นวุติวสฺสสหสฺสานิ , อายุ วิชฺชติ ตาวเท;
ตาวตา ติฏฺฐมาโน โส, ตาเรสิ ชนตํ พหุํฯ
[29]
เตวิชฺชฉฬภิญฺเญหิ, พลปฺปตฺเตหิ ตาทิหิ;
สมากุลมิทํ อาสิ, อรหนฺเตหิ สาธุหิฯ
[30]
เตปิ สพฺเพ อมิตยสา, วิปฺปมุตฺตา นิรูปธี;
ญาณาโลกํ ทสฺสยิตฺวา, นิพฺพุตา เต มหายสาฯ
[31]
สุเมโธ ชินวโร พุทฺโธ, เมธารามมฺหิ นิพฺพุโต;
ธาตุวิตฺถาริกํ อาสิ, เตสุ เตสุ ปเทสโตติฯ
สุเมธสฺส ภควโต วํโส เอกาทสโมฯ
14. สุชาตพุทฺธวํโส
[1]
ตตฺเถว มณฺฑกปฺปมฺหิ, สุชาโต นาม นายโก;
สีหหนุสภกฺขนฺโธ, อปฺปเมยฺโย ทุราสโทฯ
[2]
จนฺโทว วิมโล สุทฺโธ, สตรํสีว ปตาปวา;
เอวํ โสภติ สมฺพุทฺโธ, ชลนฺโต สิริยา สทาฯ
[3]
ปาปุณิตฺวาน สมฺพุทฺโธ, เกวลํ โพธิมุตฺตมํ;
สุมงฺคลมฺหิ นคเร, ธมฺมจกฺกํ ปวตฺตยิฯ
[4]
เทเสนฺเต [เทเสนฺโต (สฺยา. กํ.)] ปวรํ ธมฺมํ, สุชาเต โลกนายเก [สุชาโต โลกนายโก (สฺยา. กํ.)];
อสีติโกฏี อภิสมิํสุ, ปฐเม ธมฺมเทสเนฯ
[5]
ยทา สุชาโต อมิตยโส, เทเว วสฺสํ อุปาคมิ;
สตฺตติํสสตสหสฺสานํ, ทุติยาภิสมโย อหุฯ
[6]
ยทา สุชาโต อสมสโม, อุปคจฺฉิ ปิตุสนฺติกํ;
สฏฺฐิสตสหสฺสานํ [สตฺตติํสสหสฺสานํ (สี.)], ตติยาภิสมโย อหุฯ
[7]
สนฺนิปาตา ตโย อาสุํ, สุชาตสฺส มเหสิโน;
ขีณาสวานํ วิมลานํ, สนฺตจิตฺตาน ตาทินํฯ
[8]
อภิญฺญาพลปฺปตฺตานํ , อปฺปตฺตานํ ภวาภเว;
สฏฺฐิสตสหสฺสานิ, ปฐมํ สนฺนิปติํสุ เตฯ
[9]
ปุนาปรํ สนฺนิปาเต, ติทิโวโรหเณ ชิเน;
ปญฺญาสสตสหสฺสานํ, ทุติโย อาสิ สมาคโมฯ
[10]
อุปสงฺกมนฺโต นราสภํ, ตสฺส โย อคฺคสาวโก;
จตูหิ สตสหสฺเสหิ, สมฺพุทฺธํ อุปสงฺกมิฯ
[11]
อหํ เตน สมเยน, จตุทีปมฺหิ อิสฺสโร;
อนฺตลิกฺขจโร อาสิํ, จกฺกวตฺตี มหพฺพโลฯ
[12]
โลเก อจฺฉริยํ ทิสฺวา, อพฺภุตํ โลมหํสนํ;
อุปคนฺตฺวาน วนฺทิํ โส, สุชาตํ โลกนายกํฯ
[13]
จตุทีเป มหารชฺชํ, รตเน สตฺต อุตฺตเม;
พุทฺเธ นิยฺยาทยิตฺวาน, ปพฺพชิํ ตสฺส สนฺติเกฯ
[14]
อารามิกา ชนปเท, อุฏฺฐานํ ปฏิปิณฺฑิย;
อุปเนนฺติ ภิกฺขุสงฺฆสฺส, ปจฺจยํ สยนาสนํฯ
[15]
โสปิ มํ พุทฺโธ [ตทา (สฺยา. กํ.)] พฺยากาสิ, ทสสหสฺสิมฺหิ อิสฺสโร;
‘‘ติํสกปฺปสหสฺสมฺหิ, อยํ พุทฺโธ ภวิสฺสติฯ
[16]
‘‘ปธานํ ปทหิตฺวาน…เป.… เหสฺสาม สมฺมุขา อิมํ’’ฯ
[17]
ตสฺสาปิ วจนํ สุตฺวา, ภิยฺโย หาสํ ชเนสหํ;
อธิฏฺฐหิํ วตํ อุคฺคํ, ทสปารมิปูริยาฯ
[18]
สุตฺตนฺตํ วินยญฺจาปิ, นวงฺคํ สตฺถุสาสนํ;
สพฺพํ ปริยาปุณิตฺวาน, โสภยิํ ชินสาสนํฯ
[19]
ตตฺถปฺปมตฺโต วิหรนฺโต, พฺรหฺมํ ภาเวตฺว ภาวนํ;
อภิญฺญาปารมิํ คนฺตฺวา, พฺรหฺมโลกมคญฺฉหํฯ
[20]
สุมงฺคลํ นาม นครํ, อุคฺคโต นาม ขตฺติโย;
มาตา ปภาวตี นาม, สุชาตสฺส มเหสิโนฯ
[21]
นววสฺสสหสฺสานิ , อคารํ อชฺฌ โส วสิ;
