โสปิ พุทฺโธ อมิตยโส, ทฺวตฺติํสวรลกฺขโณ;
อสีติหตฺถมุพฺเพโธ, สาลราชาว ทิสฺสติฯ
[24]
อคฺคิจนฺทสูริยานํ, นตฺถิ ตาทิสิกา ปภา;
ยถา อหุ ปภา ตสฺส, อสมสฺส มเหสิโนฯ
[25]
ตสฺสาปิ เทวเทวสฺส, อายุ ตาวตกํ อหุ;
นวุติวสฺสสหสฺสานิ, โลเก อฏฺฐาสิ จกฺขุมาฯ
[26]
โสปิ พุทฺโธ อสมสโม, ยุคานิปิ ตานิ อตุลิยานิ;
สพฺพํ ตมนฺตรหิตํ, นนุ ริตฺตา สพฺพสงฺขาราฯ
[27]
ปิยทสฺสี มุนิวโร, อสฺสตฺถารามมฺหิ นิพฺพุโต;
ตตฺเถวสฺส ชินถูโป, ตีณิโยชนมุคฺคโตติฯ
ปิยทสฺสิสฺส ภควโต วํโส เตรสโมฯ
16. อตฺถทสฺสีพุทฺธวํโส
[1]
ตตฺเถว มณฺฑกปฺปมฺหิ, อตฺถทสฺสี มหายโส;
มหาตมํ นิหนฺตฺวาน, ปตฺโต สมฺโพธิมุตฺตมํฯ
[2]
พฺรหฺมุนา ยาจิโต สนฺโต, ธมฺมจกฺกํ ปวตฺตยิ;
อมเตน ตปฺปยี โลกํ, ทสสหสฺสิสเทวกํฯ
[3]
ตสฺสาปิ โลกนาถสฺส, อเหสุํ อภิสมยา ตโย;
โกฏิสตสหสฺสานํ, ปฐมาภิสมโย อหุฯ
[4]
ยทา พุทฺโธ อตฺถทสฺสี, จรเต เทวจาริกํ;
โกฏิสตสหสฺสานํ, ทุติยาภิสมโย อหุฯ
[5]
ปุนาปรํ ยทา พุทฺโธ, เทเสสิ ปิตุสนฺติเก;
โกฏิสตสหสฺสานํ, ตติยาภิสมโย อหุฯ
[6]
สนฺนิปาตา ตโย อาสุํ, ตสฺสาปิ จ มเหสิโน;
ขีณาสวานํ วิมลานํ, สนฺตจิตฺตาน ตาทินํฯ
[7]
อฏฺฐนวุติสหสฺสานํ , ปฐโม อาสิ สมาคโม;
อฏฺฐาสีติสหสฺสานํ, ทุติโย อาสิ สมาคโมฯ
[8]
อฏฺฐสตฺตติสตสหสฺสานํ , ตติโย อาสิ สมาคโม;
อนุปาทา วิมุตฺตานํ, วิมลานํ มเหสินํฯ
[9]
อหํ เตน สมเยน, ชฏิโล อุคฺคตาปโน;
สุสีโม นาม นาเมน, มหิยา เสฏฺฐสมฺมโตฯ
[10]
ทิพฺพํ มนฺทารวํ ปุปฺผํ, ปทุมํ ปาริฉตฺตกํ;
เทวโลกาหริตฺวาน, สมฺพุทฺธมภิปูชยิํฯ
[11]
โสปิ มํ พุทฺโธ พฺยากาสิ, อตฺถทสฺสี มหามุนิ;
‘‘อฏฺฐารเส กปฺปสเต, อยํ พุทฺโธ ภวิสฺสติฯ
[12]
‘‘ปธานํ ปทหิตฺวาน…เป.… เหสฺสาม สมฺมุขา อิมํ’’ฯ
[13]
ตสฺสาปิ วจนํ สุตฺวา, หฏฺโฐ [ตุฏฺโฐ (สฺยา. กํ.)] สํวิคฺคมานโส;
อุตฺตริํ วตมธิฏฺฐาสิํ, ทสปารมิปูริยาฯ
[14]
โสภณํ นาม นครํ, สาคโร นาม ขตฺติโย;
สุทสฺสนา นาม ชนิกา, อตฺถทสฺสิสฺส สตฺถุโนฯ
[15]
ทสวสฺสสหสฺสานิ, อคารํ อชฺฌ โส วสิ;
