พฺรหฺมุนา ยาจิโต สนฺโต, อโนมทสฺสี มหามุนิ;
วตฺติ จกฺกํ มหาวีโร, อุยฺยาเน โส สุทสฺสเน [สุทสฺสนุยฺยานมุตฺตเม (สฺยา. กํ.)]ฯ
[22]
นิสโภ จ อโนโม จ [อโสโก จ (สี.)], อเหสุํ อคฺคสาวกา;
วรุโณ นามุปฏฺฐาโก, อโนมทสฺสิสฺส สตฺถุโนฯ
[23]
สุนฺทรี จ สุมนา จ, อเหสุํ อคฺคสาวิกา;
โพธิ ตสฺส ภควโต, อชฺชุโนติ ปวุจฺจติฯ
[24]
นนฺทิวฑฺโฒ สิริวฑฺโฒ, อเหสุํ อคฺคุปฏฺฐกา;
อุปฺปลา เจว ปทุมา จ, อเหสุํ อคฺคุปฏฺฐิกาฯ
[25]
อฏฺฐปณฺณาสรตนํ , อจฺจุคฺคโต มหามุนิ;
ปภา นิทฺธาวตี ตสฺส, สตรํสีว อุคฺคโตฯ
[26]
วสฺสสตสหสฺสานิ, อายุ วิชฺชติ ตาวเท;
ตาวตา ติฏฺฐมาโน โส, ตาเรสิ ชนตํ พหุํฯ
[27]
สุปุปฺผิตํ ปาวจนํ, อรหนฺเตหิ ตาทิหิ;
วีตราเคหิ วิมเลหิ, โสภิตฺถ ชินสาสนํฯ
[28]
โส จ สตฺถา อมิตยโส, ยุคานิ ตานิ อตุลิยานิ;
สพฺพํ ตมนฺตรหิตํ, นนุ ริตฺตา สพฺพสงฺขาราฯ
[29]
อโนมทสฺสี ชิโน สตฺถา, ธมฺมารามมฺหิ นิพฺพุโต;
ตตฺเถวสฺส ชินถูโป, อุพฺเพโธ ปญฺจวีสตีติฯ
อโนมทสฺสิสฺส ภควโต วํโส สตฺตโมฯ
10. ปทุมพุทฺธวํโส
[1]
อโนมทสฺสิสฺส อปเรน, สมฺพุทฺโธ ทฺวิปทุตฺตโม;
ปทุโม นาม นาเมน, อสโม อปฺปฏิปุคฺคโลฯ
[2]
ตสฺสาปิ อสมํ สีลํ, สมาธิปิ อนนฺตโก;
อสงฺเขยฺยํ ญาณวรํ, วิมุตฺติปิ อนูปมาฯ
[3]
ตสฺสาปิ อตุลเตชสฺส, ธมฺมจกฺกปฺปวตฺตเน;
อภิสมยา ตโย อาสุํ, มหาตมปวาหนาฯ
[4]
ปฐมาภิสมเย พุทฺโธ, โกฏิสตมโพธยิ;
ทุติยาภิสมเย ธีโร, นวุติโกฏิมโพธยิฯ
[5]
ยทา จ ปทุโม พุทฺโธ, โอวที สกมตฺรชํ;
ตทา อสีติโกฏีนํ, ตติยาภิสมโย อหุฯ
[6]
สนฺนิปาตา ตโย อาสุํ, ปทุมสฺส มเหสิโน;
โกฏิสตสหสฺสานํ, ปฐโม อาสิ สมาคโมฯ
[7]
กถินตฺถารสมเย , อุปฺปนฺเน กถินจีวเร;
ธมฺมเสนาปติตฺถาย, ภิกฺขู สิพฺพิํสุ [ยาจิํสุ (ก.)] จีวรํฯ
[8]
ตทา เต วิมลา ภิกฺขู, ฉฬภิญฺญา มหิทฺธิกา;
ตีณิ สตสหสฺสานิ, สมิํสุ อปราชิตาฯ
[9]
ปุนาปรํ โส นราสโภ [นรวุสโภ (สฺยา. กํ.)], ปวเน วาสํ อุปาคมิ;
ตทา สมาคโม อาสิ, ทฺวินฺนํ สตสหสฺสินํฯ
[10]
อหํ เตน สมเยน, สีโห อาสิํ มิคาธิภู;
วิเวกมนุพฺรูหนฺตํ , ปวเน อทฺทสํ ชินํฯ
[11]
วนฺทิตฺวา สิรสา ปาเท, กตฺวาน ตํ ปทกฺขิณํ;
ติกฺขตฺตุํ อภินาทิตฺวา, สตฺตาหํ ชินมุปฏฺฐหํฯ
[12]
สตฺตาหํ วรสมาปตฺติยา, วุฏฺฐหิตฺวา ตถาคโต;
มนสา จินฺตยิตฺวาน, โกฏิภิกฺขู สมานยิฯ
[13]
ตทาปิ โส มหาวีโร, เตสํ มชฺเฌ วิยากริ;
‘‘อปริเมยฺยิโต กปฺเป, อยํ พุทฺโธ ภวิสฺสติฯ
[14]
‘‘ปธานํ ปทหิตฺวาน…เป.… เหสฺสาม สมฺมุขา อิมํ’’ฯ
[15]
ตสฺสาปิ วจนํ สุตฺวา, ภิยฺโย จิตฺตํ ปสาทยิํ;
อุตฺตริํ วตมธิฏฺฐาสิํ, ทสปารมิปูริยาฯ
[16]
จมฺปกํ นาม นครํ, อสโม นาม ขตฺติโย;
