ติสฺสา จ อุปติสฺสา จ, อเหสุํ อคฺคสาวิกา;

สาลกลฺยาณิโก โพธิ, โกณฺฑญฺญสฺส มเหสิโนฯ

[32]

โสโณ จ อุปโสโณ จ, อเหสุํ อคฺคุปฏฺฐกา;

นนฺทา เจว สิรีมา จ, อเหสุํ อคฺคุปฏฺฐิกาฯ

[33]

โส อฏฺฐาสีติ หตฺถานิ, อจฺจุคฺคโต มหามุนิ;

โสภเต อุฬุราชาว สูริโย มชฺฌนฺหิเก ยถาฯ

[34]

วสฺสสตสหสฺสานิ , อายุ วิชฺชติ ตาวเท;

ตาวตา ติฏฺฐมาโน โส, ตาเรสิ ชนตํ พหุํฯ

[35]

ขีณาสเวหิ วิมเลหิ, วิจิตฺตา อาสิ เมทนี;

ยถา คคนมุฬูหิ, เอวํ โส อุปโสภถฯ

[36]

เตปิ นาคา อปฺปเมยฺยา, อสงฺโขภา ทุราสทา;

วิชฺชุปาตํว ทสฺเสตฺวา, นิพฺพุตา เต มหายสาฯ

[37]

สา จ อตุลิยา ชินสฺส อิทฺธิ, ญาณปริภาวิโต จ สมาธิ;

สพฺพํ ตมนฺตรหิตํ, นนุ ริตฺตา สพฺพสงฺขาราฯ

[38]

โกณฺฑญฺโญ ปวโร พุทฺโธ, จนฺทารามมฺหิ นิพฺพุโต;

ตตฺเถว เจติโย จิตฺโต, สตฺต โยชนมุสฺสิโตติฯ

โกณฺฑญฺญสฺส ภควโต วํโส ทุติโยฯ

5. มงฺคลพุทฺธวํโส

[1]

โกณฺฑญฺญสฺส อปเรน, มงฺคโล นาม นายโก;

ตมํ โลเก นิหนฺตฺวาน, ธมฺโมกฺกมภิธารยิฯ

[2]

อตุลาสิ ปภา ตสฺส, ชิเนหญฺเญหิ อุตฺตริํ;

จนฺทสูริยปภํ หนฺตฺวา, ทสสหสฺสี วิโรจติฯ

[3]

โสปิ พุทฺโธ ปกาเสสิ, จตุโร สจฺจวรุตฺตเม;

เต เต สจฺจรสํ ปีตฺวา, วิโนเทนฺติ มหาตมํฯ

[4]

ปตฺวาน โพธิมตุลํ, ปฐเม ธมฺมเทสเน;

โกฏิสตสหสฺสานํ, ธมฺมาภิสมโย อหุฯ

[5]

สุรินฺทเทวภวเน , พุทฺโธ ธมฺมมเทสยิ;

ตทา โกฏิสหสฺสานํ [นวโกฏิสหสฺสานํ (สี.)], ทุติโย สมโย อหุฯ

[6]

ยทา สุนนฺโท จกฺกวตฺตี, สมฺพุทฺธํ อุปสงฺกมิ;

ตทา อาหนิ สมฺพุทฺโธ, ธมฺมเภริํ วรุตฺตมํฯ

[7]

สุนนฺทสฺสานุจรา ชนตา, ตทาสุํ นวุติโกฏิโย;

สพฺเพปิ เต นิรวเสสา, อเหสุํ เอหิ ภิกฺขุกาฯ

[8]

สนฺนิปาตา ตโย อาสุํ, มงฺคลสฺส มเหสิโน;

โกฏิสตสหสฺสานํ, ปฐโม อาสิ สมาคโมฯ

[9]

ทุติโย โกฏิสตสหสฺสานํ, ตติโย นวุติโกฏินํ;

ขีณาสวานํ วิมลานํ, ตทา อาสิ สมาคโมฯ

[10]

อหํ เตน สมเยน, สุรุจี นาม พฺราหฺมโณ;

อชฺฌายโก มนฺตธโร, ติณฺณํ เวทาน ปารคูฯ

[11]

ตมหํ อุปสงฺกมฺม, สรณํ คนฺตฺวาน สตฺถุโน;

สมฺพุทฺธปฺปมุขํ สงฺฆํ, คนฺธมาเลน ปูชยิํ;

ปูเชตฺวา คนฺธมาเลน, ควปาเนน ตปฺปยิํฯ

[12]

โสปิ มํ พุทฺโธ พฺยากาสิ, มงฺคโล ทฺวิปทุตฺตโม;

‘‘อปริเมยฺยิโต กปฺเป, อยํ พุทฺโธ ภวิสฺสติฯ

[13]

‘‘ปธานํ ปทหิตฺวาน…เป.… เหสฺสาม สมฺมุขา อิมํ’’ฯ

[14]

ตสฺสาปิ วจนํ สุตฺวา, ภิยฺโย จิตฺตํ ปสาทยิํ;

อุตฺตริํ วตมธิฏฺฐาสิํ, ทส ปารมิปูริยาฯ

[15]

ตทา ปีติมนุพฺรูหนฺโต, สมฺโพธิวรปตฺติยา;

พุทฺเธ ทตฺวาน มํ เคหํ, ปพฺพชิํ ตสฺส สนฺติเกฯ

[16]

สุตฺตนฺตํ วินยญฺจาปิ, นวงฺคํ สตฺถุสาสนํ;

สพฺพํ ปริยาปุณิตฺวา, โสภยิํ ชินสาสนํฯ

[17]