อมรคิริ สุคิริ วาหนา, ตโย ปาสาทมุตฺตมาฯ
[16]
เตตฺติํสญฺจ สหสฺสานิ, นาริโย สมลงฺกตา;
วิสาขา นาม นารี จ, เสโล นามาสิ อตฺรโชฯ
[17]
นิมิตฺเต จตุโร ทิสฺวา, อสฺสยาเนน นิกฺขมิ;
อนูนอฏฺฐมาสานิ, ปธานํ ปทหี ชิโนฯ
[18]
พฺรหฺมุนา ยาจิโต สนฺโต, อตฺถทสฺสี มหายโส;
วตฺติ จกฺกํ มหาวีโร, อโนมุยฺยาเน นราสโภฯ
[19]
สนฺโต จ อุปสนฺโต จ, อเหสุํ อคฺคสาวกา;
อภโย นามุปฏฺฐาโก, อตฺถทสฺสิสฺส สตฺถุโนฯ
[20]
ธมฺมา เจว สุธมฺมา จ, อเหสุํ อคฺคสาวิกา;
โพธิ ตสฺส ภควโต, จมฺปโกติ ปวุจฺจติฯ
[21]
นกุโล จ นิสโภ จ, อเหสุํ อคฺคุปฏฺฐกา;
มกิลา จ สุนนฺทา จ, อเหสุํ อคฺคุปฏฺฐิกาฯ
[22]
โสปิ พุทฺโธ อสมสโม, อสีติหตฺถมุคฺคโต;
โสภเต สาลราชาว, อุฬุราชาว ปูริโตฯ
[23]
ตสฺส ปากติกา รํสี, อเนกสตโกฏิโย;
อุทฺธํ อโธ ทส ทิสา, ผรนฺติ โยชนํ สทาฯ
[24]
โสปิ พุทฺโธ นราสโภ, สพฺพสตฺตุตฺตโม มุนิ;
วสฺสสตสหสฺสานิ, โลเก อฏฺฐาสิ จกฺขุมาฯ
[25]
อตุลํ ทสฺเสตฺวา โอภาสํ, วิโรเจตฺวา สเทวเก [อตุลํ ทสฺสยิตฺวาน, โอภาเสตฺวา สเทวเก (สี. ก.)];
โสปิ อนิจฺจตํ ปตฺโต, ยถคฺคุปาทานสงฺขยาฯ
[26]
อตฺถทสฺสี ชินวโร, อโนมารามมฺหิ นิพฺพุโต;
ธาตุวิตฺถาริกํ อาสิ, เตสุ เตสุ ปเทสโตติฯ
อตฺถทสฺสิสฺส ภควโต วํโส จุทฺทสโมฯ
17. ธมฺมทสฺสีพุทฺธวํโส
[1]
ตตฺเถว มณฺฑกปฺปมฺหิ, ธมฺมทสฺสี มหายโส;
ตมนฺธการํ วิธมิตฺวา, อติโรจติ สเทวเกฯ
[2]
ตสฺสาปิ อตุลเตชสฺส, ธมฺมจกฺกปฺปวตฺตเน;
โกฏิสตสหสฺสานํ, ปฐมาภิสมโย อหุฯ
[3]
ยทา พุทฺโธ ธมฺมทสฺสี, วิเนสิ สญฺชยํ อิสิํ;
ตทา นวุติโกฏีนํ, ทุติยาภิสมโย อหุฯ
[4]
ยทา สกฺโก อุปาคญฺฉิ, สปริโส วินายกํ;
ตทา อสีติโกฏีนํ, ตติยาภิสมโย อหุฯ
[5]
ตสฺสาปิ เทวเทวสฺส, สนฺนิปาตา ตโย อหุํ [อาสุํ (สี. สฺยา.)];
ขีณาสวานํ วิมลานํ, สนฺตจิตฺตาน ตาทินํฯ
[6]
ยทา พุทฺโธ ธมฺมทสฺสี, สรเณ วสฺสํ อุปาคมิ;
ตทา โกฏิสตสหสฺสานํ [โกฏิสหสฺสานํ (สี. สฺยา. กํ.)], ปฐโม อาสิ สมาคโมฯ
[7]
ปุนาปรํ ยทา พุทฺโธ, เทวโต เอติ มานุสํ;
ตทาปิ สตโกฏีนํ, ทุติโย อาสิ สมาคโมฯ
[8]