อสมา นาม ชนิกา, ปทุมสฺส มเหสิโนฯ
[17]
ทสวสฺสสหสฺสานิ , อคารํ อชฺฌ โส วสิ;
นนฺทาวสุยสุตฺตรา , ตโย ปาสาทมุตฺตมาฯ
[18]
เตตฺติํส จ สหสฺสานิ, นาริโย สมลงฺกตา;
อุตฺตรา นาม สา นารี, รมฺโม นามาสิ อตฺรโชฯ
[19]
นิมิตฺเต จตุโร ทิสฺวา, รถยาเนน นิกฺขมิ;
อนูนอฏฺฐมาสานิ, ปธานํ ปทหี ชิโนฯ
[20]
พฺรหฺมุนา ยาจิโต สนฺโต, ปทุโม โลกนายโก;
วตฺติ จกฺกํ มหาวีโร, ธนญฺจุยฺยานมุตฺตเมฯ
[21]
สาโล จ อุปสาโล จ, อเหสุํ อคฺคสาวกา;
วรุโณ นามุปฏฺฐาโก, ปทุมสฺส มเหสิโนฯ
[22]
ราธา เจว สุราธา จ, อเหสุํ อคฺคสาวิกา;
โพธิ ตสฺส ภควโต, มหาโสโณติ วุจฺจติฯ
[23]
ภิยฺโย เจว อสโม จ, อเหสุํ อคฺคุปฏฺฐกา;
รุจี จ นนฺทรามา จ, อเหสุํ อคฺคุปฏฺฐิกาฯ
[24]
อฏฺฐปณฺณาสรตนํ, อจฺจุคฺคโต มหามุนิ;
ปภา นิทฺธาวตี ตสฺส, อสมา สพฺพโส ทิสาฯ
[25]
จนฺทปฺปภา สูริยปฺปภา, รตนคฺคิมณิปฺปภา;
สพฺพาปิ ตา หตา โหนฺติ, ปตฺวา ชินปภุตฺตมํฯ
[26]
วสฺสสตสหสฺสานิ, อายุ วิชฺชติ ตาวเท;
ตาวตา ติฏฺฐมาโน โส, ตาเรสิ ชนตํ พหุํฯ
[27]
ปริปกฺกมานเส สตฺเต, โพธยิตฺวา อเสสโต;
เสสเก อนุสาสิตฺวา, นิพฺพุโต โส สสาวโกฯ
[28]
อุรโคว ตจํ ชิณฺณํ, วทฺธปตฺตํว ปาทโป;
ชหิตฺวา สพฺพสงฺขาเร, นิพฺพุโต โส ยถา สิขีฯ
[29]
ปทุโม ชินวโร สตฺถา, ธมฺมารามมฺหิ นิพฺพุโต;
ธาตุวิตฺถาริกํ อาสิ, เตสุ เตสุ ปเทสโตติฯ
ปทุมสฺส ภควโต วํโส อฏฺฐโมฯ
11. นารทพุทฺธวํโส
[1]
ปทุมสฺส อปเรน, สมฺพุทฺโธ ทฺวิปทุตฺตโม;
นารโท นาม นาเมน, อสโม อปฺปฏิปุคฺคโลฯ
[2]
โส พุทฺโธ จกฺกวตฺติสฺส, เชฏฺโฐ ทยิตโอรโส;
อามุกฺกมาลาภรโณ, อุยฺยานํ อุปสงฺกมิฯ
[3]
ตตฺถาสิ รุกฺโข ยสวิปุโล, อภิรูโป พฺรหา สุจิ;
ตมชฺฌปตฺวา อุปนิสีทิ, มหาโสณสฺส เหฏฺฐโตฯ
[4]
ตตฺถ ญาณวรุปฺปชฺชิ, อนนฺตํ วชิรูปมํ;
เตน วิจินิ สงฺขาเร, อุกฺกุชฺชมวกุชฺชกํ [กุชฺชตํ (สฺยา. กํ.)]ฯ
[5]
ตตฺถ สพฺพกิเลสานิ, อเสสมภิวาหยิ;
ปาปุณี เกวลํ โพธิํ, พุทฺธญาเณ จ จุทฺทสฯ
[6]
ปาปุณิตฺวาน สมฺโพธิํ, ธมฺมจกฺกํ ปวตฺตยิ;
โกฏิสตสหสฺสานํ, ปฐมาภิสมโย อหุฯ
[7]
มหาโทณํ นาคราชํ, วินยนฺโต มหามุนิ;
ปาฏิเหรํ ตทากาสิ, ทสฺสยนฺโต สเทวเกฯ
[8]
ตทา เทวมนุสฺสานํ, ตมฺหิ ธมฺมปฺปกาสเน;
นวุติโกฏิสหสฺสานิ, ตริํสุ สพฺพสํสยํฯ
[9]
ยมฺหิ กาเล มหาวีโร, โอวที สกมตฺรชํ;
อสีติโกฏิสหสฺสานํ, ตติยาภิสมโย อหุฯ
[10]
สนฺนิปาตา ตโย อาสุํ, นารทสฺส มเหสิโน;
โกฏิสตสหสฺสานํ, ปฐโม อาสิ สมาคโมฯ
[11]
ยทา พุทฺโธ พุทฺธคุณํ, สนิทานํ ปกาสยิ;
นวุติโกฏิสหสฺสานิ, สมิํสุ วิมลา ตทาฯ
[12]
ยทา เวโรจโน นาโค, ทานํ ททาติ สตฺถุโน;
ตทา สมิํสุ ชินปุตฺตา, อสีติสตสหสฺสิโยฯ
[13]