ตตฺถปฺปมตฺโต วิหรนฺโต, พฺรหฺมํ ภาเวตฺว ภาวนํ;

อภิญฺญาปารมิํ คนฺตฺวา, พฺรหฺมโลกมคจฺฉหํฯ

[18]

อุตฺตรํ นาม นครํ, อุตฺตโร นาม ขตฺติโย;

อุตฺตรา นาม ชนิกา, มงฺคลสฺส มเหสิโนฯ

[19]

นววสฺสสหสฺสานิ , อคารํ อชฺฌ โส วสิ;

ยสวา สุจิมา สิรีมา, ตโย ปาสาทมุตฺตมาฯ

[20]

สมติํสสหสฺสานิ, นาริโย สมลงฺกตา;

ยสวตี นาม นารี, สีวโล นาม อตฺรโชฯ

[21]

นิมิตฺเต จตุโร ทิสฺวา, อสฺสยาเนน นิกฺขมิ;

อนูนอฏฺฐมาสานิ, ปธานํ ปทหี ชิโนฯ

[22]

พฺรหฺมุนา ยาจิโต สนฺโต, มงฺคโล นาม นายโก;

วตฺติ จกฺกํ มหาวีโร, วเน สิรีวรุตฺตเมฯ

[23]

สุเทโว ธมฺมเสโน จ, อเหสุํ อคฺคสาวกา;

ปาลิโต นามุปฏฺฐาโก, มงฺคลสฺส มเหสิโนฯ

[24]

สีวลา จ อโสกา จ, อเหสุํ อคฺคสาวิกา;

โพธิ ตสฺส ภควโต, นาครุกฺโขติ วุจฺจติฯ

[25]

นนฺโท เจว วิสาโข จ, อเหสุํ อคฺคุปฏฺฐกา;

อนุลา เจว สุตนา จ, อเหสุํ อคฺคุปฏฺฐิกาฯ

[26]

อฏฺฐาสีติ รตนานิ, อจฺจุคฺคโต มหามุนิ;

ตโต นิทฺธาวตี รํสี, อเนกสตสหสฺสิโยฯ

[27]

นวุติวสฺสสหสฺสานิ, อายุ วิชฺชติ ตาวเท;

ตาวตา ติฏฺฐมาโน โส, ตาเรสิ ชนตํ พหุํฯ

[28]

ยถาปิ สาคเร อูมี, น สกฺกา ตา คเณตุเย;

ตเถว สาวกา ตสฺส, น สกฺกา เต คเณตุเยฯ

[29]

ยาว อฏฺฐาสิ สมฺพุทฺโธ, มงฺคโล โลกนายโก;

น ตสฺส สาสเน อตฺถิ, สกิเลสมรณํ [สํกิเลสมรณํ (สี.)] ตทาฯ

[30]

ธมฺโมกฺกํ ธารยิตฺวาน, สนฺตาเรตฺวา มหาชนํ;

ชลิตฺวา ธูมเกตูว, นิพฺพุโต โส มหายโสฯ

[31]

สงฺขารานํ สภาวตฺถํ, ทสฺสยิตฺวา สเทวเก;

ชลิตฺวา อคฺคิกฺขนฺโธว, สูริโย อตฺถงฺคโต ยถาฯ

[32]

อุยฺยาเน วสฺสเร นาม, พุทฺโธ นิพฺพายิ มงฺคโล;

ตตฺเถวสฺส ชินถูโป, ติํสโยชนมุคฺคโตติฯ

มงฺคลสฺส ภควโต วํโส ตติโยฯ

6. สุมนพุทฺธวํโส

[1]

มงฺคลสฺส อปเรน, สุมโน นาม นายโก;

สพฺพธมฺเมหิ อสโม, สพฺพสตฺตานมุตฺตโมฯ

[2]

ตทา อมตเภริํ โส, อาหนี เมขเล ปุเร;

ธมฺมสงฺขสมายุตฺตํ, นวงฺคํ ชินสาสนํฯ

[3]

นิชฺชินิตฺวา กิเลเส โส, ปตฺวา สมฺโพธิมุตฺตมํ;

มาเปสิ นครํ สตฺถา, สทฺธมฺมปุรวรุตฺตมํฯ

[4]

นิรนฺตรํ อกุฏิลํ, อุชุํ วิปุลวิตฺถตํ;

มาเปสิ โส มหาวีถิํ, สติปฏฺฐานวรุตฺตมํฯ

[5]

ผเล จตฺตาริ สามญฺเญ, จตสฺโส ปฏิสมฺภิทา;

ฉฬภิญฺญาฏฺฐสมาปตฺตี, ปสาเรสิ ตตฺถ วีถิยํฯ

[6]

เย อปฺปมตฺตา อขิลา, หิริวีริเยหุปาคตา;

เต เต อิเม คุณวเร, อาทิยนฺติ ยถา สุขํฯ

[7]

เอวเมเตน โยเคน, อุทฺธรนฺโต มหาชนํ;

โพเธสิ ปฐมํ สตฺถา, โกฏิสตสหสฺสิโยฯ

[8]

ยมฺหิ กาเล มหาวีโร, โอวที ติตฺถิเย คเณ;

โกฏิสหสฺสาภิสมิํสุ [โกฏิสตสหสฺสานิ (สฺยา. กํ.), โกฏิสตสหสฺสานํ (ก.)], ทุติเย ธมฺมเทสเนฯ

[9]

ยทา เทวา มนุสฺสา จ, สมคฺคา เอกมานสา;

นิโรธปญฺหํ ปุจฺฉิํสุ, สํสยญฺจาปิ มานสํฯ

[10]