‘‘เตน กมฺเมน สุกเตน, เจตนาปณิธีหิ จ;
ชหิตฺวา กินฺนรํ เทหํ, ตาวติํสมคจฺฉหํฯ
[31]
‘‘ฉตฺติํสกฺขตฺตุํ เทวินฺโท, เทวรชฺชมการยิํ;
ทสกฺขตฺตุํ จกฺกวตฺตี, มหารชฺชมการยิํฯ
[32]
‘‘ปเทสรชฺชํ วิปุลํ, คณนาโต อสงฺขิยํ;
สุเขตฺเต วปฺปิตํ พีชํ, สยมฺภุมฺหิ อโห มม [อโหสิ เม (สฺยา.)]ฯ
[33]
‘‘กุสลํ วิชฺชเต มยฺหํ, ปพฺพชิํ อนคาริยํ;
ปูชารโห อหํ อชฺช, สกฺยปุตฺตสฺส สาสเนฯ
[34]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[35]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[36]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อชฺชุนปุปฺผิโย เถโร อิมา คาถาโย
อภาสิตฺถาติฯ
อชฺชุนปุปฺผิยตฺเถรสฺสาปทานํ ฉฏฺฐํฯ
7. กุฏชปุปฺผิยตฺเถรอปทานํ
[37]
‘‘หิมวนฺตสฺสาวิทูเร, วสโล [จาวโล (สี. ปี.), อจฺจโย (สฺยา.)] นาม ปพฺพโต;
พุทฺโธ สุทสฺสโน นาม, วสเต ปพฺพตนฺตเรฯ
[38]
‘‘ปุปฺผํ เหมวนฺตํ คยฺห, เวหาสํ อคมาสหํ;
ตตฺถทฺทสาสิํ สมฺพุทฺธํ, โอฆติณฺณมนาสวํฯ
[39]
‘‘ปุปฺผํ กุฏชมาทาย, สิเร กตฺวาน อญฺชลิํ [กตฺวานหํ ตทา (สฺยา. ปี. ก.)];
พุทฺธสฺส อภิโรเปสิํ, สยมฺภุสฺส มเหสิโนฯ
[40]
‘‘เอกติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[41]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[42]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[43]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กุฏชปุปฺผิโย เถโร อิมา คาถาโย
อภาสิตฺถาติฯ
กุฏชปุปฺผิยตฺเถรสฺสาปทานํ สตฺตมํฯ
8. โฆสสญฺญกตฺเถรอปทานํ
[44]
‘‘มิคลุทฺโท ปุเร อาสิํ, อรญฺเญ วิปิเน อหํ;
อทฺทสํ วิรชํ พุทฺธํ, เทวสงฺฆปุรกฺขตํฯ
[45]
‘‘จตุสจฺจํ ปกาเสนฺตํ, เทเสนฺตํ อมตํ ปทํ;
อสฺโสสิํ มธุรํ ธมฺมํ, สิขิโน โลกพนฺธุโนฯ
[46]
‘‘โฆเส จิตฺตํ ปสาเทสิํ, อสมปฺปฏิปุคฺคเล;
ตตฺถ จิตฺตํ ปสาเทตฺวา, อุตฺตริํ [อตริํ (สี. ปี.)] ทุตฺตรํ ภวํฯ
[47]
‘‘เอกติํเส อิโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, โฆสสญฺญายิทํ ผลํฯ
[48]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[49]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[50]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โฆสสญฺญโก เถโร อิมา คาถาโย
อภาสิตฺถาติฯ
โฆสสญฺญกตฺเถรสฺสาปทานํ อฏฺฐมํฯ
9. สพฺพผลทายกตฺเถรอปทานํ
[51]
‘‘วรุโณ นาม นาเมน, พฺราหฺมโณ มนฺตปารคู;
ฉฑฺเฑตฺวา ทสปุตฺตานิ, วนมชฺโฌคหิํ ตทาฯ
[52]
