชฺชาภูสนํ ทตฺวาน, อาเวฬํ จตุโร ผเล;

ฉฬภิญฺญาภรณํ ทตฺวา, ธมฺมปุปฺผปิฬนฺธนํฯ

[48]

สทฺธมฺมปณฺฑรจฺฉตฺตํ, ทตฺวา ปาปนิวารณํ;

มาปยิตฺวาภยํ ปุปฺผํ, นิพฺพุโต โส สสาวโกฯ

[49]

เอโส หิ สมฺมาสมฺพุทฺโธ, อปฺปเมยฺโย ทุราสโท;

เอโส หิ ธมฺมรตโน, สฺวากฺขาโต เอหิปสฺสิโกฯ

[50]

เอโส หิ สงฺฆรตโน, สุปฺปฏิปนฺโน อนุตฺตโร;

สพฺพํ ตมนฺตรหิตํ, นนุ ริตฺตา สพฺพสงฺขาราฯ

[51]

มหากสฺสโป ชิโน สตฺถา, เสตพฺยารามมฺหิ นิพฺพุโต;

ตตฺเถวสฺส ชินถูโป, โยชนุพฺเพธมุคฺคโตติฯ

กสฺสปสฺส ภควโต วํโส จตุวีสติโมฯ

27. โคตมพุทฺธวํโส

[1]

อหเมตรหิ สมฺพุทฺโธ [พุทฺโธ (สี.)], โคตโม สกฺยวฑฺฒโน;

ปธานํ ปทหิตฺวาน, ปตฺโต สมฺโพธิมุตฺตมํฯ

[2]

พฺรหฺมุนา ยาจิโต สนฺโต, ธมฺมจกฺกํ ปวตฺตยิํ;

อฏฺฐารสนฺนํ โกฏีนํ, ปฐมาภิสมโย อหุฯ

[3]

ตโต ปรญฺจ เทเสนฺเต, นรเทวสมาคเม;

คณนาย น วตฺตพฺโพ, ทุติยาภิสมโย อหุฯ

[4]

อิเธวาหํ เอตรหิ, โอวทิํ มม อตฺรชํ;

คณนาย น วตฺตพฺโพ, ตติยาภิสมโย อหุฯ

[5]

เอโกสิ สนฺนิปาโต เม, สาวกานํ มเหสินํ;

อฑฺฒเตฬสสตานํ, ภิกฺขูนาสิ สมาคโมฯ

[6]

วิโรจมาโน วิมโล, ภิกฺขุสงฺฆสฺส มชฺฌโค;

ททามิ ปตฺถิตํ สพฺพํ, มณีว สพฺพกามโทฯ

[7]

ผลมากงฺขมานานํ , ภวจฺฉนฺทชเหสินํ;

จตุสจฺจํ ปกาเสมิ, อนุกมฺปาย ปาณินํฯ

[8]

ทสวีสสหสฺสานํ, ธมฺมาภิสมโย อหุ;

เอกทฺวินฺนํ อภิสมโย, คณนาโต อสงฺขิโยฯ

[9]

วิตฺถาริกํ พาหุชญฺญํ, อิทฺธํ ผีตํ สุผุลฺลิตํ;

อิธ มยฺหํ สกฺยมุนิโน, สาสนํ สุวิโสธิตํฯ

[10]

อนาสวา วีตราคา, สนฺตจิตฺตา สมาหิตา;

ภิกฺขูเนกสตา สพฺเพ, ปริวาเรนฺติ มํ สทาฯ

[11]

อิทานิ เย เอตรหิ, ชหนฺติ มานุสํ ภวํ;

อปฺปตฺตมานสา เสขา, เต ภิกฺขู วิญฺญุครหิตาฯ

[12]

อริยญฺจ สํโถมยนฺตา, สทา ธมฺมรตา ชนา;

พุชฺฌิสฺสนฺติ สติมนฺโต, สํสารสริตํ คตาฯ

[13]

นครํ กปิลวตฺถุ เม, ราชา สุทฺโธทโน ปิตา;

มยฺหํ ชเนตฺติกา มาตา, มายาเทวีติ วุจฺจติฯ

[14]

เอกูนติํสวสฺสานิ , อคารํ อชฺฌหํ วสิํ;

รมฺโม สุรมฺโม สุภโก, ตโย ปาสาทมุตฺตมาฯ

[15]

จตฺตารีสสหสฺสานิ, นาริโย สมลงฺกตา;

ภทฺทกญฺจนา นาม นารี, ราหุโล นาม อตฺรโชฯ

[16]

นิมิตฺเต จตุโร ทิสฺวา, อสฺสยาเนน นิกฺขมิํ;

ฉพฺพสฺสํ ปธานจารํ, อจริํ ทุกฺกรํ อหํฯ

[17]

พาราณสิยํ อิสิปตเน, จกฺกํ ปวตฺติตํ มยา;

อหํ โคตมสมฺพุทฺโธ, สรณํ สพฺพปาณินํฯ

[18]

โกลิโต อุปติสฺโส จ, ทฺเว ภิกฺขู อคฺคสาวกา;

อานนฺโท นามุปฏฺฐาโก, สนฺติกาวจโร มม;

เขมา อุปฺปลวณฺณา จ, ภิกฺขุนี อคฺคสาวิกาฯ

[19]

จิตฺโต หตฺถาฬวโก จ, อคฺคุปฏฺฐากุปาสกา;

นนฺทมาตา จ อุตฺตรา, อคฺคุปฏฺฐิกุปาสิกาฯ

[20]

อหํ อสฺสตฺถมูลมฺหิ, ปตฺโต สมฺโพธิมุตฺตมํ;

พฺยามปฺปภา สทา มยฺหํ, โสฬสหตฺถมุคฺคตาฯ

[21]

อปฺปํ วสฺสสตํ อายุ, อิทาเนตรหิ วิชฺชติ;

ตาวตา ติฏฺฐมาโนหํ, ตาเรมิ ชนตํ พหุํฯ

[22]

ฐปยิตฺวาน ธมฺมุกฺกํ, ปจฺฉิมํ ชนโพธนํ;

อหมฺปิ นจิรสฺเสว, สทฺธิํ สาวกสงฺฆโต;

อิเธว ปรินิพฺพิสฺสํ, อคฺคี วาหารสงฺขยาฯ

[23]

ตานิ จ อตุลเตชานิ, อิมานิ จ ทสพลานิ [ยสพลานิ (อฏฺฐ.)];

อยญฺจ คุณธารโณ เทโห, ทฺวตฺติํสวรลกฺขณวิจิตฺโตฯ

[24]

ทส ทิสา ปภาเสตฺวา, สตรํสีว ฉปฺปภา;

สพฺพํ ตมนฺตรหิสฺสนฺติ, นนุ ริตฺตา สพฺพสงฺขาราติฯ

โคตมสฺส ภควโต วํโส ปญฺจวีสติโมฯ

28. พุทฺธปกิณฺณกกณฺฑํ

[1]

อปริเมยฺยิโต กปฺเป, จตุโร อาสุํ วินายกา;

ตณฺหงฺกโร เมธงฺกโร, อโถปิ สรณงฺกโร;

ทีปงฺกโร จ สมฺพุทฺโธ, เอกกปฺปมฺหิ เต ชินาฯ

[2]