สิรี อุปสิรี นนฺโท, ตโย ปาสาทมุตฺตมาฯ
[22]
เตวีสติสหสฺสานิ , นาริโย สมลงฺกตา;
สิรินนฺทา นาม นารี, อุปเสโน นาม อตฺรโชฯ
[23]
นิมิตฺเต จตุโร ทิสฺวา, อสฺสยาเนน นิกฺขมิ;
อนูนนวมาสานิ, ปธานํ ปทหี ชิโนฯ
[24]
พฺรหฺมุนา ยาจิโต สนฺโต, สุชาโต โลกนายโก;
วตฺติ จกฺกํ มหาวีโร, สุมงฺคลุยฺยานมุตฺตเมฯ
[25]
สุทสฺสโน สุเทโว จ, อเหสุํ อคฺคสาวกา;
นารโท นามุปฏฺฐาโก, สุชาตสฺส มเหสิโนฯ
[26]
นาคา จ นาคสมาลา จ, อเหสุํ อคฺคสาวิกา;
โพธิ ตสฺส ภควโต, มหาเวฬูติ วุจฺจติฯ
[27]
โส จ รุกฺโข ฆนกฺขนฺโธ [ฆนรุจิโร (สี. ก.)], อจฺฉิทฺโท โหติ ปตฺติโก;
อุชุ วํโส พฺรหา โหติ, ทสฺสนีโย มโนรโมฯ
[28]
เอกกฺขนฺโธ ปวฑฺฒิตฺวา, ตโต สาขา ปภิชฺชติ;
ยถา สุพทฺโธ โมรหตฺโถ, เอวํ โสภติ โส ทุโมฯ
[29]
น ตสฺส กณฺฏกา โหนฺติ, นาปิ ฉิทฺทํ มหา อหุ;
วิตฺถิณฺณสาโข อวิรโล, สนฺทจฺฉาโย มโนรโมฯ
[30]
สุทตฺโต เจว จิตฺโต จ, อเหสุํ อคฺคุปฏฺฐกา;
สุภทฺทา จ ปทุมา จ, อเหสุํ อคฺคุปฏฺฐิกาฯ
[31]
ปญฺญาสรตโน อาสิ, อุจฺจตฺตเนน โส ชิโน;
สพฺพาการวรูเปโต, สพฺพคุณมุปาคโตฯ
[32]
ตสฺส ปภา อสมสมา, นิทฺธาวติ สมนฺตโต;
อปฺปมาโณ อตุลิโย, โอปมฺเมหิ อนูปโมฯ
[33]
นวุติวสฺสสหสฺสานิ , อายุ วิชฺชติ ตาวเท;
ตาวตา ติฏฺฐมาโน โส, ตาเรสิ ชนตํ พหุํฯ
[34]
ยถาปิ สาคเร อูมี, คคเน ตารกา ยถา;
เอวํ ตทา ปาวจนํ, อรหนฺเตหิ จิตฺติตํ [จิตฺตกํ (สฺยา. กํ.)]ฯ
[35]
โส จ พุทฺโธ อสมสโม, คุณานิ จ ตานิ อตุลิยานิ;
สพฺพํ ตมนฺตรหิตํ, นนุ ริตฺตา สพฺพสงฺขาราฯ
[36]
สุชาโต ชินวโร พุทฺโธ, สิลารามมฺหิ นิพฺพุโต;
ตตฺเถว ตสฺส เจติโย [ตตฺเถว เจติโย สตฺถุ (สฺยา. กํ.)], ตีณิคาวุตมุคฺคโตติฯ
สุชาตสฺส ภควโต วํโส ทฺวาทสโมฯ
15. ปิยทสฺสีพุทฺธวํโส
[1]
สุชาตสฺส อปเรน, สยมฺภู โลกนายโก;
ทุราสโท อสมสโม, ปิยทสฺสี มหายโสฯ
[2]
โสปิ พุทฺโธ อมิตยโส, อาทิจฺโจว วิโรจติ;
สพฺพํ ตมํ นิหนฺตฺวาน, ธมฺมจกฺกํ ปวตฺตยิฯ
[3]
ตสฺสาปิ อตุลเตชสฺส, อเหสุํ อภิสมยา ตโย;
โกฏิสตสหสฺสานํ, ปฐมาภิสมโย อหุฯ
[4]
สุทสฺสโน เทวราชา, มิจฺฉาทิฏฺฐิมโรจยิ;
ตสฺส ทิฏฺฐิํ วิโนเทนฺโต, สตฺถา ธมฺมมเทสยิฯ
[5]
ชนสนฺนิปาโต อตุโล, มหาสนฺนิปตี ตทา;
นวุติโกฏิสหสฺสานํ, ทุติยาภิสมโย อหุฯ
[6]
ยทา โทณมุขํ หตฺถิํ, วิเนสิ นรสารถิ;
อสีติโกฏิสหสฺสานํ, ตติยาภิสมโย อหุฯ
[7]
สนฺนิปาตา ตโย อาสุํ, ตสฺสาปิ ปิยทสฺสิโน;
โกฏิสตสหสฺสานํ, ปฐโม อาสิ สมาคโมฯ
[8]
ตโต ปรํ นวุติโกฏี, สมิํสุ เอกโต มุนี;
ตติเย สนฺนิปาตมฺหิ, อสีติโกฏิโย อหูฯ
[9]
อหํ เตน สมเยน, กสฺสโป นาม พฺราหฺมโณ [มานโว (สฺยา. กํ.)];
อชฺฌายโก มนฺตธโร, ติณฺณํ เวทาน ปารคูฯ
[10]